Eka vukhongeri hinkwabyo ku ni vanhu lava nga ni timbilu letinene. Swa tsakisa leswi Xikwembu xi vonaka vanhu volavo ni ku va khathalela. Kambe lexi vavaka hileswaku vukhongeri byi tirhisiwa hi ndlela yo biha. (2 Vakorinto 4:3, 4; 11:13-15) Swiviko swa mahungu swi vula leswaku vukhongeri byin’wana bya katseka eka vutherorisi, ku yayarheriwa ka rixaka, tinyimpi ni ku xanisiwa ka vana. Sweswo swi va twisa ku vava vanhu lava pfumelaka eka Xikwembu hi timbilu ta vona hinkwato.—Hlaya Matewu 24:3-5, 11, 12.

Vukhongeri bya ntiyiso byi dzunisa Xikwembu kasi bya mavunwa a xi byi tsakeli. Vukhongeri bya mavunwa byi dyondzisa swilo leswi nga riki kona eBibeleni ku katsa ni tidyondzo ta mavunwa malunghana ni Xikwembu ni hi vafi. Kambe Yehovha u lava leswaku vanhu va tiva ntiyiso ha yena.—Hlaya Ezekiyele 18:4; 1 Timotiya 2:3-5.

Lexi tsakisaka hi leswaku Xikwembu a xi kanganyisiwi hi vukhongeri lebyi vulaka leswaku bya xi rhandza kambe entiyisweni byi rhandza misava ya Sathana. (Yakobo 4:4) Rito ra Xikwembu ri hlamusela vukhongeri hinkwabyo bya mavunwa tanihi “Babilona Lonkulu.” Babilona a ku ri muti wa khale lowu vukhongeri bya mavunwa byi sunguleke eka wona endzhaku ka Ndhambi ya le nkarhini wa Nowa. Ku nga ri khale, Xikwembu xi ta byi herisa hi xitshuketa vukhongeri hinkwabyo lebyi kanganyisaka ni ku tshikilela vanhu.—Hlaya Nhlavutelo 17:1, 2, 5, 16, 17; 18:8.

Ku ni mahungu yo tala lamanene. Yehovha a nga va rivalanga vanhu va timbilu letinene lava hangalakeke evukhongerini bya mavunwa emisaveni hinkwayo. U hlengeleta vanhu volavo hi ku va dyondzisa ntiyiso.—Hlaya Mikiya 4:2, 5.

Yehovha wa va khathalela vanhu lava rhandzaka ntiyiso ni swilo leswinene. U va khutaza leswaku va huma evukhongerini bya mavunwa. Vanhu lava rhandzaka Xikwembu va tiyimiserile ku hundzuka leswaku va ta xi tsakisa.—Hlaya Nhlavutelo 18:4.

Hi lembe-xidzana ro sungula, loko vanhu va timbilu letinene va twe mahungu lamanene eka vaapostola, va ma amukele hi ntsako. Yehovha u va dyondzise ndlela leyintshwa yo hanya, leyi tsakisaka, leyi nga ni xikongomelo ni ntshembo. Va hi vekele xikombiso lexinene namuntlha hikuva va amukele mahungu lamanene hi ku rhangisa Yehovha evuton’wini bya vona.—Hlaya 1 Vatesalonika 1:8, 9; 2:13.

Yehovha u va amukela hi mandla mambirhi lava tshikaka vugandzeri bya mavunwa kutani va tihlanganisa ni ndyangu wa vagandzeri va yena. Loko u amukela xirhambo xa Yehovha xa rirhandzu u ta va munghana wa yena, u va xiphemu xa ndyangu lowuntshwa lowu nga ni rirhandzu wa vagandzeri va Yehovha ni ku kuma vutomi lebyi nga heriki.—Hlaya Marka 10:29, 30; 2 Vakorinto 6:17, 18.

Mhaka ya ku lovisiwa loku taka ka vukhongeri bya mavunwa i mahungu lamanene. Swi ta endla leswaku misava hinkwayo yi nga ha tshikileriwi. Vukhongeri bya mavunwa a byi nge he tlheli byi kanganyisa ni ku hambanisa vanhu. Vanhu hinkwavo lava nga ta va va hanya va ta gandzela Xikwembu xi ri xin’we xa ntiyiso hi vun’we.—Hlaya Nhlavutelo 18:20, 21; 21:3, 4.