Xana U Pfumela Eka Yini?
Vanhu vo tala va vukhongeri lava hisekelaka etlhelo va pfumela leswaku misava ni hinkwaswo leswi nga eka yona swi tumbuluxiwe hi masiku ya tsevu ntsena ya tiawara ta 24, eka magidi ma nga ri mangani ya malembe lama hundzeke. Vanhu van’wana lava pfumelaka leswaku Xikwembu a xi kona va nga ha ringeta ku ku khorwisa leswaku Xikwembu a xi kona, leswaku Bibele i buku ya mintsheketo nileswaku vutomi byi ve kona hi xiwelo hikwalaho ka ku landzelelana ka swiendlakalo.
Kasi vanhu vo tala va ni mavonelo lama nga fambisaniki ni mavonelo lama boxiweke laha henhla lama kanetanaka. Mhaka ya leswaku u le ku hlayeni ka broxara leyi, yi komba leswaku u un’wana wa vona. Swi nga ha endleka leswaku wa pfumela eka Xikwembu naswona wa yi xixima Bibele. Kambe swi nga ha endleka leswaku wa ma xixima mavonelo ya van’wasayense lava dyondzekeke ni lava nga ni nkucetelo lava nga kholwiki leswaku vutomi byi tumbuluxiwile. Loko u ri mutswari, swi nga endleka leswaku wa tivutisa leswaku u ta va hlamula njhani vana va wena loko vo tshuka va ku vutisa swivutiso malunghana ni ku tiendlekela ka swilo swin’we ni ku tumbuluxiwa ka swona.
Xana hi xihi xikongomelo xa broxara leyi?
Xikongomelo xa broxara leyi a hi ku hlekula mavonelo ya vanhu lava hisekelaka etlhelo kumbe ya lava hlawulaka ku pfumela leswaku Xikwembu a xi kona. Ematshan’weni ya sweswo, hi tshemba leswaku broxara leyi yi ta ku susumetela leswaku u tlhela u kambisisa swilo swin’wana leswi u swi pfumelaka. Yi ta ku hlamusela rungula ra ku tumbuluxa leri nga eBibeleni leri swi nga ha endlekaka leswaku a wu se ri kambisisa. Nakambe yi ta kandziyisa leswaku hikwalaho ka yini swi ri swa nkoka leswi u pfumelaka swona malunghana ni ndlela leyi vutomi byi sunguleke ha yona.
Xana na wena u ta tshemba mavonelo ya lava vulaka leswaku a ku na Muvumbi la tlhariheke ni lava vulaka leswaku Bibele a yi tshembeki? Kumbe, xana u ta kambisisa leswi Bibele yi swi vulaka hakunene? Xana hi tihi tidyondzo leti u faneleke u ti tshemba u tlhela u va ni ripfumelo eka tona: i ta le Bibeleni kumbe i ta lava vulaka leswaku vutomi byi lo tiendlekela? (Vaheveru 11:1) Ha yini u nga kambisisi ntiyiso wa mhaka?
