DYONDZO 03
Xana U Nga Yi Tshemba Bibele?
Bibele yi ni switshembiso ni switsundzuxo swo tala. Swi nga endleka u lava ku tiva leswi yi swi dyondzisaka kambe hi hala tlhelo a wu lavi ku pfumela xin’wana na xin’wana. Xana u nga tshemba switshembiso ni switsundzuxo leswi nga eka buku leyi ya khale? Xana u nga swi tshemba leswi Bibele yi swi vulaka hi ku tiphina hi vutomi sweswi ni le nkarhini lowu taka? Vanhu va timiliyoni va swi tshemba. Na wena u nga tikambisisela hi wexe.
1. Xana leswi nga eBibeleni i ntiyiso kumbe i mitsheketo?
Bibele yi ni “marito lama . . . [nga] ntiyiso.” (Eklesiasta 12:10) Yi hlamusela swilo leswi endliweke hi vanhu lava tshameke va hanya. (Hlaya Luka 1:3; 3:1, 2.) Van’wamatimu ni vayimburi vo tala va kume leswaku masiku, vanhu, tindhawu ni leswi ku vulavuriwaka ha swona eBibeleni i ntiyiso.
2. Hikwalaho ka yini hi nga vulaka leswaku Bibele a yi hundzeriwanga hi nkarhi?
Hakanyingi Bibele yi vulavula hi swilo leswi vanhu a va nga tivi nchumu hi swona loko ya ha tsariwa. Hi xikombiso, ya vulavula hi sayense. Swilo swo tala leswi yi swi vulaka hi sayense, vanhu a va nga swi tshembi loko ya ha tsariwa. Kambe van’wasayense va manguva lawa va kume leswaku leswi Bibele yi swi vulaka i ntiyiso. Leswi Bibele yi swi vulaka “swi ta tshama swi tshembekile, sweswi ni hilaha ku nga heriki.”—Pisalema 111:8.
3. Hikwalaho ka yini hi fanele hi tshemba leswi Bibele yi swi vulaka hi vumundzuku?
Bibele yi ni vuprofeta * lebyi vulavulaka hi swilo “leswi nga si humelelaka.” (Esaya 46:10) Yi vulavule hi swilo swo tala swi nga si endleka leswi nga hetelela swi endlekile. Yi tlhele yi vulavula hi swilo leswi endlekaka namuntlha. Eka dyondzo leyi, hi ta kambisisa byin’wana bya vuprofeta bya le Bibeleni. Ndlela leyi byi endlekeke ha yona ya hlamarisa!
ANAKANYISISA
Kambisisa ndlela leyi sayense yi pfumelelanaka ha yona ni Bibele ivi u vona byin’wana bya vuprofeta bya le Bibeleni lebyi hlamarisaka.
4. Sayense ya pfumelelana ni Bibele
Khale vanhu a va tshemba leswaku misava yi tshame ehenhla ka nchumu wo karhi. Tlanga VHIDIYO.
Xiya leswi tsariweke eka buku ya Yobo kwalomu ka malembe ya 3 500 lama hundzeke. Hlaya Yobo 26:7, ivi mi bula hi xivutiso lexi:
-
Hikwalaho ka yini mhaka ya leswaku misava yi hayekiwe “empfhukeni” yi hlamarisa?
Ndlela leyi mati ma rhendzelekaka ha yona yi sungule ku twisisiwa kahle hi va-1800. Kambe xiya leswi Bibele yi swi vuleke malembe ya kwalomu ka 3 500 lama hundzeke. Hlaya Yobo 36:27, 28, ivi mi bula hi swivutiso leswi:
-
I yini lexi ku hlamarisaka hi nhlamuselo leyi ya ku rhendzeleka ka mati?
-
Xana matsalwa lama u ma hlayeke ma endla leswaku u tshemba leswi Bibele yi swi vulaka?
5. Bibele yi profete hi swilo swa nkoka leswi a swi ta endleka
Hlaya Esaya 44:27–45:2, ivi mi bula hi xivutiso lexi:
-
Hi swihi swilo leswi Bibele yi swi profeteke malembe ya 200, muti wa Babilona wu nga si lovisiwa?
Matimu ma kombisa leswaku Hosi Korexe wa le Peresiya ni masocha yakwe va hlule muti wa Babilona hi lembe ra 539 Yesu a nga si velekiwa. Va hambukise nambu lowu a wu sirhelele muti. Endzhaku ka loko va nghene hi tigede leti a ti nga pfariwanga va hlule muti wolowo va nga kalanga va lwa na wona. Se swi endla malembe yo tlula 2 500 muti wa Babilona wu lovisiwile kambe ni namuntlha wa ha ri marhumbi. Xiya leswi Bibele yi swi profeteke.
Hlaya Esaya 13:19, 20, ivi mi bula hi xivutiso lexi:
-
Vuprofeta lebyi byi hetiseke njhani?
Marhumbi ya Babilona namuntlha eIraq
6. Bibele yi profete swilo leswi humelelaka namuntlha
Bibele yi vula leswaku hi hanya “emasikwini yo hetelela.” (2 Timotiya 3:1) Xiya leswi Bibele yi swi profeteke hi nkarhi lowu hi hanyaka eka wona.
Hlaya Matewu 24:6, 7, ivi mi bula hi xivutiso lexi:
-
Bibele yi profete leswaku masiku yo hetelela ma ta va njhani?
Hlaya 2 Timotiya 3:1-5, ivi mi bula hi swivutiso leswi landzelaka:
-
Bibele yi profete leswaku vanhu va ta tikhoma njhani emasikwini yo hetelela?
-
Vanhu va tikhoma njhani namuntlha?
VAN’WANA VA RI: “Bibele i buku ya khale ya mitsheketo.”
-
Hi ku ya hi vonelo ra wena, i yini lexi kombisaka leswaku Bibele ya tshembeka?
NKATSAKANYO
Matimu, sayense ni vuprofeta swi kombisa leswaku u nga yi tshemba Bibele.
Mpfuxeto
-
Xana leswi nga eBibeleni i ntiyiso kumbe i mitsheketo?
-
Hi swihi swilo leswi sayense yi pfumelelanaka ni Bibele ha swona?
-
U vona onge Bibele ya vulavula hi swilo leswi nga ta endleka enkarhini lowu taka? Hikwalaho ka yini u vula tano?
KUMA LESWI ENGETELEKEKE
Xana Bibele ya hoxisa loko swi ta etimhakeni ta sayense?
“Xana Sayense Ya Pfumelelana Ni Bibele?” (Nhlokomhaka leyi kumekaka eka website)
Hi swihi swilo leswi endlekaka “emasikwini yo hetelela”?
“Vuprofeta Bya Tsevu Bya Bibele Lebyi Nga Eku Hetisekeni” (Xihondzo xo Rindza, May 1, 2011)
Vona ndlela leyi vuprofeta lebyi vulavulaka hi Mfumo wa Grikiya byi hetisekeke ha yona.
Hlaya ndlela leyi vuprofeta bya le Bibeleni byi cinceke ndlela leyi wanuna un’wana a a yi teka ha yona Bibele.
“A Ndzi Nga Pfumeli Leswaku Xikwembu Xi Kona” (Xihondzo xo Rindza No. 5 2017)
^ par. 9 Vuprofeta i mahungu lama humaka eka Xikwembu lama vulavulaka hi swilo leswi nga ta endleka enkarhini lowu taka.
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
