DYONDZO 09
Tshinela Eka Xikwembu Hi Xikhongelo
U vona onge u lava ku kongomisiwa evuton’wini? Xana u ni swivutiso swa nkoka swinene leswi u lavaka tinhlamulo ta swona? Xana u lava ku chaveleriwa? Xana wa swi lava ku va munghana wa Yehovha? Xikhongelo xi nga ku pfuna leswaku u fikelela swilo sweswo hinkwaswo. Kambe hi yihi ndlela leyinene yo khongela? Xana Xikwembu xi yingisa swikhongelo hinkwaswo? U nga khongela njhani leswaku Xikwembu xi yingisa swikhongelo swa wena? A hi voneni.
1. Hi fanele hi khongela eka mani naswona hi khongelela yini?
Yesu u hi dyondzise leswaku hi fanele hi khongela eka Tata wa hina wa le tilweni ntsena. Na yena u khongele eka Yehovha. Yesu u te: “Kutani mi fanele mi khongela hi ndlela leyi: ‘Tata wa hina la nga matilweni. . . ’” (Matewu 6:9) Loko hi khongela eka Yehovha, vunghana bya hina na yena byi ya byi tiya.
Hi nga khongela eka Xikwembu hi mhaka yin’wana ni yin’wana. Kambe leswaku Xikwembu xi hlamula swikhongelo swa hina, hi fanele hi khongelela leswi fambisanaka ni leswi xi swi lavaka. “[Xikwembu] xa hi twa loko hi kombela xin’wana ni xin’wana lexi fambisanaka ni ku rhandza ka xona.” (1 Yohane 5:14) Yesu u hi nyike xikombiso xa swilo leswi hi nga swi khongelelaka. (Hlaya Matewu 6:9-13.) Loko hi khongela hi nga rivali ku khensa Xikwembu hikwalaho ka swilo leswi xi hi endlelaka swona ni ku xi kombela leswaku xi pfuna van’wana.
2. Hi fanele hi khongela njhani?
Bibele yi hi khutaza ku ‘chululela Xikwembu timbilu ta hina.’ (Pisalema 62:8) Hi fanele hi khongela swi huma embilwini. Hi nga khongela swi twala kumbe hi mbilu, hi tshamile, hi yimile, hi khinsamile kumbe hi ndlela yin’wana ni yin’wana leyi kombisaka xichavo. Hi nga khongela nkarhi wun’wana ni wun’wana laha hi nga kona.
3. Xikwembu xi swi hlamula njhani swikhongelo swa hina?
Xikwembu xi swi hlamula hi tindlela to hambanahambana. Yehovha Xikwembu u hi nyike Rito rakwe ku nga Bibele, laha mikarhi yo tala hi kumaka tinhlamulo ta swivutiso swa hina eka yona. Ku hlaya Rito ra Xikwembu swi nga “tlharihisa la nga riki na ntokoto.” (Pisalema 19:7; hlaya Yakobo 1:5.) Yehovha a nga hi endla hi va ni ku rhula loko hi ri ni swiphiqo. A nga tirhisa na vanhu lava n’wi gandzelaka leswaku va hi pfuna loko hi lava ku pfuniwa.
ANAKANYISISA
Dyondza leswaku u nga khongela njhani swi huma embilwini hi ndlela leyi tsakisaka Xikwembu ni ndlela leyi xikhongelo xi nga ku pfunaka ha yona.
4. Xikwembu xi lava hi khongela hi ndlela yo karhi
I yini xi endlaka Xikwembu xi yingisa swikhongelo swa hina kumbe xi nga swi yingisi? Tlanga VHIDIYO.
Yehovha u lava hi khongela eka yena. Hlaya Pisalema 65:2, ivi mi bula hi swivutiso leswi:
-
U ehleketa leswaku “Mutwi wa xikhongelo” u lava u khongela eka yena? Hikwalaho ka yini u vula tano?
Hi fanele hi hanya hi milawu ya Xikwembu loko hi lava xi yingisa swikhongelo swa hina. Hlaya Mikiya 3:4 na 1 Petro 3:12, ivi mi bula hi xivutiso lexi:
-
Hi nga endla yini leswaku hi tiyiseka ku Yehovha u ta yingisa swikhongelo swa hina?
Mitlawa yimbirhi ya masocha yi ri karhi yi khongelela ku hlula. Xana swa twala ku va hi langutela leswaku Xikwembu xi hlamula swikhongelo swo tano?
5. Swikhongelo swa hina swi fanele swi huma embilwini
Vanhu van’wana va dyondzisiwe ku krema swikhongelo leswi va faneleke va swi phindhaphindha. Kambe xana Xikwembu xi lava hi khongela hi ndlela yoleyo? Hlaya Matewu 6:7, ivi mi bula hi xivutiso lexi:
-
U nga swi papalata njhani ku vula “marito lama fanaka hi ku phindhaphindha” loko u khongela?
Siku ni siku, khongela u khensa Yehovha hikwalaho ka nchumu wo karhi lowu a ku katekiseke ha wona. Loko vhiki ri ya hela, u ta va u khongelele swilo swa nkombo handle ko va u swi phindha.
Tatana lonene u lava n’wana wakwe a n’wi byela ta le mbilwini. Yehovha na yena u lava hi khongela eka yena swi suka embilwini
6. Xikhongelo i nyiko leyi humaka eka Xikwembu
Xikhongelo xi nga hi pfuna njhani loko swilo swi famba kahle ni loko hi ri ni swiphiqo? Tlanga VHIDIYO.
Bibele yi vula leswaku xikhongelo xi nga hi pfuna hi titwa hi phyuphyile. Hlaya Vafilipiya 4:6, 7, ivi hi bula hi swivutiso leswi:
-
Hambileswi mikarhi yin’wana xikhongelo xi nga tlhantlheki swiphiqo swa hina, xi nga hi pfuna njhani?
-
Hi swihi swilo swin’wana leswi u nga tsakelaka ku khongela ha swona?
Xana a wu swi tiva?
Rito “amen” ri vula leswaku “a swi ve tano” kumbe “hakunene.” Ku sukela emikarhini ya ku tsariwa ka Bibele, “amen” a yi vuriwa emakumu ka xikhongelo.—1 Tikronika 16:36.
7. Tivekele nkarhi wo khongela
Mikarhi yin’wana hi nga tikuma hi ri bizi lerova hi rivala na ku khongela. Yesu a a xi teka xi ri xa nkoka ku fikela kwihi xikhongelo? Hlaya Matewu 14:23 na Marka 1:35, ivi mi bula hi swivutiso leswi:
-
Yesu u endle yini leswaku a kuma nkarhi wa ku khongela?
-
U nga wu kuma rini nkarhi wa ku khongela?
VAN’WANA VA RI: “Xikwembu a xi swi hlamuli swikhongelo swa hina.”
-
Wena u ri yini?
NKATSAKANYO
Swikhongelo leswi humaka embilwini swi hi pfuna ku va vanghana va Xikwembu, ku va hi titwa hi phyuphyile ni ku hi nyika matimba yo endla leswi tsakisaka Yehovha.
Mpfuxeto
-
Hi fanele hi khongela eka mani?
-
Hi fanele hi khongela njhani?
-
Xikhongelo xi hi pfuna njhani?
KUMA LESWI ENGETELEKEKE
Kuma tinhlamulo ta swivutiso leswi talaka ku vutisiwa mayelana ni xikhongelo.
“Swilo Swa Nkombo Leswi U Faneleke U Swi Tiva Hi Xikhongelo” (Xihondzo xo Rindza, October 1, 2010)
Dyondza leswaku hikwalaho ka yini swi ri swa nkoka ku khongela ni leswaku u nga swi antswisa njhani swikhongelo swa wena.
“Hikwalaho Ka Yini Ndzi Fanele Ndzi Khongela?” (Nhlokomhaka leyi kumekaka eka website)
Xiya leswi Bibele yi swi vulaka mayelana ni loyi hi faneleke hi khongela eka yena.
“Xana Ndzi Fanele Ndzi Khongela Eka Vakwetsimi?” (Nhlokomhaka leyi kumekaka eka website)
Eka vhidiyo leyi ya vuyimbeleri, xiya loko swi ri na mhaka leswaku hi khongela hi ri kwihi kumbe hi nkarhi muni.
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
