Dyondzo Ya Bibele Yi Pfuna Ku Dyondza Ku Hlaya Ni Ku Tsala
“Ku hlaya ni ku tsala i mfanelo ya munhu un’wana ni un’wana, i nchumu lowu endlaka leswaku munhu a titshemba ni ku n’wi pfuna ku vulavurisana ni vanhu ni ku endla leswaku vanhu va hluvuka.”—UNESCO. *
SWIVIKO swin’wana swi kombisa leswaku vanhu lava tlulaka 700 wa timiliyoni emisaveni hinkwayo lava nga ni malembe ya 15 ku ya ehenhla, a va koti ku tsala ni ku hlaya. Sweswo swi endla leswaku va nga swi koti ku tiva leswi humelelaka emisaveni, ku katsa ni mahanyelo lamanene ni tidyondzo leti ‘tsaleriweke ku letela hina’ eBibeleni. (Varhoma 15:4) Ematikweni yo tala, Timbhoni ta Yehovha ti dyondzisa vanhu mahala ku hlaya ni ku tsala loko ti ri karhi ti va dyondzisa Bibele. Xana dyondzo leyi ya pfuna?
Xiya ntirho lowu Timbhoni ti wu endlaka eMexico tiko leri ku vulavuriwaka Xipaniya. Ku sukela hi 1946 Timbhoni ta Yehovha ti dyondzise vanhu vo tlula 152 000 ku tsala ni ku hlaya, endzhaku ka nkarhi vo tala va lava dyondzisiweke va ve vadyondzisi. Mfumo wu tsalele Timbhoni mapapila wu ti khensa hileswi wu xiximaka ntirho lowu ti wu endlaka. Papila rin’wana ri te: “Huvo ya Dyondzo yi tlangela swinene ntirho wa n’wina naswona ya mi bumabumela hi ntirhisano wa n’wina eku hluvukiseni ka Dyondzo ya Vanhu Lavakulu.”
Vanhu lavakulu ni lavatsongo va pfuneke ngopfu eka dyondzo leyi. Hi xikombiso, Josefina a a ri ni malembe ya 101 loko a tsarisa eka dyondzo leyi, u yi pase endzhaku ka malembe mambirhi.
Hambileswi Xipaniya ku nga ririmi leri tirhisiwaka ngopfu eMexico, a hi rona ntsena ririmi leri ri dyondziwaka. Hi 2013, mintlawa ya nhungu yo hambanahambana yi dyondze ku hlaya ni ku tsala hi ririmi ra ka vona.
Ku tiva ku hlaya ni ku tsala i swa nkoka, swi endla leswaku munhu a kota ku dyondza. Kambe xa nkoka, swi endla leswaku vanhu va mixaka hinkwayo va kota ku hlaya Bibele—ku nga buku leyi huhuteriweke leyi ntshunxaka vanhu evuhlongeni bya vukholwa hava, vukhongeri bya mavunwa ni ku va ni tihanyi.—Yohane 8:32.
^ ndzim. 2 Vandla ra Nhlangano wa Matiko ra Dyondzo, Sayense ni Ndhavuko [United Nations Educational, Scientific, and Cultural Organization (UNESCO)].
U Nga Ha Tsakela
KU PFUNA EMUGANGENI
Vanhu Va Magidi Va Dyondza Ku Hlaya Ni Ku Tsala
Hlaya mintokoto ya vanhu lava humaka ematikweni ya misava lava vuyeriweke hi titlilasi to dyondza ku hlaya ni ku tsala leti hleriweke hi Timbhoni ta Yehovha.
NTIRHO WO KANDZIYISA
Bibele Leyi Leheke Timitara Ta 1,8
Twana ndlela leyi Tibibele ta Braille ti kandziyisiwaka ha yona hi tindzimi to tala.
DOCUMENTARIES
Timbhoni Ta Yehovha Ti Chumayela eMisaveni Hinkwayo
Timbhoni ta Yehovha ti tiveka hi ntirho wa tona wo dyondzisa Bibele emisaveni hinkwayo. Xana ntirho wa tona wu hleriwa, wu kongomisiwa ni ku seketeriwa njhani hi timali?
