Ndlela Leyi Jaha Ri Pfuneke Tata Wa Rona Ha Yona
Ndlela Leyi Jaha Ri Pfuneke Tata Wa Rona Ha Yona
JAMES wa le Nghilandhi loyi a ri ni kwalomu ka 30 wa malembe, a a nga hanyanga kahle emianakanyweni. Hambiswiritano, ku ringana malembe yo tala a a ya eminhlanganweni ya Timboni ta Yehovha swin’we ni mana wakwe ni sesi wakwe. Kambe tata wakwe, a a nga swi tsakeli leswi va swi pfumelaka. Endzhaku ka tidyondzo ta nimadyambu, laha a ku ri ni nkombiso wa ndlela leyi u nga rhambaka ha yona munhu loyi u n’wi tivaka eXitsundzuxweni xa rifu ra Kreste, siku rero James u fike ekaya a nghena ekamareni rakwe hi ku hatlisa. Hi ku hlamala, mana wa yena u n’wi sale endzhaku kutani a n’wi kuma a khome minkandziyiso ya khale ya timagazini ta Xihondzo xo Rindza ni Xalamuka!, a ri eku lavalaveni. Hiloko a hlawula yin’wana leyi eka tluka ra yona ro hetelela a yi ri ni xirhambo xa Xitsundzuxo kutani a tsutsumela eka tata wakwe. Loko a fika eka tata wakwe u n’wi kombe xifaniso kutani a ku “Wena!” Mana wakwe ni tata wakwe va langutane hi ku hlamala kutani va swi lemuka leswaku James a a ri eku rhambeni ka tata wa yena leswaku a ya eXitsundzuxweni. Tata wakwe u vule leswaku kumbexana a nga ya.
Hi madyambu ya siku ra Xitsundzuxo, James u ye laha ku tshamaka swiambalo swa tata wakwe kutani a teka buruku a nyika tata wakwe hiloko a n’wi komba leswaku a ri ambala. Tata wa yena u n’wi byele leswaku yena a nga yi enhlanganweni. Kutani James ni mana wakwe va fambe va ri voxe eHolweni ya Mfumo.
Endzhaku ka nkarhi, James a a nga ha pfumeli ku ambala loko mana wakwe a ringeta ku n’wi ambexa leswaku va ya eminhlanganweni ya vandlha, a a lava ku sala ekaya ni tata wakwe. Kutani Sonto yin’wana nimixo, James u tlhele a ala loko mana wa yena a ringeta ku n’wi ambexa leswaku va ya enhlanganweni. Lexi hlamariseke mana wakwe, hiloko tata wa James u vule leswi eka yena, “James, loko ndzi ya enhlanganweni namuntlha, xana na wena u ta ya?” Leswi swi tsakise James. U angarhe tata wakwe kutani a ku, “Ina!” kutani hi vunharhu bya vona va khome ndlela va ya eHolweni ya Mfumo.
Ku sukela siku rero, tata wa James u ye emahlweni a va kona eminhlanganweni hinkwayo leyi khomiwaka hi Sonto, ku nga ri khale u vule leswaku loko a ta endla nhluvuko u fanele a va kona ni le ka minhlangano leyin’wana. (Vaheveru 10:24, 25) U endle tano, kutani endzhaku ka tin’hweti timbirhi u sungule ku dyondza Bibele minkarhi hinkwayo. U endle nhluvuko hi xihatla, a lulamisa swiyimo swa yena swa vutomi, naswona a nga hlwelanga ku sungula ku hlanganyela entirhweni wo chumayela hi Mfumo. Endzhaku ka lembe a sungule ku dyondza Bibele u tinyiketele eka Yehovha kutani a swi kombisa hi ku khuvuriwa ematini. Sweswi i nandza wa vutirheli evandlheni ra ka vona. Namuntlha ndyangu hinkwawo wu tirhela Yehovha hi vun’we.