1, 2. Swivono leswi vulavulaka hi nhlengeletano ya Yehovha ya le misaveni hinkwayo swi hi susumetela ku endla yini?

SWA tsakisa ku tiva leswaku hi xiphemu xa nhlengeletano leyikulu leyi nga emisaveni hinkwayo. Swivono leswi ku vulavuriweke ha swona eka Ezekiyele ndzima 1 ni le ka Daniyele ndzima 7 swi yi hlamusela kahle ndlela leyi Yehovha a tirhaka ha yona ku hetisisa xikongomelo xa yena. Yesu u rhangela xiphemu xa laha misaveni xa nhlengeletano ya Yehovha, a xi kongomisa eku endleni ka ntirho wo chumayela mahungu lamanene, ku letela ni ku khutaza lava endlaka ntirho lowu ni ku pfuna van’wana leswaku va va vagandzeri va Yehovha. Leswi swi hi susumetela ku tshemba nhlengeletano ya Yehovha!—Mat. 24:45.

² Xana hi landzela xikombiso xa nhlengeletano leyi? Xana ku hisekela ka hina ntiyiso ku ya emahlweni kumbe ka hunguteka? Loko hi ri karhi hi anakanyisisa hi swivutiso leswi, hi nga ha xiya leswaku se hi sungule ku karhala kumbe a ha ha hiseki. Sweswo swi nga endleka. Hi lembe-xidzana ro sungula, muapostola Pawulo u boheke ku khutaza Vakreste-kulobye leswaku va anakanya hi xikombiso xa Yesu xa ku hiseka. Pawulo u vule leswaku leswi swi ta va pfuna leswaku va nga “karhali [va] wa mapa eka mimoya-xiviri ya [vona].” (Hev. 12:3) Hilaha ku fanaka, loko hi kambisisa xihloko lexi hundzeke hi vukheta, lexi kombiseke leswi endliwaka hi nhlengeletano ya Yehovha, hi fanele hi pfuneke swinene leswaku hi tshama hi ri karhi hi hiseka naswona hi tiyisela.

3. Hi fanele hi endla yini leswaku hi nga karhali, naswona hi ta kambisisa yini exihlokweni lexi?

³ Kambe, Pawulo u kombise leswaku ku laveka leswi engetelekeke loko hi nga lavi ku karhala. U vule leswaku hi fanele hi hambeta hi “endla leswi nga swinene.” (Gal. 6:9) Hikwalaho ku laveka leswaku hi endla swo karhi. A hi kambisiseni swilo swa ntlhanu leswi hi faneleke hi swi endla leswi nga ta hi pfuna leswaku hi tshama hi ri karhi hi hiseka ni ku landzela nkongomiso wa nhlengeletano ya Yehovha. Endzhaku hi ta swi xiya leswaku hi kwihi laha hina hi hexe kumbe ndyangu wa hina wu faneleke wu antswisa kona.

4. Ha yini hi nga vulaka leswaku minhlangano i xiphemu xa nkoka evugandzerini bya ntiyiso?

⁴ I khale minhlangano yi ri ya nkoka swinene eka malandza ya Yehovha. Etilweni, swivumbiwa swa moya swa rhambiwa leswaku swi ta hlangana emahlweni ka Yehovha hi minkarhi leyi faneleke. (1 Tih. 22:19; Yobo 1:6; 2:1; Dan. 7:10) EIsrayele wa khale, tiko rero a ri fanele ri hlengeletana “leswaku [ri] yingisa nileswaku [ri] dyondza.” (Det. 31:10-12) Vayuda va lembe-xidzana ro sungula a va ri ni mukhuva wa ku ya emasinagogeni leswaku va ya hlaya Matsalwa. (Luka 4:16; Mint. 15:21) Minhlangano yi hambete yi ri ya nkoka loko ku vumbiwa vandlha ra Vukreste naswona ya ha ri ya nkoka swinene evugandzerini bya hina. Vakreste va ntiyiso va ‘khathalelana leswaku va khutazana erirhandzwini ni le mintirhweni leyinene.’ Hi fanele hi hambeta hi “khutazana, naswona hi endla tano hilaha ku engetelekeke ngopfu tanihi leswi [hi] vonaka siku [ra Yehovha] ri tshinela.”—Hev. 10:24, 25.

5. Hi nga khutazana njhani eminhlanganweni ya hina?

⁵ Ndlela yin’wana ya nkoka leyi hi khutazanaka ha yona eminhlanganweni ya hina i ku va hi hlamula. Hi nga kombisa ripfumelo ra hina erivaleni hi ku hlamula swivutiso swa tindzimana, hi ku hlamusela ndlela leyi tsalwa ro karhi ri tirhaka ha yona, hi ku vula ntokoto wo koma lowu kombisaka ndlela leyi milawu ya le Bibeleni yi hi pfunaka ha yona kumbe hi tindlela tin’wana. (Ps. 22:22; 40:9) A swi kanakanisi leswaku u ta pfumela leswaku ku nga khathariseki leswaku hi ni malembe mangani hi ya eminhlanganweni, swa khutaza ku yingisela tinhlamulo leti humaka embilwini leti vuriwaka hi vamakwerhu va xinuna ni va xisati—lavakulu ni lavatsongo.

6. Hi tihi tindlela tin’wana leti minhlangano ya hina yi hi pfunaka ha tona?

⁶ Hi swihi swivangelo swin’wana leswi endlaka Xikwembu xa hina xi vula leswaku i swa nkoka leswaku hi hlengeletana nkarhi na nkarhi? Minhlangano, tinhlengeletano ni mintsombano ya hina swi hi pfuna leswaku hi va ni xivindzi xo chumayela hambiloko vanhu va le nsin’wini ya hina va hi kaneta kumbe va nga lavi ku hi yingisela. (Mint. 4:23, 31) Ha tiyisiwa eripfumelweni hi mabulo lama sekeriweke eMatsalweni. (Mint. 15:32; Rhom. 1:11, 12) Tidyondzo ni swikhutazo leswi hi swi kumaka eminhlanganweni ya hina swi hi pfuna leswaku hi va ni ntsako wa xiviri naswona swi hi nyika “ku rhula emasikwini ya khombo.” (Ps. 94:12, 13) Komiti yo Dyondzisa ya Huvo leyi Fumaka yi langutela ku lunghiseleriwa ka minongonoko hinkwayo ya timhaka ta moya leswaku ku leteriwa vanhu va Yehovha emisaveni hinkwayo. Ha ma tlangela swinene malunghiselelo lama endleriwaka hina leswaku hi tsakela tidyondzo letinene eminhlanganweni ya hina vhiki rin’wana ni rin’wana lembe hinkwaro!

7, 8. (a) Hi xihi xikongomelo-nkulu xa minhlangano ya hina ya vandlha? (b) Minhlangano yi ku pfuna njhani hi tlhelo ra moya?

⁷ Kambe, ku ni xivangelo xin’wana xa nkoka swinene, lexi tlulaka vuyelo lebyi hi byi kumaka eminhlanganweni ya hina. Xikongomelo-nkulu xa ku hlengeletana ka hina i ku gandzela Yehovha. (Hlaya Pisalema 95:6.) Mayana lunghelo leri hi nga na rona ro dzunisa Xikwembu xa hina lexi tlakukeke! (Kol. 3:16) Yehovha u faneriwa hi ku va hi n’wi gandzela nkarhi na nkarhi hi ku va hi ya eminhlanganweni hi tlhela hi hlamula eka yona. (Nhlav. 4:11) Hikwalaho, a swi hlamarisi leswi hi khutaziwaka leswaku “hi nga fularheli ku hlengeletana ka hina, hilaha ku nga ntolovelo wa van’wana”!—Hev. 10:25.

⁸ Xana hi teka minhlangano ya hina ya Vukreste yi ri lunghiselelo ra ku hi pfuna leswaku hi tiyisela ku fikela loko Yehovha a lovisa mafambiselo lawa yo homboloka ya swilo? Loko swi ri tano, minhlangano yi ta va xin’wana xa “swilo swa nkoka swinene” leswi hi tinyikaka nkarhi wa swona hambileswi hi khomekeke evuton’wini. (Filp. 1:10) A hi fanelanga hi xwa eminhlanganweni handle ka loko ku ri ni xivangelo lexi twalaka lexi endlaka hi nga swi koti ku hlengeletana ni vamakwerhu eku gandzeleni Yehovha.

9. Hi swi tivisa ku yini leswaku ntirho wo chumayela i wa nkoka?

⁹ Ku ya nkarhi na nkarhi entirhweni wo chumayela swi tlhela swi hi pfuna leswaku hi hambeta hi fambisana ni nhlengeletano ya Yehovha. Yesu u sungule ntirho lowu wo chumayela loko a ha ri laha misaveni. (Mat. 28:19, 20) Ku sukela hi nkarhi wolowo, ntirho wo chumayela hi Mfumo ni wo endla vadyondzisiwa i wun’wana wa mintirho ya nkoka ya nhlengeletano hinkwayo ya Yehovha. Mintokoto yo tala ya manguva lawa yi kombisa leswaku tintsumi ti seketela ntirho wa hina ni ku hi kongomisa eka ‘lava va nga ni mboyamelo lowunene eka vutomi lebyi nga heriki.’ (Mint. 13:48; Nhlav. 14:6, 7) Xikongomelo xa xiphemu xa laha misaveni xa nhlengeletano ya Yehovha i ku hlela ni ku seketela ntirho wo chumayela. Xana ntirho lowu i xin’wana xa swilo swa nkoka evuton’wini bya hina?

10. (a) Kombisa ndlela leyi hi nga tshamaka hi ri karhi hi hisekela ntiyiso ha yona. (b) Ntirho wa nsimu wu ku pfune njhani leswaku u nga karhali?

¹⁰ Ku hisekela ntirho wo chumayela swi hi pfuna ku kurisa ndlela leyi hi rhandzaka ntiyiso ha yona. Xiya leswi Mitchel, nkulu la nga ni ntokoto tlhelo phayona ra nkarhi hinkwawo a swi vuleke. U ri: “Ndza swi rhandza ku byela vanhu malunghana ni ntiyiso. Ndzi anakanya hi nhloko-mhaka leyintshwa leyi nga eka Xihondzo xo Rindza kumbe Xalamuka! kutani ndzi hlamarisiwa hi vutlhari, vutivi ni ndlela leyi nkandziyiso wun’wana ni wun’wana wu ringaniselaka ha yona. Ndzi lava ku ya ensin’wini ndzi ya vona ndlela leyi vanhu va nga ta angula ha yona, ndlela leyi ndzi nga pfuxaka  ku tsakela ka vona ha yona. Ntirho wa mina wa nsimu wu ndzi endla ndzi tshama ndzi tiyile. Swilo leswin’wana ndzi swi endla ndzi nga si ya ensin’wini kumbe loko se ndzi vuyile ensin’wini.” Hilaha ku fanaka, loko hi tshama hi khomekile hi ntirho wa hina wo kwetsima swi nga hi pfuna leswaku hi hambeta hi tshama hi tiyile emasikwini lawa ya makumu.—Hlaya 1 Vakorinto 15:58.

11. Ha yini hi fanele hi hlaya minkandziyiso ya hina hi tlhela hi anakanyisisa hi leswi hi swi hlayeke?

¹¹ Yehovha u hi lunghiselele mphakelo wo tala wa minkandziyiso ya swakudya swa moya leswaku yi hi nyika matimba. A swi kanakanisi leswaku nkarhi wun’wana endzhaku ko hlaya nkandziyiso wo karhi u tshame u ku: ‘Leswi hi leswi hakunene a ndzi swi lava! Onge hiloko Yehovha a endle leswaku swi tsaleriwa mina!’ Ku ni xivangelo lexi endlaka u titwa hi ndlela yoleyo. Yehovha u tirhisa malunghiselelo lawa leswaku a hi dyondzisa ni ku hi kongomisa. U te: “Ndzi ta endla leswaku u va ni ku twisisa naswona ndzi ku letela hi ndlela leyi u faneleke u famba ha yona.” (Ps. 32:8) Xana hi tikarhatela ku hlaya minkandziyiso hinkwayo leyi hi yi kumaka ni ku tlhela hi anakanyisisa hi leswi hi swi hlayeke? Sweswo swi ta hi pfuna leswaku hi tiyisela ni ku hambeta hi hiseka entirhweni wa Xikwembu emasikwini lawa yo tika ya makumu.—Hlaya Pisalema 1:1-3; 35:28; 119:97.

12. I yini leswi nga hi pfunaka leswaku hi tlangela minkandziyiso ya hina?

¹² Hi ta yi tlangela swinene minkandziyiso ya hina loko hi anakanyisisa hi ntirho hinkwawo lowu endliweke leswaku yi va kona. Komiti ya Vatsari ya Huvo leyi Fumaka yi langutela ku endliwa ka ndzavisiso, ku tsariwa, ku hlayiwa ni ku lulamisiwa ka swihoxo, ku tirhisiwa ka swifaniso ni ku hundzuluxeriwa ka minkandziyiso ya hina leyi kandziyisiweke swin’we ni leyi nghenisiwaka eka Web site ya hina. Marhavi lama nga ni michini yo kandziyisa ma rhumela minkandziyiso emavandlheni ya le kusuhi ni ya le kule. Ha yini ku endliwa ntirho lowu hinkwawo? Leswaku vanhu va Yehovha va ta wundliwa hi swakudya swa moya. (Esa. 65:13) Onge hi nga tinyika nkarhi wo hlaya minkandziyiso hinkwayo leyi hi yi kumaka enhlengeletanweni ya Yehovha.—Ps. 119:27.

13, 14. I vamani lava seketelaka malunghiselelo ya Yehovha etilweni, naswona hi nga wu kombisa njhani nseketelo lowu fanaka laha misaveni?

¹³ Eka xivono lexi voniweke hi muapostola Yohane, u vone Yesu a khandziye hanci yo basa leswaku a ta hlula lava xandzukelaka Yehovha. (Nhlav. 19:11-15) Hakunene swi tiyisa ripfumelo ku tiva leswaku endzhaku ka Yesu ku ni tintsumi to tshembeka naswona u ni vatotiwa lava hluleke lava humaka laha misaveni lava se va kumeke hakelo ya vona ya le tilweni! (Nhlav. 2:26, 27) Xikombiso xa vona xa nkoka xi hi dyondzisa leswaku hi fanele hi seketela lava va rhangelaka enhlengeletanweni ya Yehovha.

¹⁴ Hilaha ku fanaka, ntshungu lowukulu wu wu seketela hi ku helela ntirho wa vamakwavo va Kreste lava totiweke lava va ha riki laha misaveni naswona va rhangelaka nhlengeletano namuntlha. (Hlaya Zakariya 8:23.) Hi nga swi kombisa njhani leswaku ha ma seketela malunghiselelo ya Yehovha? Ndlela yin’wana i ku va hi titsongahata eka lava va rhangelaka. (Hev. 13:7, 17) Leswi hi fanele hi rhanga hi swi endla evandlheni ra hina. Xana ndlela leyi hi vulavulaka ha yona hi vakulu yi endla leswaku vona va xiximiwa swin’we ni ntirho wa vona wa vulanguteri? Xana ha va khutaza vana va hina ku xixima vavanuna lava vo tshembeka ni ku ya eka vona leswaku va kuma xitsundzuxo xa le Matsalweni? Ku engetela kwalaho, xana ha bula tanihi ndyangu hi ndlela leyi hi nga tirhisaka mali ya hina ha yona ku seketela ntirho wa misava hinkwayo hi minyikelo ya hina? (Swiv. 3:9; 1 Kor. 16:2; 2 Kor. 8:12) Xana hi ri teka ri ri ra nkoka lunghelo ro hlanganyela eku basiseni ka Holo ya Mfumo? Moya wa Yehovha wu tirha kahle laha ku nga ni ku xiximana ni vun’we. Moya wolowo wu hi nyika matimba leswaku hi nga karhali emasikwini lawa ya makumu.—Esa. 40:29-31.

15. Ha yini nkarhi na nkarhi hi fanele hi lwa hi matimba leswaku hi hanya hi ku pfumelelana ni xikongomelo lexi tlakukeke xa Yehovha?

¹⁵ Xo hetelela, leswaku hi tiyisela ni leswaku hi tshama hi ri karhi hi fambisana ni nhlengeletano ya Yehovha, vutomi bya hina byi fanele byi fambisana ni rungula leri hi ri chumayelaka hi ku “tiyiseka hi leswi amukelekaka eHosini.” (Efe. 5:10, 11) Hikwalaho ka ku nga hetiseki ka hina ni matshalatshala ya Sathana ni misava leyi yo homboloka, nkarhi na nkarhi hi lwisana ni minkucetelo yo biha evuton’wini bya hina. Van’wana va n’wina vamakwerhu va hina lava rhandzekaka mi fanele mi tikarhata siku ni siku leswaku mi hlayisa vuxaka bya n’wina na Yehovha. Sweswo swi endla leswaku mi rhandzeka swinene eka yena. Mi nga lan’wi! Loko hi hanya hi ndlela leyi fambisanaka ni xikongomelo xa Yehovha, hi ta eneriseka swinene naswona hi ta tiyiseka leswaku vugandzeri bya hina a hi bya hava.—1 Kor. 9:24-27.

16, 17. (a) Hi fanele hi endla yini loko hi endle xidyoho lexikulu? (b) Hi nga vuyeriwa njhani eka xikombiso xa Anne?

¹⁶ Kambe, u fanele u endla yini loko u endle xidyoho lexikulu? Kuma mpfuno hi xihatla. Loko u tumbeta xidyoho swi to nyanyisa timhaka. Tsundzuka, Davhida u vule leswaku loko a tumbeta swidyoho swa yena, ‘marhambu ya yena ma hlakarile hikwalaho ka ku konya ka yena siku hinkwaro.’ (Ps. 32:3) Ina, loko hi tumbeta swidyoho hi ta heleriwa hi ntsako kumbexana ni hi vunghana bya hina na Yehovha, kambe “loyi a tiphofulaka kutani a tshika, u ta kombiwa tintswalo.”—Swiv. 28:13.

¹⁷ Anakanya hi xikombiso xa Anne. * Loko Anne a ri emalembeni ya kondlo-a-ndzi-dyi, a a ri phayona ra nkarhi hinkwawo. Kambe, u sungule ku hanya vutomi bya mikoka-yimbirhi. Leswi swi n’wi khumbe swinene. U ri: “Ripfalo ra mina ri ndzi kingindzile swinene. Nkarhi hinkwawo a ndzi nga tsakanga naswona a ndzi tshikilelekile.” Xana u endle yini? U vule leswaku siku rin’wana eminhlanganweni a ku hlamuseriwa Yakobo 5:14, 15. Anne u swi xiyile leswaku a a lava mpfuno naswona u ye eka vakulu leswaku va n’wi pfuna. Loko a ehleketa ha swona, u ri: “Matsalwa wolawo i nkongomiso lowu tsariweke hi Yehovha leswaku ma tshungula hi tlhelo ra moya. A swi olovi ku mita murhi wolowo, kambe wa hanyisa. Ndzi tirhise ndzayo leyi kumekaka ematsalweni wolawo, naswona yi tirhile.” Se ku hundze malembe yo hlaya, naswona sweswi Anne u tlhela a tirhela Yehovha hi ku hiseka hi ripfalo leri baseke.

18. I yini leswi hi faneleke hi tiyimisela swona?

¹⁸ Hakunene i lunghelo ku hanya emasikwini lawa yo hetelela ni ku va xiphemu xa nhlengeletano ya Yehovha leyi hlamarisaka! A hi tiyimiseleni ku nga swi tekeli ehansi leswi hi nga na swona. Ku ri na sweswo, a hi tirheni hi vun’we tanihi ndyangu leswaku hi va kona eminhlanganweni nkarhi na nkarhi evandlheni ra hina, hi lava vanhu lava nga ni timbilu letinene hi ku hiseka ensin’wini ya hina ni ku tlangela malunghiselelo ya nkarhi na nkarhi ya swakudya swa moya leswi hi swi kumaka. Nakambe a hi seketeleni lava rhangelaka naswona hi hanya hi ku pfumelelana ni mahungu lawa hi ma chumayelaka. Loko hi endla tano, a hi nge fambisani ni nhlengeletano ya Yehovha ntsena kambe hi ta tlhela hi nga karhali eku endleni leswi nga swinene!