Leswi Hi Swi Dyondzaka Eka Yesu

Malunghana Ni Xikwembu Xa Ntiyiso

Xana Xikwembu xi ni vito?

Yesu u dyondzise leswaku Xikwembu xi ni vito. U te: “Kutani mi fanele mi khongela hi ndlela leyi: ‘Tata wa hina la nge matilweni, vito ra wena a ri kwetsimisiwe.’” (Matewu 6:9) Bibele yi hi byela leswaku vito ra Xikwembu i Yehovha. (Pisalema 83:18) Loko Yesu a khongela eka Tata wakwe u vule leswi hi vadyondzisiwa vakwe: “Ndzi va tivise vito ra wena.”—Yohane 17:26.

Yehovha i mani?

Yesu u vule leswaku Yehovha i “Xikwembu xi ri xin’we xa ntiyiso” hikuva Yehovha hi yena Muvumbi. (Yohane 17:3) Yesu u te: “Xana a mi hlayanga leswaku loyi a va tumbuluxeke eku sunguleni u va endle va va waxinuna ni waxisati?” (Matewu 19:4) Yesu u tlhele a ku: “Xikwembu i Moya.” (Yohane 4:24) Hikwalaho a hi nge swi koti ku vona Xikwembu.—Eksoda 33:17-20.

 I yini leswi Xikwembu xi swi languteleke eka hina?

Loko un’wana a vutise Yesu leswaku hi xihi xileriso lexi nga xa nkoka swinene, U hlamule a ku: “Xo sungula xi ri, ‘Twana, Wena Israyele, Yehovha Xikwembu xa hina i Yehovha un’we, naswona u fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo ni hi ntamu wa wena hinkwawo.’ Xa vumbirhi hi lexi, ‘U fanele u rhandza warikwenu kukota loko u tirhandza.’”—Marka 12:28-31.

Hi nga swi kombisa njhani leswaku ha xi rhandza Xikwembu?

Yesu u te: “Ndza n’wi rhandza Tatana.” U ri kombise njhani rirhandzu rakwe? U te: “Ndzi endla hilaha Tatana a ndzi leriseke ku endla hakona.” (Yohane 14:31) U tlhele a ku: “Nkarhi hinkwawo ndzi endla swilo leswi n’wi tsakisaka.” (Yohane 8:29) Hi nga tsakisa Xikwembu hi ku dyondza ha xona. Loko Yesu a khongelela vadyondzisiwa vakwe u te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso.”—Yohane 17:3; 1 Timotiya 2:4.

Hi nga dyondza njhani hi Xikwembu?

Ndlela yin’wana yo dyondza hi Xikwembu i ku xiyisisa swilo leswi xi swi tumbuluxeke. Hi xikombiso, Yesu u te: “Xiyisisani swinene tinyenyana ta tilo, hikuva a ti byali mbewu, a ti tshoveli, a ti hlengeleti eswitlatini; kambe, Tata wa n’wina wa le tilweni wa ti wundla. Xana a mi ti tluli hi risima?” Hi yihi dyondzo leyi Yesu a a lava leswaku hi yi dyondza hi ku xiyisisa tinyenyana? A hi fanelanga hi pfumelela ku vilela hi swilaveko swa hina swa nyama ku hi tshikisa ku tirhela Xikwembu.—Matewu 6:26-33.

Ndlela leyinene ngopfu yo tiva Yehovha i ku dyondza Rito rakwe, ku nga Bibele. Yesu u vitane Matsalwa a ku i “rito ra Xikwembu.” (Luka 8:21) Loko Yesu a khongela eka Xikwembu u te: “Rito ra wena i ntiyiso.”—Yohane 17:17; 2 Petro 1:20, 21.

Yesu u pfune vanhu leswaku va dyondza ntiyiso hi Yehovha. Un’wana wa vadyondzisiwa va Yesu u vule leswi malunghana na Yesu: “Xana timbilu ta hina a ti nga pfurhi loko a ri karhi a vulavula na hina egondzweni, loko a hi pfulela Matsalwa hi ku helela?” (Luka 24:32) Leswaku hi dyondza hi Xikwembu hi fanele hi titsongahata naswona hi tiyimisela ku dyondzisiwa. Yesu u te: “Loko mi nga hundzuluki mi kotisa vana lavatsongo, a mi nge ngheni nikatsongo emfun’weni wa matilo.”—Matewu 18:3.

Ha yini ku tiva Xikwembu swi tisa ntsako?

Hi fanele hi twisisa xikongomelo xa vutomi naswona Xikwembu xi hi pfuna ku twisisa xikongomelo xexo. Yesu u te: “Va tsaka lava khathalaka hi xilaveko xa vona xa moya.” (Matewu 5:3) Yehovha u hi dyondzisa ndlela leyinene ngopfu yo hanya ha yona. Yesu u te: “Va tsaka lava twaka rito ra Xikwembu va tlhela va ri hlayisa!”—Luka 11:28; Esaya 11:9.

Leswaku u kuma rungula leri engetelekeke, vona ndzima yo sungula ya buku leyi nge Xana Bibele Yi Dyondzisa Yini Hakunene? *

[Nhlamuselo ya le hansi]

[Xifaniso eka tluka 16]

“Ndzi va tivise vito ra wena.”—Yohane 17:26.

[Swifaniso eka tluka 16, 17]

Hi nga dyondza hi Yehovha eka swilo leswi a swi tumbuluxeke ni le Bibeleni