Swivutiso Swa Vahlayi

Xana Xikwembu Xa Swi Pfumelela Ku Teka Tshengwe?

Nikatsongo; nawu lowu Xikwembu xi wu vekeleke mpatswa wo sungula aEdeni a wu ri wa ku teka nsati un’we, ku nga ri tshengwe. Endzhakunyana Yesu Kreste u tlhele a tiyisekisa nawu wolowo eka valandzeri vakwe.—Genesa 2:18-24; Matewu 19:4-6.

Xana vavanuna vo fana na Abrahama, Yakobe, Davhida na Solomoni lava hanyeke eminkarhini leyi Vukreste a byi nga si va kona a va nga tekanga tshengwe? A va teke tshengwe, kambe, xana Bibele yi ri hlamusela njhani lunghiselelo rolero? Yi hlamusela leswaku ku tikeriwa loku ndyangu wa Abrahama ni wa Yakobe yi veke na kona hi kona loku endleke leswaku va teka tshengwe. (Genesa 16:1-4; 29:18–30:24) Endzhakunyana, Nawu wa Xikwembu a wu katsa xileriso lexi, lexi nyikiweke hosi yin’wana ni yin’wana, lexi nge: “A nga tiandziseli vavasati, leswaku mbilu yakwe yi nga hambuki.” (Deteronoma 17:15, 17) Solomoni u honise xileriso xexo hi ku teka vavasati vo tlula 700! Khombo ra kona, mbilu ya Solomoni yi hambukile eka Yehovha hikwalaho ka nkucetelo wo biha wa vasati vakwe vo tala. (1 Tihosi 11:1-4) Swi le rivaleni leswaku Bibele yi sola ku teka tshengwe.

Hambiswiritano, van’wana va nga ha tivutisa leswaku, ha yini Xikwembu xi pfumelele vanhu va xona ku teka tshengwe? Ehleketa hi mhaka leyi: Xana u tshame u tiyiselela ku tirhisa fanichara yo karhi swa xinkarhana hambiloko yi lava ku cinciwa, kumbexana hikwalaho ko ehleketa leswaku a swi nge vi swinene ku yi cukumeta hi nkarhi wolowo? Ina, tindlela ta Xikwembu swin’we ni mianakanyo ya xona swi tlakuke ku tlula swa hina. (Esaya 55:8, 9) Kambe hi nga twisisa swivangelo swin’wana leswi twisisekaka leswi endleke leswaku xi swi pfumelela ku ringana nkarhi wo karhi ku teka tshengwe.

Tsundzuka leswaku aEdeni, Yehovha u tshembise “mbewu” leyi eku heteleleni a yi ta lovisa Sathana. Endzhakunyana, Abrahama u byeriwe leswaku a a ta va tata wa tiko lerikulu naswona Mbewu leyi a ku profetiwe ha yona a yi ta huma erixakeni rakwe. (Genesa 3:15; 22:18) Sathana a a tiyimisele ku sivela Mbewu yoleyo leswaku yi nga fiki. A a tiyimisele ku endla hinkwaswo leswi nga ematimbeni yakwe leswaku a herisa tiko rolero ra khale ra Israyele. U dyohise Vaisrayele leswaku tiko rolero ri nga ha tsakeriwi hi Xikwembu naswona xi nga ha ri sirheleli.

Leswaku Yehovha a sirhelela Vaisrayele eka mintlhamu ya Sathana, u rhumele vaprofeta hi ku phindha-phindha leswaku va lemukisa vanhu vakwe loko va sungula ku hambuka eka milawu yo lulama. Hambiswiritano, u swi tive ka ha ri emahlweni leswaku vanhu vakwe hakanyingi a va nga ta yi yingisa hambi ku ri milawu ya xisekelo, yo fana ni ku fularhela ku gandzela swifaniso swa hava. (Eksoda 32:9) Loko va tsandzeka ku yingisa nawu wolowo, xana a va ta swi kotisa ku yini ku yingisa nawu lowu lwisanaka ni ku teka tshengwe? Leswi Yehovha a ma tivaka kahle mahanyelo ya vanhu, u vone wu nga si fika nkarhi wo yirisa xiendlo xexo, lexi se a ku ri khale xi simekiwile emasikwini wolawo. Loko a a lo sivela ku teka tshengwe hi nkarhi wolowo, Sathana a swi ta va swi n’wi oloverile ku kanganyisa Vaisrayele leswaku va endla xidyoho.

Ku va Xikwembu xi swi pfumelerile swa nkarhinyana ku teka tshengwe swi pfunile hi ndlela yin’wana. Swi pfune leswaku tiko ri kula hi ku hatlisa. Nakambe ku va tiko ri ve ni vaaki lava engetelekeke swi tiyisekise leswaku a ri ta pona kukondza ku fika Mesiya. Swi nga ha endleka leswaku ku teka tshengwe swi tlhele swi sirhelela vavasati van’wana, leswaku va laveriwa vutumbelo ni ndyangu eminkarhini ya khombo.

Kambe tsundzuka leswaku Yehovha a hi yena loyi a sunguleke xiendlo lexi. U xi pfumelele ku ringana nkarhi wo karhi, tanihi leswi a xi sivela leswaku vavasati va nga khomiwi hi ndlela yo biha. (Eksoda 21:10, 11; Deteronoma 21:15-17) Loko Yehovha a hlawula ku herisa xiendlo xa ku teka tshengwe exikarhi ka vagandzeri vakwe, u tirhise N’wana wakwe leswaku a tlhela a tiyisekisa nawu wa vukati lowu vekiweke aEdeni. Xisweswo Yesu u sivele ku teka tshengwe exikarhi ka valandzeri vakwe. (Marka 10:8) Kutani, ntiyiso lowu wu ve erivaleni: Nawu wa Muxe a wu lulamile hi nkarhi wa wona, kambe “nawu wa Kreste” wu tlakukile.—Vagalatiya 6:2.