Yesu u te: “Mina na Tatana hi un’we.” (Yohane 10:30) Van’wana va tshaha ndzimana leyi leswaku va tiyisekisa leswaku Yesu ni Tata wakwe i swiphemu swimbirhi leswi vumbaka Xikwembu xa vunharhu-un’we. Xana sweswo hi leswi Yesu a a vula swona hi marito lawa?

A hi languteni mongo wa tsalwa leri. Eka ndzimana 25, Yesu u vule leswaku mintirho leyi a yi endleke u yi endle hi vito ra Tata wakwe. Ku sukela eka ndzimana 27 ku ya eka 29 u vulavule hi tinyimpfu to fanekisela leti Tata wakwe a n’wi nyikeke tona. Vayingiseri vakwe a va nga ta ti twisisa timhaka toleto timbirhi leti Yesu a ti vuleke loko ku ri hileswaku yena ni Tata wakwe a va ri munhu un’we. Ematshan’weni ya sweswo Yesu u te: ‘Mina na Tatana hi ni vuxaka lebyikulu lerova a nga kona a nga ndzi tekelaka tinyimpfu tanihi hi leswi a nga riki kona loyi a nga tekelaka Tatana tinyimpfu.’ Swi fana ni loko n’wana a byela nala wa tata wakwe leswaku, ‘Loko u hlasela tata wa mina swi fana ni loko u hlasela mina.’ A nga kona loyi a nga ehleketaka leswaku n’wana loyi ni tata wakwe i munhu un’we. Kambe hinkwavo va byi vona vuxaka lebyi tiyeke lebyi va nga na byona.

Yesu ni Tata wakwe Yehovha Xikwembu na vona i “un’we” hi ndlela ya leswaku va pfumelelana hilaha ku heleleke eka swikongomelo ni ndlela leyi va endlaka swilo ha yona. Ku hambana na Sathana Diyavulosi ni mpatswa wo sungula Adamu na Evha, Yesu a nga kalanga a lava ku tiendlela swilo handle ko kongomisiwa hi Xikwembu. Yesu u te: “N’wana a nge endli xilo ni xin’we hi ku tisungulela, kambe u endla ntsena lexi a vonaka Tatana a xi endla. Hikuva swilo hinkwaswo leswi Yena a swi endlaka, N’wana na yena wa swi endla swilo sweswo hi mukhuva lowu fanaka.”—Yohane 5:19; 14:10; 17:8.

Hambiswiritano, vuxaka lebyi tiyeke lebyi va nga na byona a byi endli leswaku Xikwembu ni N’wana wa xona Yesu va nga hambaniseki. I vanhu vambirhi lava hambaneke. Havumbirhi bya vona va ni vumunhu lebyi nga faniki. Yesu ku ni ndlela leyi a ti twaka ha yona, miehleketo yakwe n’wini, mintokoto yakwe n’wini ni ntshunxeko wa ku tihlawulela. Hambiswiritano, u hlawule ku endla ku rhandza ka Tata wakwe ku nga ri ku endla ku rhandza ka yena n’wini. Hi ku ya hi Luka 22:42, Yesu u te: “Ku nga endleki ku rhandza ka mina, kambe a ku endleke ka wena.” Marito wolawo a ma nga ta twala loko Yesu a a nga ri na vuswikoti byo endla swiboho leswi hambaneke ni swa Tata wakwe. Loko Yesu ni Tata wakwe a a va ri munhu un’we, ha yini Yesu a khongele eka Xikwembu naswona hi ku titsongahata a pfumerile leswaku a nga swi tivi swilo leswi tiviwaka hi Tata wakwe?—Matewu 24:36.

Swirho swa vukhongeri byo tala swi gandzela swikwembu leswi kombisiwaka swi ri karhi swi holova ni ku lwa ni swirho swa mindyangu ya swona. Hi xikombiso, eka mintsheketo ya Magriki, Cronus u hlule tata wakwe Uranus a tlhela a dya vana vakwe. Leswi swi hambane swinene ni vun’we lebyi sekeriweke eka rirhandzu ra ntiyiso leri nga kona exikarhi ka Yehovha Xikwembu ni N’wana wakwe, Yesu! Naswona vun’we lebyi hi byi vonaka exikarhi ka vona byi endla leswaku hi va rhandza swinene! Kahle-kahle hi ni lunghelo leri nga pimanisiwiki na nchumu ro va ni vun’we ni Vanhu lava vambirhi lava tlakukeke swinene evuakweni hinkwabyo. Malunghana ni vadyondzisiwa vakwe, Yesu u khongele a ku: “Ndzi [kombela] . . . leswaku hinkwavo va va un’we, tanihi leswi wena, Tatana, u nga ni vun’we na mina ni leswi na mina ndzi nga ni vun’we na wena, leswaku na vona va va ni vun’we na hina.”—Yohane 17:20, 21.

Xisweswo, loko Yesu a ku, “Mina na Tatana hi un’we,” a a nga vulavuli hi Vunharhu-un’we, kambe a a vulavula hi vun’we lebyi tsakisaka ku nga vuxaka lebyikulu lebyi nga kona exikarhi ka vanhu vambirhi.