Bibele yi vulavula hi swivangelo swimbirhi. Xo sungula, hambileswi vanhu va endleke swilo swo hlamarisa, a va vumbiwanga va ri ni vuswikoti byo tikongomisa. Xa vumbirhi, makungu ya vanhu a ma humeleli hikuva “misava hinkwayo yi le hansi ka matimba ya lowo homboloka,” ku nga Sathana Diyavulosi. Xisweswo, matshalatshala ya vanhu a ma swi koti ku tisa ku rhula emisaveni.—Hlaya Yeremiya 10:23; 1 Yohane 5:19.

Vutianakanyi bya munhu ni ku navela kakwe swi tlhele swi endla leswaku misava yi pfumala ku rhula. I hulumendhe ya misava hinkwayo ntsena leyi nga kotaka ku dyondzisa vanhu leswinene, ku khathalela van’wana ni ku tisa ku rhula emisaveni.—Hlaya Esaya 32:17; 48:18, 22.

Xikwembu xa Matimba Hinkwawo xi tshembise leswaku xi ta simeka hulumendhe yin’we leyi nga ta fuma vanhu hinkwavo. Yi ta siva mimfumo hinkwayo ya vanhu. (Daniyele 2:44) N’wana wa Xikwembu, ku nga Yesu, u ta fuma tanihi Hosana Ya Ku Rhula. U ta herisa vuhomboloki emisaveni hinkwayo naswona u ta dyondzisa vanhu ndlela ya ku rhula.—Hlaya Esaya 9:6, 7; 11:4, 9.

Ni sweswi, ehansi ka nkongomiso wa Yesu, vanhu va timiliyoni emisaveni hinkwayo va le ku tirhiseni ka Rito ra Xikwembu, ku nga Bibele, leswaku va dyondzisa vanhu ndlela yo va ni ku rhula ni vanhu van’wana. Ku nga ri khale, ku ta va ni ku rhula emisaveni.—Hlaya Esaya 2:3, 4; 54:13.