Xana Yehovha wa swi tlangela leswi vagandzeri vakwe va swi endlaka leswaku va ringeta ku n’wi tsakisa? Van’wana va nga ha ku e-e, va vula leswaku Xikwembu a xi na mhaka na hina. Kambe vonelo rolero ri onha Xikwembu vito. Rito ra xona, ku nga Bibele, ri veka mhaka erivaleni. Ri hi tiyisekisa leswaku Yehovha u tlangela matshalatshala ya vagandzeri vakwe lava tshembekaka. Xiya marito ya muapostola Pawulo lama kumekaka eka Vaheveru 11:6.

Swi katsa yini ku tsakisa Yehovha? Pawulo u tsale a ku: “Handle ka ripfumelo a swi koteki ku xi tsakisa kahle [Xikwembu].” Xiya leswaku Pawulo a nga vuli swona leswaku swa tika ku tsakisa Xikwembu handle ka ripfumelo. Ematshan’weni ya sweswo, muapostola u vula leswaku a swi koteki ku endla tano. Hi marito man’wana, ripfumelo ri hi pfuna leswaku hi tsakisa Xikwembu.

Xana Yehovha u tsakisiwa hi ripfumelo ra muxaka muni? Ripfumelo ra hina eka Xikwembu ri fanele ri katsa swilo swimbirhi. Xo sungula hi ‘fanele hi kholwa leswaku xi kona.’ Hi nga xi tsakisa njhani Xikwembu loko hi kanakana leswaku xi kona? Hambiswiritano, ripfumelo ra xiviri ri katsa leswi engetelekeke, hikuva hambi ku ri madimona ma kholwa leswaku Yehovha u kona. (Yakobo 2:19) Ripfumelo ra hina ra leswaku Xikwembu i xa xiviri ri fanele ri hi susumetela ku teka goza, hi kombisa ripfumelo ra hina hi ku hanya hi ndlela leyi xi tsakisaka.—Yakobo 2:20, 26.

Xa vumbirhi hi ‘fanele hi kholwa leswaku’ Xikwembu i “muhakeri.” Munhu loyi a nga ni ripfumelo ra ntiyiso wa khorwiseka hi ku helela leswaku matshalatshala yakwe yo hanya hi ndlela leyi tsakisaka Xikwembu a ma nge vi ya hava. (1 Vakorinto 15:58) Hi nga n’wi tsakisa njhani Yehovha loko hi kanakana vuswikoti byakwe kumbe ku navela kakwe ka ku hi katekisa? (Yakobo 1:17; 1 Petro 5:7) Munhu loyi a gimetaka hileswaku Xikwembu a xi khathali, a xi nkhensi naswona a xi na malwandla a nga xi tivi Xikwembu xa le Bibeleni.

Xana Yehovha u katekisa vamani? Pawulo u ri: “Lava va xi lavaka hi mbilu hinkwayo.” Buku ya tinhlamuselo ya vahundzuluxeri va Bibele yi vula leswaku xiga xa Xigriki lexi hundzuluxeriweke xi ku “lava va xi lavaka hi mbilu hinkwayo” xi vula ku endla matshalatshala yo gandzela Xikwembu ku nga ri ku ringeta ku xi lavisisa kumbe ku dyondza ha xona. Buku yin’wana ya tinhlamuselo ta Bibele yi hlamusela riendli leri ra Xigriki tanihi ku endla matshalatshala lamakulu. I ntiyiso leswaku Yehovha u katekisa lava ripfumelo ra vona ri va susumetelaka ku n’wi gandzela hi rirhandzu leri humaka embilwini ni hi ku hiseka.—Matewu 22:37.

Xana Yehovha u va katekisa njhani vagandzeri vakwe vo tshembeka? U va tshembise vutomi lebyi nga heriki eParadeyisini laha misaveni, ku nga xiendlo lexi kombisaka malwandla ni rirhandzu rakwe. (Nhlavutelo 21:3, 4) Hambi ku ri sweswi, lava va n’wi lavaka hi timbilu ta vona hinkwato va kuma mikateko yo tala. Hi ku pfuniwa hi moya wakwe lowo kwetsima ni vutlhari lebyi kumekaka eRitweni rakwe va tiphina hi vutomi lebyi vuyerisaka ni lebyi enerisaka.—Pisalema 144:15; Matewu 5:3.

I ntiyiso leswaku Yehovha i Xikwembu lexi tlangelaka ntirho lowu malandza ya xona lama tinyiketeleke ma wu endlaka hi ku tshembeka. Xana ku tiva sweswo swi ku susumetela leswaku u lava ku tshinela eka yena? Loko swi ri tano, ha yini u nga dyondzi leswi engetelekeke malunghana ni ndlela leyi u nga hlakulelaka ni ku kombisa ripfumelo leri Yehovha a nga ta ku katekisa hikwalaho ka rona?