Rifu i nchumu lowu tikaka ku bula ha wona. Vanhu vo tala va hlawula ku ka va nga vulavuli ha rona. Kambe eku heteleleni hi ta fa. Ndzhombo wa rifu wa vava swinene.

Ku hava nchumu lowu nga hi endlaka hi swi lunghekela hi ku helela ku feriwa hi mutswari, munghana wa vukati kumbe n’wana. Hi nga ha weriwa hi khombo hi nga swi langutelanga kumbe ri va leri hi humelelaka ku ringana nkarhi wo leha. Ku nga khathariseki xivangelo xa kona, a hi nge ku balekeli ku vava loku vangiwaka hi rifu naswona makumu ya kona ya tsema nhlana.

Antonio, loyi a ha ku feriwaka hi tata wakwe eka mhangu ya le gondzweni u ri: “Swi fana ni loko munhu a lotlela yindlu ya wena kutani a famba ni swilotlelo. A wu nge swi koti ku tlhelela ekaya, hambi ku ri swa xinkarhana. Lexi u nga sala na xona ntsena i ku ehleketa leswaku a wu ri na yindlu. Loko mati ma halakile ma halakile. Hambiloko u nga lavi ku swi amukela—tanihi leswi swi vonakaka swi nga ri swinene—a ku na lexi u nga xi endlaka.”

Loko a langutane ni xiyimo lexi fanaka, Dorothy, loyi a veke noni loko a ha ri na malembe ya 47, a a tiyimisele ku kuma tinhlamulo ta swivutiso swo karhi. Tanihi leswi a ri mudyondzisi wa xikolo xa Sonto, a a nga si tshama a teka rifu tanihi makumu ya swilo hinkwaswo. Kambe a a nga swi tivi leswi a swi endleka endzhaku ka rifu. U vutise mufundhisi wakwe wa kereke ya Anglican a ku: “Ku humelela yini hi hina loko hi fa?” U hlamule a ku: “A nga kona loyi a swi tivaka. Hi ta rindza hi vona leswaku ku ta endleka yini.”

Xana hi fanele hi “rindza hi vona leswaku ku ta endleka yini”? Xana yi kona ndlela yin’wana leyi hi nga swi tivaka ha yona loko rifu ku ri makumu ya swilo hinkwaswo?