Ndzi kulele endhawini leyi a ku nga ri na ntsako leyi a yi ri edorobeni ra Montreal. Loko ndzi ri ni tin’hweti ta tsevu, tata wa mina u file naswona swi endle leswaku manana a sala a langutela hinkwaswo ekaya. Hi mina a ndzi ri lontsongo eka vana va nhungu.

Loko ndzi ri karhi ndzi kula, a ndzi dzaha swidzidziharisi, ndzi gembula, ndzi rhandza madzolonga ndzi tlhela ndzi va ni vanghana lava nga swigevenga. Loko ndzi ri ni malembe ya khume, ndzi sungule ku tirhisana ni tinghwavava ni vamachonisa. A ndzi tshamela ku hemba naswona a ndzi tsakisiwa hi ku xanisa vanhu hi tindlela to vava. Swoleswo a swi ndzi nyanyula swinene.

Loko ndzi ri ni malembe ya 14, a ndzi famba emahlweni hi ku kanganyisa vanhu. Hi xikombiso, a ndzi xava tiwachi, swilo swa le mavokweni, swingwavila ivi ndzi ti tsalela mfungho lowu kombisaka leswaku swa durha kutani ndzi swi xavisa exitarateni, laha ku pakiwaka timovha eswitolo. A swi ndzi tsakisa ku endla mali hi ndlela leyi yo olova. Siku rin’wana ndzi endle mali leyi ringanaka 10 000 wa tidolara.

Endzhaku ka loko ndzi hlongoriwile exikolweni lexi dyondzisaka vana mahanyelo lamanene ndzi ri ni malembe ya 15, a ndzi nga ha ri na ndhawu yo tumbeta nhloko. A ndzi etlela endleni, etiphakeni kumbe emakaya ya vanghana va mina.

Leswi a ndzi hanya vutomi bya vukanganyisi, maphorisa a ma tshamela ku ndzi karhata. Kambe leswi se a ndzi nga ha xavisi swilo swo yiviwa, a ma nga ha ndzi khomi. Hambiswiritano, a ndzi hakela mali hikwalaho ka vukanganyisi lebyi a ndzi byi endla, ku xavisa swilo leswi nga riki swinene ni ku xavisa handle ka mpfumelelo. Leswi a ndzi ri ni xivindzi, hi mina a ndzi londza mali ya vamachonisa eka lava lombeke. Sweswo a swi ri ni khombo naswona minkarhi yin’wana a ndzi khoma xibamu. Minkarhi yin’wana a ndzi tirha ni ntlawa wa swigevenga.

Ndzi sungule ku twa timhaka ta Bibele loko ndzi ri ni malembe ya 17. Nhwanyana loyi a ndzi rhandzana na yena, u sungule ku dyondza Bibele ni Timbhoni ta Yehovha. Kambe a ndzi nga pfumelelani ni milawu ya le Bibeleni emhakeni ya mahanyelo,  hiloko ndzi n’wi siya ivi ndzi ya tshama ni un’wana loyi na yena a hi rhandzana.

Swilo swi cincile loko nhwanyana wa vumbirhi na yena a sungula ku dyondza Bibele ni Timbhoni. Vutomi bya yena byi cincile naswona sweswo swi ndzi tsakisile hikuva a a ri ni ku rhula a tlhela a lehisa mbilu. Ndzi pfumerile loko ndzi rhambiwile leswaku ndzi ya eHolweni ya Mfumo ya Timbhoni ta Yehovha. Ndzi amukeriwe hi vanhu lava xiximekaka va tlhela va va ni musa. A va hambane swinene ni vanhu lava a ndzi hanya na vona. A ndzi si tshama ndzi titwa ndzi rhandziwa ni ku kombiwa musa ekaya. Kambe rirhandzu leri ndzi ri kumeke eka Timbhoni ta Yehovha hi rona leri a ndzi ri lava. Loko Timbhoni ti kombela ku dyondza na mina Bibele, ndzi pfumele hi ntsako.

Leswi ndzi swi dyondzeke eBibeleni swi ponise vutomi bya mina. A ndzi kunguhate ku ya yiva ni vanghana va mina vambirhi leswaku ndzi kuma mali ya ku hakela swikweleti leswi tlulaka 50 000 wa tidolara. Kambe ndzi tsakile hikuva a ndza ha yanga emahlweni. Vanghana va mina va yile eku yiveni. Un’wana u khomiwile kasi lowun’wana u dlayiwile.

Loko ndzi ya emahlweni ndzi dyondza Bibele, ndzi swi xiyile leswaku swi lava ndzi hundzuka hakunene. Hi xikombiso, loko ndzi dyondza leswi Bibele yi swi vulaka eka 1 Vakorinto 6:10 leyi nge: ‘Makhamba, vanhu va makwanga, swidakwa, varhuketeri kumbe vadyeleri, va nga ka va nga yi dyi ndzhaka ya Mfumo wa Xikwembu.’ Loko ndzi hlaye ndzimana leyi, ndzi xiririke mihloti. Ndzi swi xiyile leswaku ndzi fanele ndzi cinca mahanyelo ya mina hi ku helela. (Varhoma 12:2) A ndzi rhandza madzolonga naswona a ndzi hanya hi mavunwa.

Nakambe ndzi dyondzile eBibeleni leswaku Yehovha u ni tintswalo naswona wa rivalela. (Esaya 1:18) Ndzi khongerile hi mbilu hinkwayo ndzi kombela Yehovha leswaku a ndzi pfuna ndzi tshika mikhuva ni mahanyelo ya mina. Hikwalaho ka mpfuno wa yena, ndzi swi kotile ku tshika mahanyelo ya mina yo biha hakatsongotsongo. Goza ro sungula i ku va mina ni loyi a ndzi rhandzana na yena hi tekana ximfumo.

Loko ndzi ri ni malembe ya 24 a ndzi tekile ndzi ri ni vana vanharhu. Hi nkarhi wolowo ndzi boheke ku kuma ntirho lowunene. Kambe a ndzi nga hetanga xikolo naswona a ndzi nga tivi munhu loyi a a ta byela vathori leswaku ndzi munhu wa njhani. Ndzi tlhele ndzi kombela mpfuno eka Yehovha ivi ndzi sungula ku ya lava ntirho. A ndzi byela vathori leswaku ndzi lava ku cinca vutomi bya mina naswona ndzi ta tirha hi ku tshembeka. Minkarhi yin’wana a ndzi va byela leswaku ndzi dyondza Bibele naswona ndzi navela ku va muakatiko lonene. Vathori vo tala a va nga ndzi tholi. Eku heteleleni, ndzi hlamusele swiphiqo swa mina hi ku kongoma eka muthori un’wana naswona loko hi ri karhi hi vulavula, u te: “A ndzi tivi leswaku ha yini ndzi titwa hi ndlela leyi kambe mbilu ya mina yi ndzi byela leswaku ndzi ku thola.” Hakunene leyi a ku ri nhlamulo ya xikhongelo xa mina. Hi ku famba ka nkarhi, mina ni nsati wa mina hi khuvuriwile hi va Timbhoni ta Yehovha.

Namuntlha ndzi hanya vutomi byo antswa hileswi ndzi hanyaka hi milawu ya Bibele naswona ndzi hanya tanihi Mukreste. Ndzi ni ndyangu lowu tsakeke. Ndza tiyiseka leswaku Yehovha u ndzi rivalerile naswona ndzi ni ripfalo leri baseke.

Ndzi ni malembe ya 14 ndzi ri karhi ndzi chumayela nkarhi hinkwawo ndzi dyondzisa vanhu Bibele, ndzi va pfuna leswaku va tiva leswi Bibele yi swi dyondzisaka naswona nsati wa mina na yena u heta nkarhi wo tala a ri karhi a dyondzisa vanhu Bibele. Emalembeni ya 30 lama hundzeke, ndzi tsakisiwe hi ku pfuna vanhu va 22 lava ndzi tirhaka na vona leswaku na vona va gandzela Yehovha. Ni sweswi ndza ha ya eswitolo kambe a ndza ha yeli ku ya kanganyisa vanhu hilaha a ndzi endla hakona. Sweswi loko ndzi ya kona, ndzi burisana ni vanhu hi Bibele. Ndzi yela ku va nyika nchumu wa nkoka: ntshembo wa ku hanya emisaveni leyintshwa laha ku nga ta va ku nga ha ri na vakanganyisi.—Pisalema 37:10, 11.