U nga ha lava ku cinca swilo hinkwaswo evuton’wini bya wena hi ku tsopeta ka tihlo. U nga ha ti byela u ku, ‘Vhiki leri ndzi lava ku tshika ku dzaha, ku rhuketela, ndzi lava ku hatla ndzi etlela, ndzi lava ku ndzi sungula ku endla vutiolori, ndzi lava ku sungula ku dya swakudya leswi nga ni rihanyo naswona ndzi lava ku sungula ku fonela va kokwana.’ Kambe tsundzuka leswaku n’hwarhimbiri yin’we yi tshwa nkanga!

Munhu la titsongahataka u ni langutelo lerinene. Wa swi xiya leswaku u ni mpimo wo karhi wa matimba, nkarhi ni switirhisiwa. Ematshan’weni yo ringeta ku cinca swilo hi nkarhi wun’we u ringeta ku antswisa hakantsongontsongo.

Ringeta ku titoloveta kumbe ku tshika mukhuva wun’we kumbe yimbirhi hi nkarhi wun’we. Magoza lama landzelaka ma nga ku pfuna:

1. Xaxameta mikhuva leyinene leyi u lavaka ku yi tolovela ni mikhuva yo biha leyi u lavaka ku yi tshika. Xaxameta yo tala hilaha u nga kotaka ha kona.

2. Rhanga hi mikhuva leyi u yi tekaka yi ri ya nkoka swinene.

3. Eka nxaxamelo wa wena hlawula mikhuva yi nga ri yingani, ku nga ha va wun’we kumbe yimbirhi, u ti toloveta yona ku kondza u yi tolovela. Endzhaku tlhela u hlawula yin’wana yimbirhi eka nxaxamelo wa wena.

Sungula hi ku siva mikhuva yo biha hi leyinene. Hi xikombiso, loko eka mikhuva yo biha u xaxamete ni ku hlalela ngopfu TV, kasi eka mikhuva leyinene u xaxamete ni ku antswisa vuxaka bya wena ni vanhu lava u va rhandzaka, u nga ha tiyimisela ku endla leswi: ‘Ematshan’weni yo namba ndzi pfulela TV loko ndzi vuya entirhweni, ndzi ta fonela munghana kumbe xaka ra mina.’