SWIPHAMBATI swa tihumba swi pfuna tihumba leswaku ti kota ku hanya etindhawini leti swi tikaka ku hanya eka tona elwandle. Vuswikoti lebyi bya xiphambati xa humba lexi yi sirhelelaka byi endle leswaku vanjhiniyara va dyondza hi swivumbeko swa tihumba leswaku va endla timovha ni miako leyi kotaka ku sirhelela vanhu.

Xiya: Vanjhiniyara va kambisise mixaka yimbirhi ya tihumba, yo sungula i ya xivumbeko xa xirhendzevutana kasi ya vumbirhi i ya xivumbeko xa xipikiri.

Ku kumeke leswaku loko humba ya xivumbeko xa xirhendzevutana yi tshikileriwa hi nchumu wo karhi yi yisa ku tshikileriwa koloko emakumu ka xiphambati xa yona. Hilaha ku fanaka, humba leyi nga ni xivumbeko xa xipikiri na yona yi yisa ntshikilelo exikarhi ni le makumu ka xiphambati xa yona. Eka mindzavisiso yoleyo, ku kumeke leswaku loko tihumba ha timbirhi ti tshikileriwa hi nchumu wo karhi ti yisa ntshikilelo wolowo eswiphen’wini leswi tiyeke swa swiphambati swa tona, leswi endlaka leswaku yi nga vaviseki ngopfu.

Valavisisi va teke swiphambati swa tihumba ta ntumbuluko ni leswi va swi endleke leswaku va swi kambela. Ku kumeke leswaku swiphambati swa tihumba ta ntumbuluko swi tiye ngopfu ku tlula swiphambati leswi va swi endleke.

Loko wu vulavula hi ndzavisiso lowu, Magazini wa Scientific American wu ri: “Loko siku rin’wana wo tikuma u chayela movha lowu nga ni xivumbeko xo fana ni xiphambati xa humba, wu ta va wu sasekile naswona wu ta va wu endleriwe ku sirhelela vanhu lava nga le ndzeni ka wona.”

U anakanya yini: Xana swivumbeko swa swiphambati swa tihumba ta le lwandle swi lo tiendlekela kumbe swi lo endliwa?