Hambileswi yi nga riki buku ya swa vutshunguri, Bibele yi hi nyika switsundzuxo leswi pfunaka swi tlhela swi hi vuyerisa. Switsundzuxo leswi swi nga pfuna munhu loyi a karhatiwaka hi ntshikilelo wa mianakanyo. Xiya swikombiso swin’wana.

“Vanhu lava hanyeke kahle a va lavi dokodela, kambe u laviwa hi lava vabyaka.”—MATEWU 9:12.

Bibele ya pfumela leswaku swi nga ha lava hi kuma pfuna wa swa vutshunguri. Vanhu vo tala lava nga ni vuvabyi bya ntshikilelo wa miehleketo va pfuniwe hi ku dyondza hi timhaka leti nga ntiyiso mayelana ni xiphiqo xa vona ni ku tihlanganisa ni dokodela.

“Ku endla vutiolori swa pfuna.” —1 TIMOTIYA 4:8.

Ku endla swilo leswi nga ta endla leswaku u va ni rihanyo lerinene emirini, swi nga ku pfuna leswaku u va ni miehleketo leyi hanyeke kahle. Swilo sweswo swi katsa ku endla vutiolori nkarhi na nkarhi, ku dya swakudya leswi nga ni rihanyo ni ku etlela nkarhi lowu ringaneke.

“Mbilu leyi tsakeke i murhi lowunene, kambe moya lowu tshovekeke wu heta munhu matimba.”—SWIVURISO 17:22.

Ku hlaya tindzimana ta le Bibeleni leti khutazaka ni ku tivekela xikongomelo xo karhi lexi u lavaka ku xi fikelela swi nga ku pfuna leswaku u tsaka. Loko u tshamela ku ehleketa hi swilo leswinene evuton’wini ni ku tshemba leswaku enkarhini lowu taka  swilo swi ta lungha, sweswo swi ta ku pfuna leswaku u tiyisela swiphiqo swa ntshikilelo wa mianakanyo.

“Va tlharihile lava titsongahataka.” —SWIVURISO 11:2.

Swi nga ha endleka u nga koti ku endla swilo hinkwaswo leswi u swi lavaka, hikwalaho amukela ku pfuniwa hi van’wana. Vanghana ni vandyangu va nga ha lava ku ku pfuna kambe va nga tivi ku va ta ku pfuna njhani. Va tivise leswi u tsakelaka leswaku va ku pfuna hi swona. U nga languteli leswaku va ku endlela swilo swo tala kambe mikarhi hinkwayo nkhensa leswi va kotaka ku ku endlela swona.

“Ndzi xiye leswaku ku na leswi a swi nga fambi kahle hi mina, hikwalaho ndzi ye eka dokodela. U kote ku vona leswi a swi ndzi karhata. Sweswo swi ndzi pfune leswaku ndzi amukela xiyimo xa mina naswona ndzi koke ku dyondza hi vutshunguri lebyi a byi kumeka lebyi a byi ta ndzi pfuna ndzi khathalela rihanyo ra mina.”—Nicole, a loyi a xanisiwaka hi vuvabyi bya swipfukela.

“Ndzi xiye leswaku ku hlaya Bibele nkarhi na nkarhi ni nsati wa mina swa ndzi pfuna leswaku ndzi sungula siku rin’wana ni rin’wana ndzi ri karhi ndzi ehleketa kahle hi ndlela leyi akaka. Hakanyingi loko masiku man’wana swi pfa swi ndzi tikela ku tiyisela, ndzimana yo karhi ya le Bibeleni yi ta ndzi khutaza.”—Peter loyi a karhatiwaka hi ntshikilelo wa mianakanyo.

“A swi tika ku byela van’wana hi leswi a swi ndzi karhata hikuva a swi ndzi khomisa tingana. Kambe munghana wa mina lonkulu a ringeta ku twisisa ndlela leyi a ndzi titwa hayona naswona a rhiya ndleve loko ndzi tiphofula. U ndzi pfunile leswaku ndzi titwa ndzi antswa naswona ndzi titwa ndzi nga ri ndzexe.”—Ji-yoo loyi a nga ni xiphiqo loko swi ta eka ndlela leyi a dyaka hayona.

“Bibele yi ndzi pfunile leswaku ndzi ringanisela loko swi ta eka ntirho nileswaku ndzi etlela nkarhi lowu eneleke. Vutlhari lebyi nga eka yona byi ndzi pfunile leswaku ndzi kota ku langutana ni swiphiqo swa mintlhaveko leswi a swi tshamela ku ndzi karhata.”—Timothy loyi a langutaneke ni vuvabyi bya obsessive-compulsive disorder.