Ndzi kulele ePuerto Limón, ku nga doroba leri nga eribuweni ra le vuxeni bya Costa Rica. Vatswari va mina a va ri ni vana va nhungu naswona mina ndzi wa vunkombo. Tatana u fe loko ndzi ri ni malembe ya nhungu. Kutani hi sale hi hlayisiwa hi manana.

Baseball a yi ri engatini. Ndzi yi rhandze ku sukela loko ndza ha ri ntsongo. Loko se ndzi ri muntshwa ndzi joyine xipano lexitsongo xa baseball. Loko ndzi ri emalembeni ya va-20 naswona ndza ha tlangela xipano xolexo, ndzi komberiwe ku ya tlangela xipano lexikulu eNicaragua. A ndzi nga swi lavi ku ya eNicaragua, hikuva manana a a vabya hi nkarhi wolowo naswona a a ndzi n’wi khathalela. Kutani ndzi arile. Hi ku famba ka nkarhi ndzi tlhele ndzi komberiwa ku tlangela xipano xa tiko ra Costa Rica, lexi a xi ri ni vatlangi lava hlawuriweke eka swipano leswitsongo. Ndzi hetelele ndzi pfumerile. Ndzi tlangele xipano lexi ku sukela hi 1949 ku fikela hi 1952 naswona ndzi tlange mintlango yo hlaya eCuba, Mexico ni le Nicaragua. A ndzi ri musivi wa tibolo la nga ni vuswikoti naswona ndzi tlange mintlango ya 17 handle ko endla xihoxo. A ndzi tsaka ni swikunwana loko ntshungu wu huwelela vito ra mina loko hi ri eku tlangeni.

Khombo ra kona a ndzi hanya vutomi byo biha. Hambileswi a ndzi ri ni ntombhi yin’we, a ndzi nga tshembekanga eka yona. A ndzi byi kukutlela kunene byalwa. Siku rin’wana a ndzi dakwe ngopfu lerova loko ndzi pfuka nimixo, a ndzi nga ha swi tivi leswaku ndzi mukise ku yini! A ndzi gembula hi ku tlanga lotto ni mitlangu yin’wana.

Loko ndzi ri karhi ndzi hanya hi ndlela yoleyo, manana u ve Mbhoni ya Yehovha. U ringete ku ndzi chumayela kambe u tsandzekile ro sungula hileswi a ndzi godzomberiwe hi baseball. Loko ndzi ri eku praktiseni, ni ndlala a ndzi nga yi twi. Miehleketo ya mina a yi dzike ngopfu eka ntlango lowu. A ndzi rhandza baseball ku tlula hinkwaswo!

Hambiswiritano, loko ndzi ri ni malembe ya 29 ndzi vavisekile loko hi ri karhi hi tlanga hileswi a ndzi ringeta ku gava bolo. Endzhaku ka loko ndzi hlakarherile ndzi tshike ku tlangela tiko. Nilokoswiritano, a ndzi letela swipano leswitsongo swa baseball laha a ndzi tshama kona.

Hi 1957, ndzi pfumerile loko ndzi rhamberiwa ku ya enhlengeletanweni ya Timbhoni ta Yehovha, leyi a yi khomeriwe exitediyamu lexi ndzi tshameke ndzi tlangela eka xona baseball. Loko ndzi tshame kwalaho, ndzi xiye ku hambana lokukulu loku a ku ri kona exikarhi ka Timbhoni leti a ti tikhome kahle ni le ka vanhu lava a va nga lawuleki lava a va tele ku hlalela baseball. Leswi ndzi swi voneke enhlengeletanweni yoleyo swi ndzi susumetele ku dyondza Bibele ni Timbhoni ni ku ya eminhlanganweni ya tona.

Ndzi tsakisiwe hi swilo swo tala leswi a ndzi swi dyondza eBibeleni. Hi xikombiso, Yesu u vule leswaku emasikwini yo hetelela, vadyondzisiwa vakwe a va ta chumayela mahungu lamanene ya Mfumo wa Xikwembu emisaveni hinkwayo. (Matewu 24:14) Ndzi tlhele ndzi dyondza leswaku Vakreste va ntiyiso a va chumayeli hi xikongomelo xo kuma mali. Yesu u te: “Mi amukele mahala, nyikani mahala.”—Matewu 10:8.

Loko ndzi ri karhi ndzi dyondza Bibele, a ndzi xiya loko Timbhoni ta Yehovha ti endla leswi yi swi vulaka. A ndzi tsakisiwa hi matshalatshala lawa ti ma endlaka leswaku ti chumayela mahungu lamanene ya Mfumo wa Xikwembu emisaveni hinkwayo. Ndzi swi xiyile leswaku ti tikarhatela ku nyika hikuva Yesu u lerise leswaku Vakreste va fanele va endla tano. Loko ndzi vona xirhambo xa Yesu lexi nge, “[Tana] u va mulandzeri wa mina,” eka Marka 10:21, ndzi lave ku va Mbhoni.

Hambiswiritano, swi ndzi tekele nkarhi leswaku ndzi va Mbhoni. Hi xikombiso, vhiki ni vhiki a ndzi beja lotto hi nomboro ya mina ya “nkateko” ku ringana malembe yo tala. Hambiswiritano, eBibeleni ndzi dyondze leswaku Xikwembu xi venga vanhu lava gandzelaka “xikwembu xa Nkateko” ni va makwanga. (Esaya 65:11; Vakolosa 3:5) Kutani ndzi endle xiboho xo tshika ku gembula. Hi Sonto yo sungula loko ndzi tshike ku beja lotto, nomboro ya mina ya “nkateko” yi winile. Vanhu va ndzi hlekile hileswi ndzi nga tlangangiki vhiki rero naswona va ndzi sindzise leswaku ndzi tlhela ndzi beja, kambe ndzi arile. Ndzi nambe ndzi ku swi thya!

Tanihi leswi se a ndzi ambale “vumunhu lebyintshwa,” ndzi langutane ni ndzingo wun’wana hi siku leri ndzi khuvuriweke ha rona enhlengeletanweni ya Timbhoni ta Yehovha. (Vaefesa 4:24) Hi madyambu wolawo, loko ndzi tlhelela ehodela leyi a ndzi tshama eka yona ndzi kume khale ka ntombhi ya mina yi ndzi yimele enyangweni. Yi te: “Tshika sweswo Sammy, a hi tiphinenyana.” Kambe ndzi yi hlamule ndzi ku, “A ndzi swi lavi!” Ndzi yi tsundzuxe leswaku sweswi ndzi hanya hi milawu leyi baseke ya mahanyelo ya Bibele. (1 Vakorinto 6:18) Yi hlamule yi ku, “Yini?” Kutani yi ndzi byele leswaku a ndzi fanelanga ndzi yi landzelela ngopfu Bibele naswona yi ndzi sindzise leswaku hi tlhela hi rhandzana. Hambiswiritano, ndzi yi siye kwalaho ivi ndzi nghena ekamareni ndzi khiya. Namuntlha ndza tsaka ku vula leswaku ku sukela loko ndzi ve Mbhoni hi 1958, a ndza ha tlhelelanga eka mikhuva ya mina yo biha.

Ndzi nga heta siku hinkwaro ndzi ri karhi ndzi hlamusela mikateko leyi ndzi yi kumeke hikwalaho ko yingisa nkongomiso wa Bibele! Yin’wana ya yona hi leswi ndzi kumeke vanghana va ntiyiso, ndzi hanyaka vutomi lebyi nga ni xikongomelo ni leswi ndzi kumeke ntsako wa xiviri.

Ndza ha yi rhandza baseball, kambe sweswi ndzi rhangisa swilo swa nkoka. Loko ndza ha tlanga baseball ndzi kume ndhuma ni mali, kambe a swi tlhaveriwanga hi dyambu. Hambiswiritano, vuxaka bya mina ni Xikwembu ni lava ndzi xi gandzelaka na vona swi ta tshama hilaha ku nga heriki. Bibele yi ri: “Misava ya hundza ni ku navela ka yona, kambe loyi a endlaka ku rhandza ka Xikwembu u tshama hi masiku.” (1 Yohane 2:17) Sweswi ndzi rhandza Yehovha ni vanhu vakwe ku tlula hinkwaswo!