Timbhoni ta Yehovha ta le Rhaxiya ti sungule ku gandzela hi ku rhula endzhaku ka loko ti tsarisiwe ximfumo hi Rhaxiya hi 1992. Ti tlhele ti ya tsarisa hi 1999 ehansi ka Nawu wa ku Tirhisa Ripfalo hi ku Ntshunxeka ni ku Khoma Minhlangano ya Vukhongeri. Ku ni mintlawa yo tala ya Timbhoni ta Yehovha leyi tsarisiweke ximfumo etikweni hinkwaro.

Kambe Timbhoni ta Yehovha ti langutana ni swiphiqo leswi xungetaka ntshunxeko wa tona wa vukhongeri. Ku sukela hi 2009, maphorisa ma sungule ku endla kungu ro kota ku khoma Timbhoni hi ku tlula Nawu wa Swiendlo leswi Xungeteka Mfumo. Tihuvo ta le Rhaxiya ti vule leswaku minkandziyiso ya Timbhoni ta Yehovha ku katsa ni website ya tona leyi nga nawini ya jw.org—a hi swinene. Maphorisa ma seche miti yo tala ni tindhawu ta vugandzeri. Vachuchisi va hehle Timbhoni hi vukungundzwana ni vugevenga hikwalaho ka leswi ti khomaka minhlangano ya vukhongeri.

Hambileswi Huvo ya Matiko ya Yuropa ya Timfanelo ta Vanhu yi ringeteke ku vulavurisana ni valawuri va Rhaxiya, a va tikarhatanga hi ku herisa xihlawuhlawu ni ku xanisiwa ka Timbhoni ta Yehovha. Maphorisa ma ringeta hi matimba ku endlela leswaku ntirho wa Timbhoni ta Yehovha wu nga tshuki wu ya emahlweni.