Xikwembu a hi xona xi vangaka timhangu ta ntumbuluko namuntlha kambe xa khathala hi vanhu lava ti va weleke. Timhangu ta ntumbuluko hi tin’wana ta swilo leswi Mfumo wa Xikwembu wu nga ta swi herisa. Hi nkarhi lowu fanaka, Xikwembu xi chavelela hinkwavo lava weriweke hi timhangu teto.​—2 Vakorinto 1:3.

•  Hi nga tiyiseka njhani leswaku timhangu ta ntumbuluko a hi nxupulo lowu humaka eka Xikwembu?

•  Xana timhangu ta ntumbuluko i xikombiso xa leswaku hi hanya emikarhini ya makumu?

•  Xikwembu xi va pfuna njhani lava weriweke hi timhangu ta ntumbuluko?

•  Xana Bibele yi nga hi pfuna leswaku hi tshama hi lunghekele timhangu ta ntumbuluko?

•  Tindzimana ta Bibele leti nga chavelelaka lava weriweke hi timhangu ta ntumbuluko

 Timhangu ta ntumbuluko ta hambana ni ndlela leyi Xikwembu xi tirhisaka matimba ya ntumbuluko, hilaha swi tsariweke hakona eBibeleni.

•   Timhangu ta ntumbuluko ti wela un’wana na un’wana, ta dlaya ni ku onha swilo. Ku hambana ni sweswo, Swiendlo swa Xikwembu swa vuavanyisi leswi boxiweke eBibeleni a swi nga khumbi vanhu hinkwavo. Hi xikombiso, loko Xikwembu xi lovisa muti wa Sodoma na Gomora, xi ponise wanuna wo lulama Lota ni vana vakwe va vanhwanyana vambirhi. (Genesa 19:29, 30) Xikwembu xi hlaye mbilu ya un’wana na un’wana loyi a hanyeke hi nkarhi wolowo naswona xi lovise ntsena lava xi kumeke leswaku a va hombolokile.​—Genesa 18:23-​32; 1 Samuwele 16:7.

•   Hi ntolovelo timhangu ta ntumbuluko ti humelela hi nga ti langutelanga. Hi hala tlhelo, Xikwembu xi lemukise vanhu vo homboloka xi nga si tirhisa matimba ya ntumbuluko ku va lovisa. Vanhu lava yingiseke xilemukiso xexo va kote ku va ni njombo yo baleka.​—Genesa 7:​1-5; Matewu 24:38, 39.

•   Hi tindlela to karhi vanhu va ve ni xiave eka timhangu tin’wana ta ntumbuluko. Hi ndlela yihi? Hi ku thyakisa mbangu ni ku aka etindhawini leti ku talaka ku va ni ku tsekatseka ka misava, tindhambhi ni maxelo yo biha swinene. (Nhlavutelo 11:18) Xikwembu a xi fanelanga xi soriwa hikwalaho ka swiboho leswi vanhu va swi endlaka.​—Swivuriso 19:3.

 Ina, vuprofeta bya Bibele byi vula leswaku a ku ta va ni timhangu “emasikwini yo hetelela.” (Matewu 24:3; 2 Timotiya 3:1) Hi xikombiso, loko a vulavula hi le mikarhini ya hina Yesu u te: “Ku ta va ni ku kayivela ka swakudya ni ku tsekatseka ka misava etindhawini to hambanahambana.” (Matewu 24:7) Ku nga ri khale, Xikwembu xi ta herisa leswi hi vangelaka switlhavi, ku xaniseka, ku katsa ni timhangu ta ntumbuluko.​—Nhlavutelo 21:3, 4

•   Xikwembu xi chavelela lava weriweke hi timhangu ta ntumbuluko, hi ku tirhisa Rito ra xona ku nga Bibele. Bibele yi hi tiyisekisa leswaku Xikwembu xa khathala hi hina naswona xi twa ku vava loko hi xaniseka. (Esaya 63:9; 1 Petro 5:6, 7) Yi tlhela yi paluxa xitshembiso xa Xikwembu xa leswaku a ku nge he vi na timhangu ta ntumbuluko.​—Vona “ tindzimana ta Bibele leti nga chavelelaka lava weriweke hi timhangu ta ntumbuluko.”

•   Xikwembu xi pfuna lava weriweke hi timhangu hi ku tirhisa vagandzeri va xona. Xikwembu xi tirhisa vagandzeri va xona va laha misaveni leswaku va tekelela leswi Yesu a swi endleke. A swi profetiwile leswaku Yesu a ta chavelela “lava vavisekeke mbilu” ni “lava rilaka.” (Esaya 61:1, 2) Vagandzeri va Xikwembu va tikarhatela ku endla leswi fanaka.​—Yohane 13:15.

   Xikwembu xi tlhela xi tirhisa vagandzeri va xona leswaku va pfuna lava weriweke hi timhangu ta ntumbuluko hi leswi va swi lavaka.​—Mitirho 11:28-30; Vagalatiya 6:10.

 Ina, hambileswi Bibele ku nga riki buku yo hi lunghiselela timhangu kambe yi ni misinya ya milawu leyi nga hi pfunaka. Hi xikombiso:

•   Lulamela timhangu leti nga ha endlekaka. Bibele yi ri: “Lowo tlhariha u vona khombo kutani a tumbela.” (Swivuriso 22:3) Hi ta va hi tlharihile loko hi tilulamisela swiyimo swa xihatla swi nga si endleka. Ku tilulamisela koloko ku katsa ku va ni switirhisiwa swa xilamulela mhangu leswi hleriweke kahle naswona ku praktisa tanihi ndyangu laha mi nga ta hlangana kona loko ko tshuka ku va ni swiyimo sweswo swi ta mi pfuna.

•   Teka vutomi byi ri bya nkoka ku tlula swilo leswi u nga na swona. Bibele yi ri: “A hi tanga na nchumu emisaveni naswona a hi nge fambi na nchumu.” (1 Timotiya 6:​7, 8) Leswaku hi kota ku pona mhangu, hi fanele hi tiyimisela ku siya makaya ya hina ni swilo leswi hi nga na swona. Hi ta va hi endla kahle loko hi tsundzuka leswaku vutomi bya hina i bya nkoka ku tlula swilo leswi hi nga na swona.—Matewu 6:​25.