Siku ni siku, swivochwa emakhotsweni ya le United States swi tsalela rhavi ra Timbhoni ta Yehovha mapapila yo tala swi kombela ku pfuniwa hi tlhelo ra moya.

Ha swi hlamula swikombelo swo tano naswona hi hlela leswaku vatirheli va le mavandlheni ya kwalaho va endzela ni ku dyondza Bibele ni lava nga emakotsweni, eswibedlhele, emakhotsweni ya vantshwa ni le tindhawini to pfuna vanhu lava gondzomberiweke hi swidzidziharisi.

Emakhotsweni man’wana, vatirheli va hina va khoma minhlangano nkarhi ni nkarhi. Hi xikombiso, eka khotso rin’wana swivochwa swa 32 swi yingisele nkulumo ya le rivaleni leyi nyikeriweke etimbaleni timbirhi ta khotso.

Ku ve ni vuyelo lebyi tsakisaka. Wanuna un’wana loyi a khotsiweke exifundzheni xa Indiana naswona a gweveriweke rifu hikwalaho ko dlaya, u cince vumunhu byakwe kutani a khuvuriwa tanihi Mbhoni ya Yehovha.

Loko Mbhoni yin’wana yi vulavula hi xivochwa xin’wana lexi yi hlayaka na xona Bibele lexi pfaleriweke ekhotsweni lerikulu ra le California, u te: “Ndzi swi tiva kahle leswaku a a ri munhu wa njhani ni nhluvuko lowu a wu endleke. U endle mindzulamiso leyikulu leswaku a fanelekela ku khuvuriwa.”

Swivochwa swo tala swi amukele ntiyiso lowu humaka eBibeleni hambileswi a swi swi tiva leswaku hikwalaho ka sweswo vutomi bya swona a byi ta va ekhombyeni. Hi xikombiso, swivochwa swin’wana leswi tihambaniseke ni ntlawa lowu a swi ri swirho swa wona swi boheke ku pfaleriwa swi ri swoxe kumbe swi rhurhiseriwa ekhotsweni rin’wana leswaku swi sirheleriwa.

Matimba ya Bibele yo hundzula vutomi bya swivochwa ma hlamarisa swinene lerova varhangeri va khotso va sala va hlamarile. Varhangeri van’wana va nyike Timbhoni switifiketi swo nkhensa ni tisagwadi ta ntirho wa ku tirhandzela hikwalaho ka ntirho wa tona lowunene emakhotsweni.