Timotiya Wa Wumbirhi 3:1-17
3 Kambe swi tivi swaku ka masiku ya wugamu+ ku ta fika minkama ya ku karhata leyi swi tikaka ku hanya ka yona.
2 Hikusa vanhu va ta va lava tirhandzaka, va rhandza male, va tibyela, va titlakusa, va vulavula nhlambha, va nga yingisi vapsali, va nga khensi, va nga tshembeki,
3 va nga na lirhandzu, va womelela ka mavonelo ya vona, va lumbeta van’wani, va nga tikhomi, va va ni mona, va nga rhandzi wunene,
4 vaxengi, va nkanu, va ku tikulisa, va ku rhandza ku titsakisa va tshika ku rhandza Xikwembu,
5 va tikomba ingaku va gandzela Xikwembu kambe a swi tikombi hi mahanyelo ya vona;+ fambela kule ni vanhu va ku tshamisa xileswo.
6 Xikarhi ka vanhu lava, ku ta humelela vavanuna lava ngungumelaka va nghena ka mindjangu va kanganyisa vavasati va ku kala va nga tiyanga, lava tikiwaka hi swidjoho ni ku yingayingisiwa hi ku navela ka ku tala, va va yendla swikarawa swa vona.
7 Vavasati volavo va djondza minkama hinkwayu kambe a va swi koti ku twisisa ntiyiso.
8 Va tama va kaneta ntiyiso ku fana ni leswi Yani na Yambri va nga kanetana na Moxe. Mimpimiso ya vanhu lava yi wonheke swinene naswona Xikwembu a xi va yamukeli hikusa a va fambi hi lipfumelo.
9 Kambe a va nge yi kule, hikusa wuphunta la vona li ta voneka ka vanhu hinkwavu, hilaha swi nga yendlekela vavanuna lavayani vavambirhi.+
10 Kambe wena u yi landzelele kahle djondzo ya mina, ndlela leyi ni hanyaka hi yona,+ maplanu* ya wutomi la mina, lipfumelo la mina, ku lehisa ka mina mbilu, lirhandzu la mina, ku tiyisela ka mina,
11 ku hluphiwa ni swikarhatu swa ku fana ni leswi ni nga kumana na swona Antiyokiya,+ Ikoniya+ ni le Lixtra.+ Ni tiyiselile ku hluphiwa naswona Hosi yi ni ponisile ka hinkwaswu.+
12 Phela hinkwavu lava navelaka ku hanya hi ku tinyiketela ka Xikwembu na va li vadjondzisiwa va Kreste Yesu, na vona va ta hluphiwa.+
13 Kambe vanhu va ku biha ni vakanganyisi va ta tama va yengetela ku biha swinene, va djikisa van’wani, na vona va djikisiwa.+
14 Kambe wena, tama u landzela leswi u nga swi djondza, leswi u nga tlhamuseliwa kahle u za u kholwa swaku i ntiyiso+ hikusa wa va tiva lava nga ku djondzisa swona
15 ni leswaku ku sukela loko wa ha li xin’wanani+ u tive matsalwa ya ku kwetsima,+ lama kotaka ku ku tlharihisa leswaku u ta pona hi ku va ni lipfumelo ka Kreste Yesu.+
16 Matsalwa hinkwawu ma huma ka* Xikwembu+ naswona ma pfuna ku djondzisa,+ ku kawuka, ku lulamisa swilo ni ku laya swaku ku yendliwa leswi nga swinene,+
17 leswaku mutirheli wa Xikwembu a ta swi kota hi ku helela a tlhela a lunghekela ku yendla ntirho wun’wani ni wun’wani wawunene.
