Vakorinto Va Wumbirhi 8:1-24
8 Vamakwerhu, swoswi hi lava swaku mi tiva hi ta timpsalu tatikulu ta Xikwembu, leti nga kombiwa vamakwerhu va mabandla ya le Makedoniya.+
2 A va hlupheka hansi ka ndzingo wawukulu, kambe hambileswi a va li ka wusiwana lalikulu va nyikele na va tsakile swinene. Leswo swi kombise swaku va ni voko la ku nyika swinene.
3 Va nyikele leswi a va li na swona+ hambi ni ku tlula. Mina ni fakazi ya swona.+
4 Hi ku swi rhandza va hi kombele hi ku phindhaphindha swaku hi va pfumelela ku seketela ntirho wa ku pfuna vakwetsimi.+
5 Va yendle swa ku tala ku tlula leswi a hi swi nyimelile naswona hi ku rhandza ka Xikwembu va tinyikelile swaku va tirhela Hosi ni ku hi tirhela.
6 Kutani hi kombele Tito+ swaku a hetisa ntirho lowu a nga wu sungula xikarhi ka n’wina wa ku hlengeleta munyikelo.
7 Phela leswi mi nga ganya ka minchumu hinkwayu ya ku fana ni lipfumelo, ku kota ku vulavula, wutivi, ku tinyiketela naswona mi va rhandzaka swinene vanhu ku fana ni leswi ni mi rhandzisaka xiswona, lwelani ku va ni voko la ku nyika swinene.+
8 A no mi vekela nawu loko ni vula leswi kambe ni swi vula leswaku mi vona ku tinyiketela ka van’wani ni hileswi ni lavaka ku vona swaku lirhandzu la n’wina i la ntiyiso kumbe a hi la ntiyiso.
9 Hikusa ma ti tiva timpsalu tatikulu ta Hosi ya hina Yesu Kreste, leswaku hambileswi a a ganyile, a ve xisiwana hi mhaka ya n’wina+ leswaku mi ta ganya hi mhaka ya wusiwana la yena.
10 Mavonelo ya mina ka mhaka leyi hi lawa:+ Ku yendla ntirho lowu swi ta mi pfuna hikusa se ku hundza lembe na mi sungulile ku wu yendla naswona mi swi kombisile swaku ma swi lava ku wu yendla.
11 Se hetisani leswi mi nga swi sungula. Kutani leswi mi nga ta swi nyikela hi ku ya hi makotela ya n’wina swi ta kombisa swaku ma swi lava ku nyika.
12 Loko munhu a nyikela na swi suka mbilwini Xikwembu xa swi yamukela hikusa xi lava swaku munhu a nyikela leswi a nga na swona+ ku nga li leswi a kalaka a nga li na swona.
13 Hikusa a ni lavi ku vevukisela van’wani kambe ni tikisela n’wina.
14 Leswi mi nga ni swa swinyingi swoswi mi nga swi kota ku va pfuna. Se loko siku lin’wani na vona va va ni swa swinyingi va ta mi pfuna, leswaku ku va ni ku ringana.
15 Hilaha swi nga tsaliwa: “Lweyi a a ni swa swinyingi a nga kumanga swa swinyingi hintamu ni lweyi a a ni swaswitsongo a nga kumanga swaswitsongo hintamu.”+
16 Kutani a ku khensiwe Xikwembu hileswi Tito+ a karhatekaka hintamu hi n’wina ku fana na hina.
17 Hikusa a ngo yo pfumela xikombelo xa hina ntsena kambe leswi a a swi navela hintamu ku ta ka n’wina, wa ta hi ku swi rhandza.
18 Kambe hi mu rhumela xikan’we ni makwerhu lweyi a tiviwaka mabandleni hinkwawu hi ku chumayela mahungu ya ku tsakisa.
19 A hi leswo ntsena, a tlhele a langiwa hi mabandla swaku a famba na hina leswaku a hi pfuna ku hlayisa minyikelo leyi. Hi ta yi phakela swaku ku dzunisiwa Hosi ni ku kombisa swaku hi lava ku pfuna van’wani hi mbilu hinkwayu.
20 Kutani hi yendla leswaku hi nga soliwi hi munhu hi munyikelo lowu, lowu hi wu hlayisaka.+
21 Hikusa hi ‘lava ku yendla swilo hinkwaswu hi ku tshembeka, ku nga li phambheni ka Yehovha* ntsena kambe ni le phambheni ka vanhu.’+
22 Hi va rhuma swaku va ta ni makwerhu lweyi hi nga mu kambela minkama ya yinyingi naswona hi kuma swaku wa hiseka ka timhaka ta tinyingi, kambe swoswi a hiseka ngopfu hi mhaka ya leswi a mi tshembaka hintamu.
23 Kambe loko munhu a vutisa swaku i mani Tito, mu byeleni swaku i munghanu wa mina naswona ni tirha na yena swaku mi pfuneka; naswona loko munhu a vutisa hi vamakwerhu van’wani, mu byeleni swaku i vapostolo va mabandla naswona va dzunisa Kreste.
24 Hi mhaka leyo, va kombeni swaku ma va rhandza vamakwerhu lava,+ mi tlhela mi komba ni mabandla swaku hi mhaka muni hi tibuma hi n’wina.
Tinhlamunselu ta le hansi
^ Vona Xiyengetelo A5.
