Esaya 46:1-13
46 Bel* a khizamile,+ Nebo a korhamile.
Swikwembu swa vona swi pakeliwe ka swifuyu leswi rhwalaka swidjumba,+Ku fana ni swidjumba leswi tikaka swiharhi leswi nga karhala.
2 Swi khizamile swi tlhela swi korhama xikan’we;A swi swi koti ku ponisa swidjumba* swa swona,Na swona swi ya awukaraweni.
3 “Ni yingiseni, n’wina vandjangu wa Yakobe na n’wina hinkwenu lava nga sala vandjangu wa Israyele,+N’wina ni nga mi wundla na ma ha ku psaliwa ni tlhela ni mi tlakula na ma ha li khwirhini.+
4 Hambiloko mi gugile, a ni nge txintxi;+Ni ta mi tlakula anze misisi ya n’wina yi va ya ku basa.
Ni ta tama ni mi tlakula ni tlhela ni mi ponisa.+
5 Mi nga ni fanisa na mani kumbe mi ni ringanisa na mani,+Leswaku hi fana?+
6 Ku ni lava tlangaka hi woru va li humesa ka swipachi swa vona;Va peza prata hi xa ku peza hi xona.
Va thola lweyi a tirhaka hi nsimbi, swaku a va yendlela xikwembu.+
Va gama va khizama phambheni ka xona va xi gandzela.+
7 Va xi pakatsa;+Va ya xi veka ka ndhawu ya xona, xi nyima xi ku whii!
A xi suki lani xi nga vekiwa kona.+
Va xi huwelela, kambe a xi hlamuli;A xi swi koti ku ponisa munhu ka mahlomulu.+
8 Khumbukani mhaka leyi, mi tiya nhlana.
Swi khumbukeni, n’wina lava delelaka nawu.
9 Khumbukani swilo swa khale* hintamu,Leswaku hi mina Xikwembu, a ku na xin’wani.
Hi mina Xikwembu, a ku na xin’wani lexi fanaka na mina.+
10 Ku sukela ku sunguleni ni vula leswi nga ta humelela na swi nge se humelela,Ni leswi kalaka swi nge se yendleka ni swi hlaye khale.+
Ni li: ‘Leswi ni swi lavaka swi ta yendleka,+Ni ta yendla ku rhandza ka mina.’+
11 Ni vitana gama* ka tlhelo la wuxeni,+Lweyi a taka hi ka tiko la le kule, swaku a yendla leswi ni swi lavaka.+
Ni swi vulile, ni ta swi yendla.
Ni tinyimiselile, ni ta swi hetisisa.+
12 Ni yingiseni, n’wina va timbilu ta ku tiyela,*N’wina lava kalala va nga ku tivi ku lulama.
13 Ni tise ku lulama ka mina kusuhi;A ku le kule,Ku ponisa ka mina a ku nge hlweli.+
Ni ta ponisa Siyoni naswona Israyele a ta vona ku phatima ka mina.”+
Tinhlamunselu ta le hansi
^ Ku nga xikwembu xa Babilona.
^ Ku nga swifaniso leswi nga pakeliwa ka swifuyu.
^ Hi Xiheberu: “swa ku sungula”.
^ Ku nga muxaka wa xinyanyani.
^ Hi Xiheberu: “ta matimba”.
