Mintirho Ya Vapostolo 12:1-25
12 Hi nkama wolowo, hosi Heroda a sungule ku hlupha van’wani abandleni.+
2 A dlaye Yakobe makwavu wa Yohani+ hi xipada.+
3 Nkama a nga vona swaku leswo swi tsakisa Vayuda, a khome Pedru. (Leswi swi yendleke hi nkama wa Fexta la Mapawu ya Ku Kala Fermentu.*)+
4 A mu khoma a mu peta djele,+ a tlhela a yendla swaku a voneleliwa hi 4 wa mintlawa ya masonchwa, naswona ntlawa wun’wani ni wun’wani a wu ni 4 wa masonchwa lawa a ma txintxana ku mu vonelela; Heroda a a lava ku mu humesa* a mu nyikela ka vanhu nkama Paxkwa li nga hela.
5 Pedru a a petiwe djele kambe bandla a li nga tshiki ku mu khongelela swinene ka Xikwembu.+
6 Nkama Heroda a a li kusuhi ni ku mu humesa, hi wusiku la kona, Pedru a a yetlelile na a bohiwile hi machini mambirhi xikarhi ka masonchwa mambirhi; a ku ni vavoneleli van’wani phambheni ka xipfalu lava a va vonelela djele.
7 Se kola na kola ku humelela ntsumi ya Yehovha*+ kutani ku va ni ku vonakala adjele. Yi fika yi hlakahla Pedru yi mu pfuxa yi ku: “Pfuka hi xihantla!” Kutani machini lawa a ma li ka mavoko ya yena ma wa.+
8 Se ntsumi yi ku: “Yambala mpahla* ya wena ni masandaliya.” Kutani Pedru a yendla swoleswo. Se ntsumi yi tlhela yi ku: “Yambala mpahla* ya wena u ni landzela.”
9 Kutani a huma a yi landzela, kambe a a nga swi twisisi swaku leswi a swi humelela swo yendleka hikakunene. Ka nhloko ya yena a wo vona swa ku hlamalisa swa ku ta hi ka Xikwembu.*
10 Va hundze muvoneleli wa ku sungula ni wa wumbirhi, kutani va fika ka nyanghwa wa nsimbi lowu humelaka doropeni, se wu tipfulekela hi woxe. Nkama va nga fika ka xitaratu xa ku sungula, ntsumi yi mu siyile.
11 Nkama Pedru a nga sungula ku twisisa leswi a swi yendleka a te: “Se na swi vona swaku Yehovha* a rhume ntsumi ya yena swaku yi ni ponisa ka voko la Heroda ni ka hinkwaswu leswi Vayuda a va lava ku ni yendla swona.”+
12 Nkama a nga twisisa leswi a swi yendleka, Pedru a ye kaya ka Mariya mamani wa Yohani, lweyi a va ku i Marka,+ lomu a ku ni vanhu va ku talanyana, lava a va tlhanganile va khongela.
13 Nkama a nga ba xipfalu, mutirhi wa xisati lweyi a vitaniwaka Roda a te ku ta vona swaku i mani lweyi a baka xipfalu.
14 Nkama a nga twa rito la Pedru, a tsake hintamu a za a nga pfuli xipfalu kambe a tsutsumile a tlhela a ya ndlwini, a ya va byela swaku Pedru a nyime ka xipfalu.
15 Se va ku: “Wo phuphurhuka we!” Kambe a sindzisa swaku a nga hembi. Se va ku: “I ntsumi ya yena.”
16 Kambe Pedru a nga sukanga, a tame a ba xipfalu. Nkama va nga pfula, va vone swaku hi yena, se va hlamala.
17 Kambe a va byela hi voko swaku va miyela; kutani a va byela leswi Yehovha* a nga mu humesisa xiswona djele a tlhela a ku: “Byelani Yakobe+ ni vamakwerhu timhaka leti.” Kutani a huma a ya ka ndhawu yin’wani.
18 Na se li xile, masonchwa a ma karhatekile swinene, ma vutisana swaku Pedru a ye kwini.
19 Se Heroda a mu lavetela hintamu; loko a nga mu kumi, a thethisa vavoneleli ni masonchwa, a tlhela a leleta swaku va khatisiwa;+ a gama a suka Yudiya a ya Khezariya, a fika a tshama kona nkamanyana.
20 Heroda a a kwatele vanhu va le Tiru ni va le Sidoni. Vanhu va tindhawu leti a va xava swakudla ka tindhawu leti yena a a fuma ka tona. Kutani va twananile va tlhela va xavelela Blaxtu, lweyi a a vonelela yindlo ya Heroda swaku a va pfuna; va vulavule na Heroda swaku va va ni ku rhula na yena.
21 Siku lin’wani, Heroda a yambale mpahla ya yena ya wuhosi, a tshama ka xitshamu xa ku yavanyisa a gama a sungula ku vulavula ni vanhu.
22 Kutani vanhu lava a va tlhanganile va huwelela va ku: “Rito leli a hi la munhu, i la xikwembu!”
23 Hi nkama wolowo ntsumi ya Yehovha* yi mu ba, hikusa a nga dzunisanga Xikwembu; se a dliwa hi swivungwani a fa.
24 Kambe rito la Yehovha* li tama li hangalaka naswona vanhu va vanyingi va ve vapfumeli.+
25 Nkama Barnaba+ na Sawulo va nga teka leswi nga tlhanganisiwa, va swi heleketile ka vamakwerhu aYerusalema,+ va tlhelele Antiyokiya va ya teka na Yohani+ lweyi a va ku i Marka.
Tinhlamunselu ta le hansi
^ Kumbe: “Txomela.”
^ Kumbe: “a a lava ku mu thethisa”.
^ Vona Xiyengetelo A5.
^ Kumbe: “banchi la”.
^ Kumbe: “Lungheka”.
^ Hi Xigriki: “xivono.” Vona Ntlhamuselo.
^ Vona Xiyengetelo A5.
^ Vona Xiyengetelo A5.
^ Vona Xiyengetelo A5.
^ Vona Xiyengetelo A5.
