Mintirho Ya Vapostolo 19:1-41
19 Hi ku famba ka nkama, na Apolosi+ a li Korinto, Pawulo a tsemakanye tiko la Aziya a ya Efeza.+ A fike a kuma vadjondzisiwa
2 a va vutisa a ku: “Indjhe mi wu kumile moya wa ku kwetsima nkama mi nga va vapfumeli?”+ Va mu hlamula va ku: “Ho sungula ku swi twa hi wena swaku ku ni moya wa ku kwetsima.”
3 Pawulo a ku: “Se mi tsakamisiwe ku yini?” Va hlamula va ku: “Hi ku tsakamisa ka Yohani.”+
4 Pawulo a ku: “Ku tsakamisa ka Yohani a ku kombisa swaku munhu wa tilaya.+ A a byela vanhu swaku va pfumela ka lweyi a nga ta gama a ta ndzhaku ka yena,+ ku nga Yesu.”
5 Nkama va nga twa leswo, va tsakamisiwile hi vito la Hosi Yesu.
6 Nkama Pawulo a nga va tlhateka mavoko, va kume moya wa ku kwetsima,+ se va sungula ku vulavula hi tirimi va tlhela va profeta.+
7 Hinkwavu ka vona a va li kolomuyani ka 12 wa vavanuna.
8 Pawulo a hete tiwheti tinharhu na a vulavula na a nga chavi nchumu ka sinagoga,*+ a djondzisa ni ku pfuna vanhu swaku va twisisa ta Mfumu wa Xikwembu.+
9 Kambe nkama van’wani va nga tiwomisa tinhloko* va nga lavi ku pfumela va tlhela va vulavula ku biha hi Ndlela ya Hosi+ phambheni ka vanhu, Pawulo a teke vadjondzisiwa a suka na vona ka vanhu volavo.+ Se a hamba a ya va djondzisa siku ni siku ka sala la xikola xa Tirano.
10 A djondzise malembe mambirhi ka xikola xolexo, se hinkwavu lava tshamaka ka provhinsiya la Aziya, ku nga Vayuda ni Vagriki, va za va twa rito la Hosi.
11 Kutani Xikwembu xi tama xi yendla mintirho ya matimba ya ku hlamalisa hintamu hi ku tirhisa Pawulo,+
12 ku za ku tekiwa mpahla ni mavhintali lama nga khumba muzimbha wa yena swi yisiwa ka vanhu lava vabyaka,+ se va hanya, ni madimoni ma huma.+
13 Kambe Vayuda van’wani lava a va fambafamba va hlongola madimoni, va zame ku tirhisa vito la Hosi Yesu swaku va hlongola madimoni; a va ku: “Hi vito la Yesu lweyi Pawulo a chumayelaka hi yena na ku kawuka: Huma.”+
14 A ku ni 7 wa vana va madjaha va muprista wamukulu wa Muyuda lweyi vito la yena ku nga Sevha lava na vona a va yendla swoleswo.
15 Se dimoni li byela vana va Sevha li ku: “Yesu na mu tiva+ na Pawulo ni mu tolovelile;+ se n’wina ke, hi n’wina vamani?”
16 Kutani munhu lweyi a a ni dimoni a va tlulela, a va tlatlalata hi mun’we hi mun’we a va hlula, va za va baleka ka munti wolowo na va nga yambalanga nchumu, na va vavisiwile.
17 Mhaka leyi yi dume ka vanhu hinkwavu, ka Vayuda ni Vagriki lava a va tshama Efeza; se hinkwavu va sungula ku chava, kutani vito la Hosi Yesu li tama li dzunisiwa.
18 Ku tala ka lava nga va vapfumeli a va ta, va vula swidjoho swa vona na va nga fihli nchumu.
19 Naswona vanyingi lava a va hanya hi masalamusi va hlengelete mabuku ya vona va ma hisa phambheni ka vanhu.+ Nkama va nga hamba tikonta va kume swaku a ma ringana 50.000 wa male ya prata.
20 Leswo swi yendle swaku rito la Yehovha* li ya li kula ni ku hlula hi ndlela ya ku hlamalisa.+
21 Se Pawulo a gama a tibyela swaku loko a vuya hi le Makedoniya+ ni le Akaya, a ta ya Yerusalema.+ A te: “Loko ni suka Yerusalema, ni fanele ni ya ni le Roma.”+
22 A rhume vavanuna vambirhi lava a va mu pfuna, ku nga Timotiya+ na Eraxto+ va ya Makedoniya, kambe yena a sala ka provhinsiya la Aziya.
23 Hi nkama wolowo, ku pfuke mpfilumpfilu yayikulu+ hi mhaka ya Ndlela ya Hosi.+
24 A ku ni wanuna mun’wani lweyi vito la yena ku nga Dimetriyu, lweyi a a tirha hi prata. A a yendla switempelani swa Artimiza* hi prata naswona a ganyise lava a va kota ku yendla ntirho lowu.+
25 A hlengelete vavanuna volavo ni van’wani lava a va kota ku yendla mintirho ya ku fana ni leyo a ku: “Vavanuna, mi swi tiva kahle swaku hi dla hi negosiyu* leyi.
26 Kambe ma swi vona mi tlhela mi swi twa swaku wanuna lweyi va nge i Pawulo, a txintxe vanhu va ku tala hi ku va djondzisa djondzo yin’wani, a vula swaku swikwembu swa ku yendliwa hi mavoko a hi swa ntiyiso;+ phela a nga swi vulanga lani Efeza+ ntsena, kambe ni le ka provhinsiya hinkwalu la Aziya.
27 Naswona ku nga humelela khombo la leswaku ntirho wa hina wu wa; ku nga li leswo ntsena, ni tempele ya xikwembu* xaxikulu Artimiza a va nge he vi ni mhaka na yona naswona ka provhinsiya hinkwalu la Aziya ni le misaveni hinkwayu, a xi nge he gandzeliwi ni ku dzunisiwa xikwembu lexi.”
28 Nkama va nga twa leswo, va kwate swinene va tlhela va huwelela va ku: “I mukulu Artimiza wa Vaefeza!”
29 Se doropa hinkwalu li vanga mpfilumpfilu, kutani vanhu va tsutsuma va ya ka sala la mintlangu na va kokovisela Gayo na Arixtaku,+ vavanuna va le Makedoniya lava a va fambafamba na Pawulo.
30 Pawulo a a swi lava ku nghena a ya vulavula ni vanhu, kambe vadjondzisiwa a va mu pfumelelanga.
31 Hambi van’wani lava lulamiselaka mafexta ni mintlangu lava a va li vanghanu va Pawulo, va rhume vanhu va ya mu byela swaku a nga tshuki a tipeta nghozini hi ku ya nghena ka sala la mintlangu.
32 Xitshungu a xi dungeke nhloko, van’wani a va vula leswi kasi van’wanyani a va vula swin’wani; ku tala ka vona a va nga swi tivi swaku hi mhaka muni va hlengeletanile kolanu.
33 Se van’wani va byela Alexandri swaku a vulavula, Vayuda va mu susumetela swaku a ya phambheni; kutani Alexandri a tlakusa voko ku komba swaku a lava ku vulavula a tinyimelela ka vanhu.
34 Kambe nkama xitshungu xi nga tsumbula swaku a a li Muyuda, xi sungule ku huwelela xi heta kolomuyani ka mawora mambirhi na xi ku: “I mukulu Artimiza wa Vaefeza!”
35 Loko sekretariyu* wa doropa se a kote ku xi miyeta a ku: “Vavanuna va le Efeza, i mani lweyi a kalaka a nga swi tivi swaku doropa la Vaefeza hi lona li hlayisaka tempele ya Artimiza wamukulu ni xifaniso lexi nga wa hi le tilweni?
36 Leswi ku kalaka ku nga na munhu lweyi a nga kanetaka mhaka leyi, miyelani mi ku whii, mi nga djahi.
37 Hikusa vanhu lava mi nga va tisa lani, a va telenga ku ta yiva titempele naswona a va vulavulanga ku biha hi xikwembu xa hina xa xisati.
38 Se loko Dimetriyu+ ni lava tirhaka na yena va lava ku mangalela munhu, ku vekiwe masiku ya ku thetha timhaka naswona vagovhernadori va kona; a va te va ta mangala.
39 Kambe loko mi lava swa ku tlula leswo, swi ta bohiwa ka nhlengeletanu ya tiko hi ku ya hi nawu.
40 Hikusa hi nga tshuka hi kuma nandzu wa ku terekela mfumu hi mhaka ya leswi nga yendleka namuntlha, kuve a hi nga na xivangelo xa ku twala xa ku pfuxa mpfilumpfilu.”
41 Nkama a nga vula leswo, a game a va hangalasa.
Tinhlamunselu ta le hansi
^ I ndhawu leyi Vayuda a va kumana ka yona swaku va khongela va tlhela va lerha matsalwa.
^ Kumbe: “va titlanyalisa timbilu”.
^ Vona Xiyengetelo A5.
^ A ku li vito la xikwembu xa xisati.
^ Kumbe: “bindzu leli”.
^ Ku nga xikwembu xa xisati.
^ Kumbe: “matsalana; mabalani”.
