Mintirho Ya Vapostolo 26:1-32
26 Agripa+ a byela Pawulo a ku: “U nga tinyimelela.” Se Pawulo a tlakusa voko a gama a ku:
2 “Ni tsakile wena Hosi Agripa leswi namuntlha ni nga nyima phambheni ka wena swaku ni ta tinyimelela ka hinkwaswu leswi Vayuda+ va ni lumbetaka swona,
3 ngopfungopfu hileswi u swi tivaka kahle swihena swa Vayuda ni swilo leswi va holovisanaka hi swona. Hi mhaka leyo, ni kombela u ni yingisela u nga heli mbilu.
4 “Vanhu va ka hina va li tiva kahle wutomi leli a ni li hanya ku sukela awutsongwanini la mina; hambi ni Vayuda hinkwavu+ va le Yerusalema
5 lava a va ni tiva va nga ku byela loko va swi lava, swaku a ni li wa ntlawa wa Vafarisi+ lowu a wu hanya hi minawu ya ku tika swinene ya wukhongeli la hina.+
6 Kambe swoswi ni thethisiwa hi mhaka ya leswi ni kholwaka ka leswi Xikwembu xi nga tshembisa vavhovho va hina.+
7 Lexi i xitshembiso lexi 12 wa tinxaka ta hina ti nga xi nyimela na ti yendlela Xikwembu ntirho wa ku kwetsima wusiku ni nhlikanhi hi ku tinyiketela. Wena hosi, Vayuda+ va ni mangalela hi mhaka ya xitshembiso lexi.
8 “Kasi hi mhaka muni mi nga kholwi swaku Xikwembu xa swi kota ku pfuxa lava nga fa ke?
9 Phela na mina a ni tinyimisele ku yendla leswi nga matimbeni ya mina swaku ni lwisana ni vanhu lava chumayelaka hi vito la Yesu wa le Nazareta.
10 Ni swi yendlile leswo aYerusalema, ni peta vakwetsimi va ku tala adjele+ hikusa a ni pfumeleliwa hi vaprista vavakulu;+ naswona loko swi lava swaku va dlayiwa, na mina a ni nyima na swona.
11 A ni famba hi sinagoga* ni sinagoga ni va hlupha na ni zama ku va tshikisa lipfumelo la vona; a ni va kwatele hintamu ni za ni va landza ni ka madoropa ya le kule.
12 “Se siku lin’wani, loko ni li ndleleni ya ku ya Damaxka swaku ni ya yendla leswo, na ni ni mpfumelelo wa vaprista vavakulu,
13 ni vone ku hatima ninhlikanhi wena Hosi, loku a ku phatima ku tlula ni dlambu ku ku hati, lomu a hi famba kona.+
14 Nkama hi nga wa hansi, ni twe rito hi Xiheberu li ku: ‘Sawulo, Sawulo, u ni hluphela yini ke? Phela wo tivavisa loko u lwa na mina.’*
15 Kutani ni ku: ‘Hi wena mani Hosi?’ Se Hosi yi ku: ‘Hi mina Yesu lweyi u mu hluphaka.
16 Kambe pfuka u nyima. Ni humelela ka wena hikusa ni ku langile swaku u va mutirheli wa mina u tlhela u va mboni ya minchumu leyi u nga yi vona hi mina ni ya leswi ni nga ta ku komba swona.+
17 Ni ta ku ponisa ka mavoko ya vanhu lava, ni ya vamatiko lava ni nga ta ku rhuma ka vona,+
18 swaku u ya va pfula matihlo,+ u va humesa munyameni+ va ya ku vonakaleni,+ u va susa hansi ka matimba ya Sathana+ swaku va va hansi ka matimba ya Xikwembu, kuva va ta rivaleliwa swidjoho+ va tlhela va kuma tshomba leli Xikwembu xi li nyikaka lava xi nga va langa hileswi va nga pfumela ka mina.’
19 “Se wena Hosi Agripa, mina ni yingise leswi ni nga byeliwa swona na swi ta hi le tilweni,
20 ni sungule hi ku chumayela Damaxka,+ ni gama ni ya Yerusalema,+ ni le ka tiko hinkwalu la Yudiya ku patsa ni le ka vanhu vamatiko, ni va byela swaku va fanele va tisola va ya ka Xikwembu hi ku yendla mintirho leyi kombisaka swaku se va tisolile.+
21 Hi leswo swi nga yendla Vayuda va ni khoma tempeleni, va zama ku ni dlaya.+
22 Kambe Xikwembu xi ni pfunile ku tama ni chumayela vavakulu ni vavatsongo, ni va byela ntsena leswi Vaprofeta na Moxe va nga vula swaku swi ta yendleka:+
23 Swaku Kreste a a ta hluphiwa,+ ni leswaku leswi a a li wa ku sungula ku pfuxiwa ka lava nga fa,+ a a ta chumayela ni ku voningela vanhu lava ni vamatiko.”+
24 Na Pawulo a ha tinyimelela hi leswo, Fexto a huwelela a ku: “Wa hlanya wena Pawulo! Swa ku hlanyisa ku djondza ngopfu!”
25 Kambe Pawulo a ku: “A ni hlanyi Muchaviseki Fexto, kambe ni vulavula ntiyiso naswona leswi ni swi vulaka swa twisiseka.
26 Phela hambi hosi leyi ni vulavulaka na yona swoswi na ni nga chavi nchumu yi swi tiva kahle swilo leswi; na tiyiseka swaku yi swi vonile hinkwaswu leswi hikusa a swi yendlekanga xihundleni.+
27 Se wena Hosi Agripa, wa kholwa ka Vaprofeta ke? Na swi tiva swaku wa kholwa.”
28 Kambe Agripa a byela Pawulo a ku: “Hi nkamayana a wu ta ni txintxa ni va Mukreste.”
29 Se Pawulo a ku: “Hambiloko nkama wu li wutsongo hambi wu li wunyingi, na khongela ka Xikwembu swaku ku nga vi wena ntsena kambe ni hinkwavu lava ni yingisaka namuntlha, va nga fana na mina kambe na va nga bohiwanga hi machini lawa.”
30 Kutani hosi yi sekeleka, ku landzela govhernadori na Bernika ni vavanuna lava a va tshame na vona.
31 Kambe na va li ku fambeni, va sungula ku byelana va ku: “Wanuna lweyi a nga yendlanga nchumu lexi faneliwaka hi lifu kumbe ku petiwa djele.”+
32 Se Agripa a byela Fexto a ku: “Loko wanuna lweyi a a nga kombelanga ku ya thethisiwa hi Khezari, a a ta chunsiwa.”+
Tinhlamunselu ta le hansi
^ I ndhawu leyi Vayuda a va kumana ka yona swaku va khongela va tlhela va lerha matsalwa.
^ Hi Xigriki: “Wo tivavisa loko u khavetela nhonga ya ku tlhavana ya ku fiyariwa ka ponta.”
