Tipisalema 109:1-31
Ka mayextru. Pisalema ya Davhida. Lisimu.
109 Xikwembu xa mina lexi ni xi dzunisaka,+ u nga miyeli.
2 Hikusa minomo ya lava ku biha ni ya lava kanganyisaka yi lwa na mina.
Va ni hembela;+
3 Va ni lumbeta hi marito ya ku ni nyenya,Naswona va ni hlasela na ni nga va wonhelanga nchumu.+
4 Va lwa na mina hambileswi ni va rhandzaka;+Kambe ni tama ni khongela.
5 Loko ni va yendlela swaswinene va ni tlhelisela hi swa ku biha+Loko ni va rhandza va ni tlhelisela hi ku ni nyenya.+
6 A a yavanyisiwe hi munhu wa ku biha;Lweyi a mu lumbetaka a a nyime ka voko la yena la xinene.
7 A a nyikiwe nandzu loko a yavanyisiwa;Ni xikhongelo xa yena a xi voniwe xi li xidjoho.+
8 Masiku ya yena a ma pumbiwe;+Ntirho wa yena wa ku rhangela a wu tekiwe hi mun’wani.+
9 Vana va yena a va feliwe hi vapsali,*Nsati wa yena a a feliwe hi nuna.
10 Vana va yena a va rhendzelekele va hanya hi ku kombela zimola,A va hume ka makaya ya vona lawa ma nga hahluliwa va ya lavetela swakudla.
11 Lava a va devhaka a va teke hinkwaswu leswi a nga na swona,Naswona a a tekeliwe minchumu ya yena hi vanhu lava a kalaka a nga va tivi.
12 A nga kombiwi timpsalu* hi munhu ni mun’we,Naswona va nga kombiwi timpsalu vana va yena lava kalaka va nga na vapsali.*
13 Vatukulu va yena a va dlayiwe;+Vito la vona a li timiwe ka lixaka la vona.
14 Yehovha a a khumbuke nandzu wa vavhovho va yena,+Xidjoho xa mamani wa yena xi nga timiwi.
15 Yehovha a a tshamele ku khumbuka leswi va nga swi yendla;A a yendle swaku va nga ha khumbukiwi amisaveni.+
16 Hikusa a a nga na timpsalu,*+Kambe a a tshamela ku hlongolisa lweyi a xanisiwaka,+ xisiwana ni lweyi a nga tshoveka mbilu,Swaku a mu dlaya.+
17 A rhukiwile hileswi a a rhandza ku rhuka van’wani;A a nga swi rhandzi ku katekisa van’wani, hi mhaka leyo a nga yi kumanga minkateko.
18 A yambale xirhuku ku fana ni mpahla.
Xi chululiwe ka muzimbha wa yena ku fana ni mati,Xi nghene ka marhambu ya yena ku fana ni mafurha.
19 Xirhuku xa yena a xi fane ni mpahla leyi a tifunengetaka hi yona+Xi tlhela xi fana ni bandhi leli a tshamaka na a tibohile.
20 Lowu i muholo lowu Yehovha a wu nyikaka lava lwaka na mina+Ni lava vulavulaka swa ku biha hi mina.
21 Kambe, Yehovha Hosi Leyikulu,Ni pfune hi mhaka ya vito la wena.+
Ni ponise, hikusa lirhandzu la wena i linene.+
22 Hikusa a ni na mupfuni naswona ni xisiwana,+Ni tlhaviwe mbilu.+
23 Na hela ku fana ni ndzhuti lowu nyamalalaka;Ni dzudziwe ku fana ni ntete.
24 Matsolo ya mina ma hele ntamu hi mhaka ya ku titsona swakudla;Ni wondzile, na hela.
25 Va tshamela ku ni poyilela.+
Va hlakahla tinhloko loko va ni vona.+
26 Ni pfune Yehovha Xikwembu xa mina;Ni ponise hi lirhandzu la wena.
27 A va swi tive swaku leswi swi yendliwe hi voko la wena;Swaku wena Yehovha u swi yendlile.
28 Ni katekise loko va ni rhuka.
A va danisiwe loko va ni terekela,Kambe mina mutirheli wa wena a ni tsake.
29 Lava lwaka na mina a va yambexiwe tingana;A va boheleliwe hi tingana ku fana ni loko va yambale mpahla.+
30 Nomo wa mina wu ta mu dzunisa hintamu Yehovha;Ni ta mu dzunisa xikarhi ka vanhu va vanyingi.+
31 Hikusa a ta nyima ka voko la xinene la xisiwana,Swaku a xi ponisa ka lava va xi nyikaka nandzu.
Tinhlamunselu ta le hansi
^ Hi Xiheberu: “papayi”.
^ Kumbe: “lirhandzu”.
^ Hi Xiheberu: “papayi.”
^ Kumbe: “lirhandzu”.
