Tipisalema 35:1-28
Pisalema ya Davhida.
35 Yehovha Xikwembu xa mina, ni lwele ka lava ni lumbetaka;+Lwana ni lava lwaka na mina.+
2 Teka xivhikelo xa wena xaxitsongo ni xaxikulu,+U ta ni lwela.+
3 Tlakusa tlharhi la wena ni bewula* la nyimpi u lwa ni lava va ni txatxaka.+
Ni byele u ku: “Hi mina ku ponisiwa ka wena.”+
4 A va danisiwe lava hlotaka wutomi la mina.+
Lava yendlaka maplanu* ya ku ni dlaya a va baleki na va danisekile.
5 A va fane ni muhungu lowu biwaka hi moya;Ntsumi ya Yehovha a yi va hlongole va ya kule.+
6 Ndlela ya vona a yi ve ni munyama yi tlhela yi rhetemukaNkama ntsumi ya Yehovha yi va txatxaka.
7 Hikusa va ni rhiye hi redi na ni nga va wonhelanga nchumu;Va ni txelele xikhele na ni nga va wonhelanga nchumu.
8 A va humeleliwe hi khombo na va nga swi nyimelanga;A va phasiwe hi redi leli va nga ni rhiya hi lona;A va wele ka lona va fa.+
9 Kambe ni ta tsaka hi mhaka ya Yehovha;Ni ta tsaka hikusa a ni ponisile.
10 Marhambu ya mina hinkwawu ma ta ku:
“Yehovha, i mani lweyi a fanaka na wena?
U ponisa lweyi a kalaka a nga swi koti ku tilwela ka lava nga ni matimba,+U ponisa xisiwana ni lweyi a kalaka a nga swi koti ku tilwela ka vayivi.”+
11 Ku ta timboni ta mavunhwa,+Ti ni vutisa swa ku kala ni nga swi tivi.
12 Va ni tlhelisela hi swa ku biha loko ni va yendlela swaswinene,+Va ni vangela nhlomulu.*
13 Kambe nkama va nga vabya ni yambale mpahla* ya masaka;Ni tixanisile ni titsona swakudla,Naswona loko xikhongelo xa mina xi nga hlamuliwi,
14 Ni fambafambe na ni rila ingi hiloko ni rila munghanu kumbe makwerhu;Ni khizamile hi mhaka ya ku vaviseka, ku fana ni munhu lweyi a rilaka mamani wa yena.
15 Kambe loko swi nga ni fambeli kahle, va tsakile kutani va tlhangana;Va tlhanganile swaku va ta ni hlasela na ni nga swi nyimelanga;Va ni phatlulelile hi marito, funtshi a va miyelanga.
16 Vanhu lava va kalaka va nga chavi Xikwembu va ni poyilela,Va phora ni matinyu loko va ni vona.+
17 Yehovha Xikwembu xa mina, u ta swi txuvuka anze siku muni?+
Ni ponise ka ku hlaseliwa hi vona,+Ponisa wutomi la mina la lisima ka swinghonyamani leswi.+
18 Kutani ni ta ku khensa ka nhlengeletanu yayikulu;+Ni ta ku dzunisa axikarhi ka vanhu va vanyingi.
19 U nga pfumeleli lava tiyendlaka valala va mina va tsaka loko ni wa;U nga pfumeleli lava ni nyenyaka na ku nga na xivangelo+ va ni poyilela.+
20 Hikusa leswi va swi vulaka a swi tisi ku rhula,Kambe va yendla maplanu ya ku lwa ni lava ku rhula atikweni.+
21 Va pfula minomo swaku va ni lumbeta,Va ku: “Aham! Aham! Hi swi vonile hi matihlo ya hina.”
22 Yehovha Xikwembu xa mina, u swi vonile. U nga miyeli.+
Yehovha Xikwembu xa mina, u nga vi kule na mina.+
23 Pfuka u ta ni lwela,Yehovha Xikwembu xa mina, lwela mhaka ya mina.
24 Ni yavanyise hi ku ya hi ku lulama ka wena,+ Yehovha Xikwembu xa mina;U nga va tshiki va tsaka loko ni wa.
25 Va nga tshuki va byelana va ku: “Vonani, hi swi kumile leswi a hi swi lava!”
Va nga tshuki va ku: “Hi mu hahlulelile.”*+
26 Hinkwavu a va danisiwe va tlhela va xixiwaLava tsakaka loko ni humeleliwa hi khombo.
Lava tivonaka na va yampsa ku ni tlula a va yambexiwe tingana va danisiwa.
27 Kambe lava tsakisiwaka hi ku lulama ka mina a va be minkulungwani;A va tshameli ku vula va ku:
“A a dzunisiwe Yehovha lweyi a tsakaka loko mutirheli wa yena a rhulile.”+
28 Se ni ta gayela hi mintirho ya wena ya ku lulama+Ni ku dzunisa siku hinkwalu.+
Tinhlamunselu ta le hansi
^ Kumbe: “bewula leli tsemaka matlhelo hamambirhi”.
^ Kumbe: “makungu”.
^ Hi Xiheberu: “Va ni yendla ni titwa ni feliwile.”
^ Kumbe: “nguvu”.
^ Kumbe: “Hi mu mintile.”
