Yobo 36:1-33
-
Elihu a dzunisa wukulu la Xikwembu la ku karhata ku li twisisa (1-33)
-
Va ku lulama swi va fambela kahle; lava kalaka va nga rhandzi Xikwembu va helisiwa (11-13)
-
‘I mani lweyi a djondzisaka ku fana ni Xikwembu?’ (22)
-
Yobo a fanele a dzunisa Xikwembu (24)
-
“Xikwembu xi tlakuke hintamu ku tlula leswi hina hi nga swi tivaka” (26)
-
Xikwembu xi fuma mpfula ni ku hatima (27-33)
-
36 Elihu a tama a vulavula a ku:
2 “Ni lehiselinyana mbilu ni tlhamusela,Hikusa na ha ni leswi ni lavaka ku swi hlaya ni nyimelela Xikwembu.
3 Ni ta swi tlhamusela kahle leswi ni swi tivaka,Naswona ni ta hlaya swaku Lweyi a nga ni yendla a lulamile.+
4 Ni vulavula ntiyiso;Leswi ni swi hlayaka swi ta hi ka Lweyi a tivaka hinkwaswu.+
5 Vhela Xikwembu xi ni matimba+ naswona a xi tshiki munhu;Ku twisisa ka xona i kukulu hintamu.
6 A xi nge mu tshiki lweyi a yendlaka swa ku biha a tama a hanya,+Kambe xi ta va yavanyisa hi ndlela ya ku lulama lava xanisekaka.+
7 A xi ma susi matihlo ya xona ka lava ku lulama;+Xi va yendla tihosi*+ naswona va tlakusiwa hi nkama wa ku kala wu nga heli.
8 Kambe loko va bohiwe hi machini,Va bohiwe hi magoda ya ku hlupheka,
9 Xi va byela leswi va nga swi yendla,Minandzu ya vona leyi va nga yi yendla hi mhaka ya leswi va nga tibyela.
10 Xi pfula tindleve ta xona swaku xi va layaXi va byela swaku va tshika ku yendla swa ku biha.+
11 Loko va xi yingisa ni ku xi tirhela,Va ta tikhorisa hi wutomi la vona,Ni malembe ya vona ma ta tsakisa.+
12 Kambe loko va nga yingisi, va ta helisiwa hi xipada,*+Va ta fa va nga tivi nchumu.
13 Lava kalaka va nga xi hloniphi Xikwembu va ta va ni xiviti.
A va xi kombeli swaku xi va pfuna hambi xi va bohile.
14 Va fa va ha li vatsongo,+Va heta wutomi la vona axikarhi ka vavanuna lava yendlaka wunghwavani ka tempele.+
15 Kambe Xikwembu xi ponisa lava hluphekaka hi nkama wa swikarhatu swa vona;Xi pfula tindleve ta vona swaku va xi twa loko va hluphiwa.
16 Xi ku tsavula ka swikarhatu,+Xi ku yisa ka ndhawu ya ku pfuleka, leyi kalaka yi nga na swikarhatu,+Xi veka swakudla swa swinyingi ka meza wa wena swaku swi ku tiyisa.+
17 Kutani u ta tsaka hi ndlela leyi lava ku biha va nga ta yavanyisiwa hi yona,+Loko va yavanyisiwa ni loko swilo swi yendliwa hi ndlela ya ku lulama.
18 Kambe tivoneli swaku ku kwata ka wena ku nga ku yendli u va ni mona,+U nga pfumeli ku xaviwa hikusa swi ta ku djikisa.
19 Indjhe ku rila ka wena ka ku kombela ku pfuniwa ku ta helisa swikarhatu,Kumbe minzamu ya wena ya ku lava ku helisa swikarhatu yi ta ku pfuna?+
20 U nga naveli swaku ku va wusiku,Hi nkama lowu vanhu va nyamalalaka ka tindhawu ta vona.
21 U nga langi ku yendla swa ku biha,Hileswi u kalaka u nga lavi ku hlupheka.+
22 Xikwembu xi ni matimba hintamu;I mani lweyi a djondzisaka ku fana na xona?
23 I mani lweyi a xi kombaka ndlela*+Kumbe lweyi a xi byelaka a ku: ‘U yendle swa ku kala swi nga lulamanga’?+
24 U nga khohlwi ku dzunisa ntirho wa xona+Lowu vanhu va nga yimbelela hi wona.+
25 Vanhu hinkwavu va wu vonile,Munhu a wu txuvuka na a li kule.
26 Xikwembu xi tlakuke hintamu ku tlula leswi hina hi nga swi tivaka;+Malembe ya xona i manyingi, a ma konteki.*+
27 Xi teka madonakati ya mati xi ma hlengeleta ma ya henhla;+Ma gama ma txintxa ma va mpfula ni hunguva;
28 Kutani marhefu ma chulula mpfula;+Yi na ahenhla ka misava.
29 Indjhe a kona lweyi a nga twisisaka swaku marhefu ma tshamise ku yini,Kumbe ku dzindza loku taka hi ka tende la xona?+
30 Vona ndlela leyi xi hangalasaka hi yona ku hatima ka xona+ ahenhla ka wonaXi mbhonya mati ya ku yenta ya le lwandle.
31 Hi ku yendla leswo xi hlayisa vanhu;Xi va nyika swakudla swa swinyingi.+
32 Xi khoma ku hatima hi mavoko ya xona,Xi gama xi ku byela ku ya lomu xi lavaka swaku ku ya kona.+
33 Ku duma ka tilo ku hi byela hi xona,Ni swifuyu swi hlaya swaku ku ta mani.*
Tinhlamunselu ta le hansi
^ Kumbexana: “Xi veka tihosi”.
^ Kumbe: “tlharhi”.
^ Kumbexana: “a xi solasolaka; a xi thethisaka”.
^ Hi Xiheberu: “a ma twisiseki.”
^ Kumbexana: “yini.”
