Kusukela awutsongwanini Samuwele a ahanya ni kutirha atabernakeleni, kunga ndhawu leyi vanhu ava tirhela Yehovha kona. Waswi tiva leswaku Samuwele aze ava atabernakeleni hi mhaka muni? Ahi sungule hi kudjondza hi mamana wa Samuwele, kunga Ana.

Ana aheti nkama wa kuleha anga na n’wana. Xisweswo a khongele ka Yehovha akombela leswaku amu pfuna. Amu tshembise leswaku loko ova ni jaha, a atalirhumela leswaku li ya tirha atabernakeleni. Yehovha a hlamule xikhongelo xa yena, Ana a psale jaha. Ali chule vitu la Samuwele. Loko Samuwele ali ni 3 kumbe 4 wa malembe, Ana amu helekete tabernakeleni leswaku a ya tirhela Xikwembu kona, hilaha axi tshembiseke ha kona.

Eli a ali muprista lwenkulu atabernakeleni. A ali muprista lwenkulu hi leswi a ayimela vanhu mahlweni ka Xikwembu; ni vana va yena vambirhi ava tirha tabernakeleni. Khumbuka leswaku, tabernakele akuli ndhawu ya kutirhela Xikwembu ka yona, naswona vanhu ava fanele va yendla swilo leswinene kona. Kambe vana va Eli ava yendla swilo swobiha ngopfu. Samuwele a aswivona leswi avaswi yendla. Xana Samuwele a yendle swilo swobiha ku fana ni vana va Eli? — Nikatsongo! A hambete a yendla leswinene hilaha vapsali va yena avamu djondzise ha kona.

Uswi vonisa kuyini, Eli a afanele a yendla yini hi vana va yena? — A afanele ava khatisa. Naswona a angafanelanga ava tshika va hambeta va tirha tabernakeleni. Kambe Eli angaswi yendlanga; leswo swiyendle leswaku Yehovha amu kwatela yena ni vana va yena. Hi ndlela yoleyo Yehovha ava khawulisili.

Siku lin’wana niwusiku, loko Samuwele aha yetlele, a twe munhu na amu vitana: ‘Samuwele!’ Yena a tsutsume a ya ka Eli, kambe Eli ate: ‘Aniku vitananga.’ Leswi swi yendleke kambirhi. Kambe, ka khambe la wunharhu, Eli a byele Samuwele  leswaku loko atwa ritu limu vitana, a afanele a hlamula aku: ‘Vulavula Yehovha, hikuva nandza wa wena waku yingisa.’ Samuwele a yendle tanu. Kutani Yehovha a byele Samuwele aku: ‘Byela Eli leswaku nitava khawulisa yena ni ndjangu wakwe hi swilo swobiha vaswi yendleke.’ Xana aswi vevuka leswaku Samuwele a byela Eli maritu lawa? — Nikatsongo! Aswinga vevuki. Kambe hambileswi a achava, a yendle leswi Yehovha amu byeleke swona. Leswi Yehovha aswi vuleke a ali ntiyisu. Vana vambirhi va Eli va dlayiwile, Eli na yena a file.

Samuwele i xikombisu lexinene ka hina. Yena a yendle swilo leswinene hambiloko a vone vanhu van’wana va yendla swilo swobiha. Wena ke? Xana u ta fana na Samuwele naswona u ta ya mahlweni u yendla leswinene? Loko hoyendla leswo, u ta tsakisa Yehovha ni vapsali va wena.