XIDJONDZO 7
Xana Mfumu wa Xikwembu I Yini?
1. Xana rito lelinge ‘Mfumu wa Xikwembu’ livula yini?
I yini lexiyendlaka Yesu ava hosi leyifanelekaka? — MARKA 1:40-42.
Livula wuhosi lelinga le tilweni. Mfumu lowu wutahelisa mimfumu hinkwayu yinga laha misaveni ivi wuyendla leswaku kurhandza ka Xikwembu kuyendliwa amisaveni kun’we ni le tilweni. Hakunene wolawo i mahungu yotsakisa. Kungalikhale, wutayenelisa kunavela ka vanhu kolava Mfumu lowunene naswona wutayendla leswaku vanhu lava hanyaka laha misaveni vava ni vun’we. — Lerha Daniyele 2:44; Matewu 6:9, 10; 24:14.
Tani hileswi Mfumu wunga ni hosi, Yehovha alange n’wana wakwe Yesu Kreste leswaku ava Hosi ya Mfumu wakwe. — Lerha Nhlavutelo 11:15.
Sixtira vhidiyu lelinge Xana Mfumu wa Xikwembu I Yini?
2. Hayini Yesu afaneleka ku va Hosi?
Yesu wafaneleka ku va Hosi hikuva i munene naswona arhandza leswinga swinene. (Yohane 1:14) Nakambe a nawona ntamu wopfuna vanhu. Hiswitivisa kuyini leswo? Hikuva atafuma misava na ali etilweni. Endzhaku ka loko apfuxiwile, atlhelele tilweni laha angafika arindza avokweni la xinene la Yehovha. (Vaheveru 10:12, 13) Hi wugamu, Yehovha amuveke ku va Hosi. — Lerha Daniyele 7:13, 14.
3. I vamani lavangata fumaka na Yesu?
Ntlawa lowu vitaniwaka “vakwetsimi” hi wona wungata fumaka na Yesu atilweni. (Daniyele 7:27) Vakwetsimi vosungula kulangiwa ku ve vapostola va Yesu votshembeka. Nakambe Yehovha aya mahlweni alanga vavanuna ni vavasati votshembeka kutafikela nyamuntlha. Na vona loko vapfuxiwa, vaya tilweni vali vanhu va moya kufana na Yesu. — Lerha Yohane 14:1-3; 1 Vakorinto 15:42-44.
Xana i vanhu vangaki vayaka tilweni? Yesu avule leswaku i “ntlhambinyana” kumbe ntlawanyana. (Luka 12:32) Hinkwavu ka vona vatava 144.000. Hi vona vangata fumaka misava kun’we na Yesu. — Lerha Nhlavutelo 14:1.
4. Xana kuyendleke yini loko Yesu asungule kufuma?
Mfumu wa Xikwembu wusungule kufuma hi 1.914. * Xosungula lexi Yesu angaxiyendla tani hi hosi ku ve kuhlongola Sathana ni madimona yakwe avacukumeta laha misaveni. Sweswo swimukwatisile Sathana la kakuva asungula kuvanga swikarhatu amisaveni hinkwayu. (Nhlavutelo 12:7-10, 12) Hikolaho, akuhlupheka kutinyike matimba swinene. Tindlala, mavabyi ya minxakaxaka, tinyimpi ni kutsekatseka ka misava i “xikombisu” xa leswaku kungalikhale Mfumu wa Xikwembu wutafuma misava hinkwayu. — Lerha Luka 21:7, 10, 11, 31.
5. Xana i yini leswi Mfumu wa Xikwembu wuswimahaka swoswi naswona i yini leswi wungataswi mahaka ka nkama lowutaka?
Swoswi Mfumu wa Xikwembu wu karhi wuhlengeleta vanhu lavahumaka ka matiku yo hambanahambana lavanga ni vun’we hi kutirhisa ntirhu wochumayela. Vanhu va magidigidi lava titsongohataka se vafumiwa hi Yesu. Mfumu wa Xikwembu wutava sirhelela loko wutahelisa misava leyi yobiha. Hikolaho, hinkwavu lavalavaka kufumiwa hi Mfumu lowu, vafanele vadjondza kuyingisa Yesu. — Lerha Nhlavutelo 7:9, 14, 16, 17.
Ka nkama lowu ringanaka 1.000 wa malembe, Mfumu lowu wutahetisisa xikongomelo xa Xikwembu xa le kusunguleni hi vanhu. Misava hinkwayu yitava ndhawu yosaseka. Hi wugamu, Yesu atatlhelisela wuhosi ka Papayi wakwe Yehovha. (1 Vakorinto 15:24-26) I mani lweyi umutivaka lweyi unga tsakelaka kumubyela hi ta Mfumu wa Xikwembu? — Lerha Tipisalema 37:10, 11, 29.
^ par. 6 Leswaku utiva leswi engetelekeke hi ndlela leyi Bibele liprofeteke hi ta lembe la 1.914, vona matluka 215-218 ya buku leyinge: Xana Bibele Yi Dyondzisa Yini Hakunene?
