Pimisa hi papayi lweyi a bulaka ni n’wana wa yena wa 7 wa malembe. A byela n’wana wa yena a ku: “Xikwembu xi yentxe, dlambu, n’wenti tinyeleti, misava ni hinkwaswu leswi nga ka yona khale hintamu”. Loko se n’wana a pimise nyana hi leswi papayi a nga mu byela swona a mu vutisa a ku: “Papayi i mani nga yentxa Xikwembu?”

Se a hlamula a ku: “Xikwembu a xi yentxiwanga hi munhu xi kona ku sukela khale”, swi nga yentxeka nhlamulu ya papayi yi li yinene hi nkama wolowo kambe loko n’wana a ya a kula a tama a lava ku tiva swin’wana hi xivutiso xa yena, a nga swi twisisi swaku swi nga kotekisa ku yini munhu a va kona na a nga vanga ni masungulu. Hambi matilo ni misava swi ve ni masungulu, a nga ha tivutisa a ku: ‘Xikwembu xi ta hi kwini?’

Bibele li hlamulisa ku yini? Ku fana ni nhlamulu ya papayi lwiyani, Moxe a tsale a ku: “U yentxe misava ni tiko hinkwalu, tinhava ti nga se va kona, u Xikwembu hi nkama wa ku kala wu nga heli.” (Tipisalema 90:1, 2) Naswona muprofeta Esaya a te: “Ho kala u nga swi tivi ke? Ho kala u nga swi twanga ke? HYehovha, Mutumbuluxi wa misava hinkwayu, i Xikwembu hi nkama wa ku kala wu nga heli.” (Esaya 40:28) Hi ku fanana loko Yuda a vulavula hi Xikwembu a te xi kona “ku sukela khale ka khaleni.” — Yuda 25.

Tindzimana leti ti kombisa swaku Xikwembu i “Hosi leyi nga kona hi masiku ni masiku” hi lani mupostolo Pawulo a nga vula hi kona. (1 Timotiyu 1:17) Leswo swi lava ku vula swaku hambiloko ho pimisa hi nkama wa khale hintamu, Xikwembu a xi li kona naswona xi ta va kona hi masiku ni masiku. (Nhlawutelo 1:8) Hi mhaka leyo, kuva Xikwembu xi li kona hi masiku ni masiku swi kombisa swaku xi ni matimba hintamu.

Hi mhaka muni swi karhata ku swi twisisa leswo? Leswi malembe ya hina ya ku hanya ma nga goma swi hi yentxa hi vona nkama hi ndlela ya ku hambana ni leswi Yehovha a wu vonisaka xiswona. Leswi Yehovha a hanyaka hi masiku ni masiku a mil wa malembe ka yena ma fana ni siku lin’we. (2 Pedru 3:8) Hi xikombiso, leswi ntete wu hanyaka 50 wa masiku a wu ta swi twisisa swaku swi vula yini kuva hina vanhu hi hanya 70 kumbe 80 wa malembe? A swi ta karhata! Phela Bibele li vula swaku hina hi fana ni mintete loko hi fananisiwa na Yehovha, hambi mapimiselo ya hina a ma nge fananisiwi ni ya Xikwembu. (Esaya 40:22; 55:8, 9) Hi mhaka leyo a swi hlamalisi loko hi nga swi twisisi hinkwaswu leswi Yehovha a nga yi yentxisa xiswona misava.

Hambileswi swi hi karhatelaka ku swi twisisa, swa twala ku vula swaku Xikwembu lexi xi nga yentxa minchumu hinkwayu xi hanya hi masiku ni masiku. Loko a ko va ni munhu a nga yentxa Xikwembu munhu yelweyo a ku ta va yena a nga yentxa minchumu hinkwayu, kambe Bibele li li Yehovha hi yena a “nga yentxa minchumu hinkwayu.” (Nhlawutelo 4:11) Ku tlula leswo, ha swi tiva swaku matilo ni misava swi ve ni masungulu. (Genesa 1:1, 2) Swi ta hi kwini? Lweyi a nga swi yentxa a a fanele a va kona na swona swi nge se yentxiwa, naswona a ve kona na Yesu ni tintsumi va nge se va kona. (Yobo 38:4, 7; Vakolosa 1:15) Hi mhaka leyo swa twala ku vula swaku Xikwembu na xi nge se yentxa nchumu a xi hanya na xi li xoxe.

Kuva hina vanhu ni minchumu yin’wana hi li kona, swi kombisa swaku ku ni Xikwembu lexi xi hanyaka hi masiku ni masiku. Leswaku minawu leyi yi kongomisaka matilo ni misava yi fanele yi yentxiwe hi munhu lweyi a hanyaka hi masiku ni masiku. Naswona hi yena a nga kotaka ku nyika wutomi minchumu leyin’wana. — Yobo 33:4.