John a li: “Phela siku ni siku lava va nga chada va fanele va lehiselana mbilu. Swi nga ha tikomba ingaku loko u nga se chada ku lehisa mbilu a hi swa lisima, kambe leswaku muchadu wu famba kahle wu tlhela wu tsakisa swi lava swaku nuna na nsati va lehiselana mbilu.”

•  Hi mhaka muni swi lava swaku u lehisa mbilu?

•  U nga yendla yini swaku u tama u lehisa mbilu?

•  “Ku lehisa mbilu i swa lisima”

•   Loko u chadile swa vevuka ku vona swihoxo swa lweyi u nga chada na yena.

   Jessena a li: “Loko wa ha ku chada swilo swi famba kahle. Kambe hi ku famba ka nkama swa vevuka ku tshamela ku vona swihoxo swa mun’wani. Se loko minkama hinkwayu u tshamela ku vona swilo swa ku biha ka lweyi u nga chada na yena, swi ta yendla leswaku u nga lehisi mbilu.”

•   Loko munhu a nga lehisi mbilu a vulavula na a nga pimisanga.

   Carmen a li: “Ni vulavula leswi ni swi pimisaka. Minkama yin’wani ni vula swilo swa ku a ni nga fanelanga ni swi vula. Ku lehisa mbilu a ku ta ni pfuna swaku ni rhanga hi ku pimisa na ni nga se vulavula.”

   Bibele li li: “Lirhandzu li lehisa mbilu naswona li ni wumbilu.” (1 Vakorinto 13:4) Leswo swi vula swaku vanhu vambirhi lava va rhandzanaka va fanele va lehiselana mbilu. Kambe a hi minkama hinkwayu swi vevukaka ku yendla leswo. John, lweyi se hi nga bula hi yena a li: “Ku fana ni wumunhu hinkwalu lalinene, swa vevuka kuva ku lehisa mbilu ku pumbeka ku tlula kuva ku yengeseleka. Swi lava hi yendla minzamu yayikulu swaku hi ya hi lehisa mbilu.”

•   Loko ku yendleka nchumu xa ku a wu nga xi nyimelanga.

   Xikombiso: Nuna kumbe nsati wa wena a vula nchumu xa ku a xi ku tsakisanga. Leswo swi nga ha ku kwatisa swi tlhela swi ku yendla u lava ku tlhelisela hi ku vula marito lawa ma nga ta mu kwatisa na yena.

   Bibele li li: “U nga hantliseli ku kwata, hikusa leswo swi yendliwa hi swiphunta.” — Ekleziyaxta 7:9.

   U nga swi kombisisa ku yini swaku wa lehisa mbilu: Koka moya. Na u nga se vula nchumu, zama ku pimisa swaku nuna kumbe nsati wa wena a a nga lavi ku ku kwatisa hi maxivomu. A buku leli nge: Ku Lwela Muchadu Wa Wena (hi Xinghiza) li li: “Leswi vanhu va swi yendlaka loko va kwatisiwa, swi yelana ni leswi va pimisaka swaku nuna kumbe nsati wa vona a a lava ku swi vula, ku nga li leswi a nga swi vula hikakunene.”

   Hambiloko lweyi u nga chada na yena a ku kwatise hi maxivomu, lehisa mbilu. Naswona u nga weli ka ntlhamu wa ku tlhelisela. Leswo swi ta yendla swaku swilo swi yampsa, handle ka ku va swi ya swi biha hintamu. Bibele li li: “Lani ku kalaka ku nga na tihunyi, ndzilu wa timeka.” — Swivuriso 26:20.

   Ethan a li: “Loko u sungula ku vona nsati wa wena na a li nala, nyima u pimisa hi leswi swi ku yendlaka u mu rhandza. Naswona, zama ku mu yendlela nchumu xaxinene lexi nga ta mu tsakisa.”

   Pimisa hi leswi:

  •  U yendla yini loko lweyi u nga chada na yena a yendla kumbe ku vula nchumu xa ku kala xi nga ku tsakisi?

  •  U nga swi kombisisa ku yini swaku wa lehisa mbilu loko swilo swoleswo swi tlhela swi phindha?

•   Loko minkama hinkwayu ku yendleka swilo swa ku fana leswi kalaka swi nga ku tsakisi.

   Xikombiso: Lweyi u nga chada na yena a tshamela ku xwela, kuve wena a swi ku tsakisi.

   Bibele li li: “Tamani mi lehiselana mbilu ni ku rivalelana hi ku chunseka.” — Vakolosa 3:13.

   U nga swi kombisisa ku yini swaku wa lehisa mbilu? Zama ku pimisa hi swilo leswi nga ta pfuna ka muchadu wa wena, ku nga li swilo leswi nga ta pfuna wena ntsena. Tivutisi leswi: ‘Indjhe hi nga za hi holova hi mhaka leswi? Ku nga va swaku leswi swi ta pfuna ka muchadu wa mina?’ Handle ka leswo, i swa lisima ku khumbuka swaku “hinkwerhu ha phazama minkama ya yinyingi.” (Yakobe 3:2) Leswo swi vula swaku na wena ku ni swilo leswi u faneleke u yampsisa ka swona.

   Nia a li: “Minkama yin’wani swa ni vevukela ku lehisela mbilu munghanu wa mina ku tlula nuna wa mina. Ni pimisa swaku leswo swi yendleka hileswi ni hetaka nkama wa wunyingi ni nuna wa mina se ni vona swihoxo swa yena. Kambe, ku lehisa mbilu ka yelana ni lirhandzu ni xihlonipho. Se swi lava ni lehisa mbilu swaku ni kombisa swaku na mu rhandza ni ku mu hlonipha nuna wa mina. Phela ku lehisa mbilu i ka lisima ka muchadu wa mina.”

   Pimisa hi leswi:

  •  Indjhe wa mu lehisela mbilu lweyi u nga chada na yena loko a phazama?

  •  U nga swi kombisisa ku yini swaku wa lehisa mbilu loko lweyi u nga chada na yena a yendla swihoxo?