Webale kugonza kubazaaho ebintu Abakaiso ba Yahwe bakora. Ebigambo binu bitekaniziibwe kubakonyera kumanya omulingo gw’okuhandiika n’okumanya amakuru g’ebigambo ebikozesebwa omu diini y’Abakaiso ba Yahwe. Obworaaba oine ebikaguzo ebirukukwata ha nsonga ey’etabaziibweho hanu, nitukusaba ohikirre ofiisi y’itaagi ly’Abakaiso ba Yahwe.

orusorrokano orukooto. Rora:  orusorrokano orw’ekiro kimu.

Ekyombeko ky’Ensorrokano Enkooto eky’Abakaiso ba Yahwe. Kinu kiikaro ekikooto eky’okuramizaamu eky’Abakaiso ba Yahwe nambere ebitebe bingi eby’omu kiikaro eki by’esorooleza kutunga ensorrokano enkooto buli hanyuma y’akasumi. Nikisobora n’okwetwa “Ekyombeko ky’Ensorrokano Enkooto.”

Awake! Magaziini ey’eteerwa kandi egabwa Abakaiso ba Yahwe. Ekabanza kuteerwa omu 1919 kandi kasumi ako ekaba n’eyetwa The Golden Age, ibara lyayo likahindurwa kandi yatandika kwetwa  Consolation omu 1937. Awake! likaba ibara eryakomerwe kutandika na magaziini eya Agusto 22, 1946. Ibara Awake! likakomwa kusobora kukonyera abasomi kumanya ngu tuli omu kasumi ak’embaganiza kusigikirra ha Baibuli. Eri emu ha magazini ezikyakizireyo kugabwa omu nsi yoona.

Beseeri, Omubeseeri, Eka ya Beseeri. “Beseri” ibara ly’Oruheburaniya erirukumanyisa “Enju ya Ruhanga.” Linu liri ibara eriheebwa ebiikaro eby’Abakaiso ba Yahwe ebikozesebwa kurolerra n’okusagika emirimo yabo ey’eby’omwoyo omu buli kicweka rundi ihanga. Abantu abaheereza omu biikaro binu bali bamu h’Abakaiso ba Yahwe kandi bamanyirwe “nk’Ababeseeri.” Tibasasurwa musaara. Kandi boona hamu beetwa “Eka ya Beseeri” habw’okuba, baikara hamu, baramiza hamu, kandi bakorra hamu nk’eka omu biikaro binu. Ekigambo “Omubeseeri” tikiri kitiinisa ekiheebwa abakora omu biikaro binu.

Akatebe k’Itaagi. Buli murundi ofiisi y’itaagi etandikwaho, Akatebe k’Itaagi akaroho abagurusi basatu rundi abarukukiraho kakomwa kurolerra emirimo omu ihanga rundi amahanga agali hansi y’itaagi eri.

ofiisi y’itaagi. Enu niyo ofiisi nambere Akatebe k’Itaagi kakorra emirimo yako ey’okusagika n’okurolerra emirimo Abakaiso ba Yahwe bakora omu ihanga limu, rundi agarukukiraho. Obwire obumu ofiisi enu eyetwa “itaagi” omu bugufu.

ow’oruganda. Kinu kiri kigambo ekyetwa omusaija ow’abatiziibwe nk’omu h’Abakaiso ba Yahwe. Enyuguta y’okubanza ehandiikwa ntaito obukiba nikikozesebwa kubazaaho baingi. Enyuguta ey’okubanza ehandiikwa nkooto obukihandiikwa hamu n’ibara ly’omu h’Abakaiso ba Yahwe omusaija (ekyokurorraho, Ow’oruganda Smith). Tikikozesebwa nk’ekitiinisa. Nikyo kimu n’Abakaiso ba Yahwe abakazi (ekyokurorraho, Munyaaya itwe Smith).

oruganda rw’ensi yoona. Abakaiso ba Yahwe boona abali omu nsi (Abasaija n’abakazi).—1 Petero 5:9, NWT.

ekicweka rundi circuit. Ebitebe by’Abakaiso ba Yahwe omu kiikaro ekimu.

 orusorrokano orw’ekiro kimu. Runu ruli rusorrokano orw’ekiro kimu orubaho emirundi ebiri omu mwaka kandi orubamu ebitebe ebirukwahukana. Abantu nibaraalizibwa kubaho omu nsorrokano zinu kandi zitekanizibwa kukonyera abantu kwirra haihi na Ruhanga. Proguraamu ebamu ebintu ebikonyera abato n’abakuru kugasirwa omu buhabuzi bwa Baibuli. Habaho ebyokurorraho ebirukwoleka obwomeezi bwa buli kiro, ebyoleka nk’oku tusobora kuteeka omu nkora emisingi ya Baibuli. Ensorrokano zinu zikira kuba ha Byombeko by’Ensorrokano Enkooto ez’Abakaiso ba Yahwe. Nizisobora n’okuba omu biikaro ebipangisiibwe rundi nizirorwa ha mukura. Emirundi erukukira obwingi, zikira kubaho ha wiikendi. Kutaahamu kwa busa kandi tibahabaho kusorooza sente.

omuroleerezi w’ekicweka. Onu mugurusi ow’amazire akasumi kandi ow’arukuheereza hansi y’oburagirizi obwa ofiisi y’itaagi. Uwe (na mukazi we, kakuba aba ali omu buswere babungira) abungira ebitebe ebiri omu kicweka ekimuhairwe, kandi bakira kubungira buli kitebe emirundi nk’ebiri buli mwaka. Kwongerreza ha kugarramu amaani abo abali omu kitebe, aha oburagirizi kandi agarramu amaani abagurusi n’abaheereza omu kitebe. Abaroleerezi b’ebicweka batekaniza puroguraamu eya buli kitebe. Ekigambo omuroleerezi w’ekicweka tikiri kitiinisa.

ekitebe. Enu eri guruupu ey’Abakaiso ba Yahwe abasorrokana hamu butoosa kuramya. Akatebe k’abagurusi kaine obujunanizibwa bw’okwebembera entekaniza ezirukwahukana ez’okwega Baibuli, n’okuha ekitebe oburagirizi omu by’omwoyo rundi buli omu omu kitebe. Buli omu naaraalizibwa kwija omu nsorrokano z’ekitebe. Kutaahamu kwa busa kandi tibahabaho kusorooza sente.

ensorrokano enkooto ez’ebiro bisatu. Rora:  ensorrokano enkooto ez’ensi yoona hamu  n’ensorrokano enkooto ez’ebicweka.

omugurusi. Omusaija ow’akuzire omu by’omwoyo ow’aine obujunanizibwa bw’okwegesa n’okurolerra abali omu kitebe omu by’omwoyo. Abagurusi basemeriire kwikara nibahikaana n’ebiri omu 1 Timoseo 3:1-7; Tito 1:5-9; Yakobo 3:17, 18; na 1 Petero 5:2. Abagurusi tibasasurwa, tibali bakozi b’ebitebe ebibarumu, rundi ekitongole kyona ekiine akakwate n’Abakaiso ba Yahwe. Abagurusi abarukukira obwingi baine emirimo erukubataahiza sente ezibakonyera kwerolerra n’okurolerra amaka gaabo. Abagurusi tibali bebembezi b’ediini kandi tibarukwahukana h’abantu abandi omu kitebe. Ekigambo kinu tikikozesebwa nk’ekitiinisa.

 obuheereza. Abakaiso ba Yahwe batebeza abantu obu niboorobera ekiragiro kya Yesu eky’okutebeza ‘amakuru amarungi ag’Obukama’ hali abantu “omu nsi yoona nk’obwakaiso hali amahanga goona.”—Matayo 24:14; 28:19.

Gileadi, Isomero lya Gileadi. Enu eri mpandiika engufu eya Watchtower Bible School of Gilead, eryatandikireho omu 1943 kutendeka abamiisani. Omu kasumi kanu, Abakaiso ba Yahwe abaraalizibwa omu isomero linu bamara emyezi etaano nibatunga okutendekwa okw’embaganiza okurukusigikirra ha Baibuli. Ekigambo “isomero” obukiba kyonka, enyuguta ey’okubanza eba ntaito.

Akatebe Akalemi ak’Abakaiso ba Yahwe. Eri guruupu entaito ey’abagurusi abaine obujunanizibwa obwokurolerra Abakaiso ba Yahwe omu by’omwoyo omu nsi yoona. Omu bugufu, keetwa “Akatebe Akalemi.” Bejumbira omu kuteekaniza ebitabu ebirukusigikirra ha Baibuli. N’obukiraaba ngu Akatebe Akalemi nuko kebembera omu kurolerra n’okusagika emirimo ey’Abakaiso ba Yahwe omu nsi yoona, katwara Yesu Kristo wenka nk’Omwebembezi w’Abakaiso ba Yahwe. Ofiisi z’Akatebe Akalemi nizisangwa ha Kitebe Ekikuru eky’Abakaiso ba Yahwe ekiri omu Warwick, New York, U.S.A.

 ensorrokano enkooto ez’ensi yoona. Runu rusorrokano orw’okuramya n’okwega Baibuli orw’ebiro bisatu oruteekanizibwa Abakaiso ba Yahwe orubaho omurundi gumu buli hanyuma y’emyaka nke omu mbuga ezikomerwemu omu nsi yoona. Abakaiso ba Yahwe kuruga omu mahanga agarukwahukana baraalizibwa kubaho nk’abagenyi. Buli omu naraalizibwa kwija omu nsorrokano zinu kandi ziba n’ekigendererwa eky’okugarramu Abakaiso ba Yahwe amaani omu by’omwoyo n’okubakonyera kuba omu bumu omu nsi yoona. Ensorrokano enkooto ez’ensi yoona zikira kuba omu biikaro ebipangisiibwe kandi zibaho kutandika na Kyakataano kuhika Sande. Kutaahamu kwa busa kandi tihabaho kusorooza sente.

Yahwe. Ibara lya Ruhanga Ow’obusobozi bwona kandi Omuhangi nk’oku kyolekerwe omu Byahandiikirwe. (Zabuli 83:18) Ekigambo “Yahwe” tikikozesebwa nk’ibara erindi ery’omu h’Abakaiso ba Yahwe.

 Abakaiso ba Yahwe. Bakristaayo abaheereza Yahwe Ruhanga kandi abekamba kwegesa abantu Baibuli kuraba omu miringo ey’okutebeza erukwahukana. Ekigendererwa eky’omulimo gunu ogw’okwegesa abantu Baibuli nukwo kugambira abantu amakuru amarungi agarukukwata ha Bukama bwa Ruhanga rundi gavumenti ya Ruhanga. (Matayo 24:14) Ibara linu libahukaniza h’amadiini agandi, habw’okuba tirigarukira ha kwoleka oubarukukiikirra baitu n’omulimo ogubakora begondiize omu ibara lya Ruhanga. Omuntu tabarwa nk’omu h’Abakaiso ba Yahwe kuhikya obwayetegereza enyegesa za Baibuli, akaikirizibwa kwejumbira omu kutebeza n’ekitebe ky’Abakaiso ba Yahwe, kandi akabatizibwa nk’omu h’Abakaiso ba Yahwe kwoleka ngu ayehaireyo hali Yahwe Ruhanga. Ekigambo “Abakaiso ba Yahwe” kisemeriire kukozesebwa omu bwijwire kakuba tuba nituhandiikwaho omu kicweka (article) ha bw’omurundi gw’okubanza. Ekigambo “Abakaiso” nakyo nikiikirizibwa kukozesebwa. Kakuba omuntu omu nuwe aba nabazibwaho, ekigambo “omu h’Abakaiso ba Yahwe” nikisobora kukozesebwa. Ekigambo “Kaiso wa Yahwe” obu kikozesebwa, kiba kitahikire.—Isaya 43:10.

Yesu Kristo. Omwana wa Ruhanga omu wenka. (Yohana 3:16) Abakaiso ba Yahwe barora Yesu Kristo nk’Omwebembezi wabo kandi bekamba kwegera ha kyokurorraho kye n’okuteeka omu nkora ebiyayegeseze. Abakaiso ba Yahwe batwara Yesu Kristo kuba muntu omukuru muno arabaireho omu nsi, omu h’Abakaiso ba Yahwe ayabandize, kandi Yahwe Ruhanga ow’alikozesa kujuna abantu.—Isaya 9:6, 7; Okusuku’rwa 1:5.

Ekyombeko ky’Obukama eky’Abakaiso ba Yahwe. Binu biikaro eby’okuramizaamu ebikozesebwa ekitebe kimu rundi bibiri. Ebyombeko binu bikira kwetwa “Ekyombeko ky’Obukama.” Nosabwa kutakozesa ekigambo “ekanisa.”

Omukoro gw’Okwijuka Okufa kwa Yesu Kristo. Gunu mukoro ogubaho buli mwaka kwijuka okufa kwa Yesu Kristo. Nigusobora n’okwetwa Ekiihuro ekya Mukama Waitu ekya Rwebagyo, Ekiihuro kya Mukama Waitu, Ekiihuro eky’Okumalirra, Ekiijukyo, rundi Kwijuka okufa kwa Yesu. Abakaiso ba Yahwe bagutwara kuba mukoro omukuru omu mwaka kandi nugwo mukoro gwonka Kristo oguyaragiire abahondezi be kukwata.—Luka 22:19, 20.

ensorrokano eza hagati omu wiiki. Runu rusorrokano orubaho ekiro kimu hagati omu wiiki kandi rukira kubaho rwebagyo. Nirwetwa Obwomeezi n’Obuheereza Bwaitu nk’Abakristaayo kandi rurumu ebicweka bisatu, ebitekaniziibwe kukonyera Abakaiso ba Yahwe kuba baheereza ba Ruhanga abarungi. Kusisanaho n’ensorrokano zaitu ezindi, buli omu naaraalizibwa kubaho maiso h’amaiso rundi ha videoconference kandi kutaahamu kwa busa, tihabaho kusorooza sente.

omuheereza. Omusaija ow’akuzire omu by’omwoyo ow’aine obujunanizibwa bw’okukonyera abagurusi kurolerra ekitebe. Kusobora kufooka muheereza, omusaija asemeriire kugumizaamu nahikiiriza ebintu ebyolekerwe omu 1 Timoseo 3:8-10, 12, 13 na Tito 2:6-8. Abaheereza bakora emirimo emikuru kusagika ekitebe. Omuheereza tasasurwa ha bw’emirimo akora kandi tali mukozi w’ekitebe ekyarumu rundi ekitongole kyona ekiine akakwate n’Abakaiso ba Yahwe. Abaheereza baingi bakora emirimo eyebatahiza sente kusobora kwerolerra n’okurolerra amaka gabo. Hanyuma y’Akasumi baheereza abamu bakurakurana bafooka abagurusi. Ekigambo kinu tikikozesebwa nk’ekitiinisa.

Abamiisani. Onu Mukristaayo ow’abatiziibwe nk’omu h’Abakaiso ba Yahwe ow’atumwa Akatebe Akalemi ak’Abakaiso ba Yahwe kuheereza omu bicweka ebirukwahukana omu nsi yoona. Abamiisani baba betekaniize kulekaho amaka gaabo kugenda omu ihanga rundi omu kicweka ekibatamanyire kukonyera kutebeza amakuru amarungi.—Matayo 24:14.

New World Translation of the Holy Scriptures. Linu ibara lya Baibuli ey’Ebyahandiikirwe eby’Oruheburaniya (“Endagaano Enkuru”) hamu n’Ebyahandiikirwe eby’Oruyonaani (“Endagaano Empyaka”) ey’ehindurwa kandi ekateerwa Abakaiso ba Yahwe. Nesobora kwetwa New World Translation.

payoniya. Ibara erikozesebwa hali Omukristaayo ow’abatiziibwe nk’omu h’Abakaiso ba Yahwe ow’ayekamba kuhikya omuhendo gw’esaaha ezitairweho omu mulimo gw’okutebeza. Omu bwijwire ibara linu niryo “payoniya ow’akasumi koona,” kandi ahayo esaaha 600 buli mwaka (rundi esaaha 50 buli kwezi). Obwire obumu, ekigambo “payoniya omusagiki” kikozesebwa kumanyisa omuntu ow’ayehaireyo kutebeza kumara esaaha 15 rundi 30 buli kwezi rundi kumara emyezi nke. Bapayoniya tibasasurwa habw’omulimo gw’okutebeza ogubakora kandi tibali bakozi b’ebitebe ebibarumu rundi ekitongole kyona ekiine akakwate n’Abakaiso ba Yahwe. Bapayoniya abarukukira obwingi baine emirimo eibakora kusobora kwehikyaho ebyetaago byabo. Ekigambo kinu tikikozesebwa nk’ekitiinisa.

kutebeza. Rora:  obuheereza.

Ensorrokano eza Boona. Runu ruli rusorrokano orw’ekitebe orubaho buli wiikendi, orubamu orubazo oruheebwa kumara edakiika 30 orutekaniziibwe kugasira abantu boona. Hanyuma y’orubazo hongeraho kwega akatabu ka Omunaara gw’Omulinzi akarumu ebicweka ebirukusigikirra ha Baibuli. Ekicweka kinu kibamu kukaguza n’okugarukamu kandi kimara esaaha emu. Kusisanaho n’ensorrokano zaitu ezindi, buli omu naaraalizibwa kubaho maiso h’amaiso rundi ha videoconference kandi kutaahamu kwa busa, tihabaho kusorooza sente.

omutebezi. Onu ali muntu weena ow’atebeza kandi ow’ali kicweka ky’ekitebe ky’Abakaiso ba Yahwe. Omuntu kufooka mutebezi asemeriire kuba nayetegereza kandi naikiririza omu nyegesa za Baibuli kandi naatwaza obwomeezi kusigikirra ha misingi ya Ruhanga. Abatebezi tibasasurwa habw’omulimo gw’okutebeza kandi tibali bakozi b’ebitebe ebibarumu rundi ekitongole kyona ekiine akakwate n’Abakaiso ba Yahwe. Ekigambo kinu tikikozesebwa nk’ekitiinisa.

 ensorrokano enkooto ez’ebicweka. Orusorrokano runu rubaho buli mwaka, rumara ebiro bisatu kandi rubamu ebitebe ebiri omu kicweka eki, n’ekigendererwa eky’okugarramu Abakaiso ba Yahwe amaani omu by’omwoyo. Buli omu natangirirwa kubaho. Puroguraamu enu ebamu ebintu ebikonyera abato n’abakuru kugasirwa omu buhabuzi bwa Baibuli. Habamu eby’okurorraho ebiri omu mulingo gw’emizaano ebirukukwata ha bwomeezi obwa buli kiro n’ebyokurorraho kuruga omu Baibuli, kandi byoleka omulingo tusobora kuteeka omu nkora emisingi ya Baibuli. Ensorrokano zinu zikira kuba omu biikaro ebikooto ebipangisiibwe nk’ebizaaniro hamu n’ebiikaro ebikooto eby’ensorrokano. Ensorrokano enkooto ezibamu ebitebe bitaito nizisobora kuba omu Byombeko eby’Ensorrokano Enkooto eby’Abakaiso ba Yahwe. Ensorrokano zinu ziba z’amaiso h’amaiso kutandika Kyakataano kuhika Sande. Omu myaka ehingwireho, ensorrokano zinu zibaire nizikwatwa omu mulingo gwa vidiyo kandi niziteekwa ha mukura. Kusisanaho n’ensorrokano zaitu ezindi, buli omu naaraalizibwa kubaho maiso h’amaiso rundi ha videoconference kandi kutahamu kwa busa, tihabaho kusorooza sente.

Munyaanya itwe. Ekigambo eky’etwa omukazi ow’abatiziibwe nk’omu h’Abakaiso ba Yahwe. Enyuguta y’okubanza ehandiikwa ntaito obukiba nikikozesebwa kubazaaho baingi. Enyuguta ey’okubanza ehandiikwa nkooto obukihandiikwa hamu n’ibara ly’omu h’Abakaiso ba Yahwe omukazi (ekyokurorraho, Munyaanya itwe Smith). Tikikozesebwa nk’ekitiinisa. Nikyo kimu n’Abakaiso ba Yahwe abasaija (ekyokurorraho, Ow’oruganda Smith).

Omunaara gw’Omulinzi Ogurukurangirra Obukama bwa Yahwe. Gunu guli mutwe gwa magaziini ey’eteerwa kandi ekagabwa Abakaiso ba Yahwe. Nesobora kwetwa Omunaara. Ibara linu niryoleka ngu magaziini enu n’ekonyera abasomi baayo kumanya omulingo ebigendererwa bya Ruhanga biriyo nibihikiirizibwa. (Matayo 24:42) Omunaara gw’Omulinzi ogw’okugaba gugabirwa abantu abarukugonza kumanya ebirukukiraho hataroho kusasura sente. Omunaara gw’Omulinzi ogw’okwega gukozesebwa omu bitebe omu kicweka eky’okukaguza n’okugarukamu buli wiiki omu nsi yoona. Omunaara gw’Omulinzi gwikaire niguteerwa kuruga omu 1879. Eri emu ha magaziini ezikyakizireyo kugabwa omu nsi yoona.

OKUMANYISIBWA: Obworaaba nobazaaho Abakaiso ba Yahwe, nosabwa kukozesa ibara linu omu bwijwire ha murundi gw’okubanza. Kumanya ebirukukiraho, rora:  Abakaiso ba Yahwe.