ISOMO 7
Obukama bwa Ruhanga Nikyo Kiki?
1. Obukama bwa Ruhanga Nikyo Kiki?
Bintu ki ebifoora Yesu kuba Mukama omurungi?—MARAKO 1:40-42.
Obukama bwa Ruhanga gavumenti ey’omu iguru. Niija kwihaho gavumenti ezindi zoona, ekonyere abantu omu nsi kukora Ruhanga eby’agonza. Omu kasumi akatali kahara Ruhanga naija kukozesa gavumenti enu kukora ha byetaago by’abantu n’okubateraniza hamu.—Soma Danieri 2:44; Matayo 6:9, 10; 24:14.
Ruhanga akakoma Yesu kuba Mukama w’Obukama Bwe.—Soma Okusuku’rwa 11:15.
Rora vidiyo Obukama bwa Ruhanga Nikyo Kiki?
2. Habwaki Yesu nuwe Mukama arukukirayo oburungi?
Omwana wa Ruhanga nuwe Mukama arukukirayo oburungi habwokuba w’embabazi, w’obwinganiza, kandi aina obusobozi kukonyera abantu. (Matayo 11:28-30) Hanyuma y’okuhumburwa, akatemba omu iguru y’aikaara ha mukono gwa Yahwe ogw’obulyo y’alindiirra. Akasumi obu kahikire, Ruhanga akamuha obusobozi kutandika kulema ensi, ali omu iguru.—Soma Danieri 7:13, 14.
3. Haroho abandi abaralema na Yesu?
Abo abarukwetwa ‘abarukwera’ nubo abarukwija kulema na Yesu omu iguru. (Danieri 7:27) Abakwenda ba Yesu abesigwa nubo barukwera ababandize kukomwa. N’okuhikya hati Yahwe n’akyakoma abakazi n’abasaija abesigwa nka abarukwera. Nk’omulingo Yesu y’ahumbwirwe, n’abo bahumburwa n’omubiri ogw’omwoyo.—Soma Yohana 14:1-3; 1 Abakolinso 15:42-44.
Abarukugenda omu iguru bali baingaha? Yesu akabeeta “igana like.” (Luka 12:32) Boona hamu nibaija kuba 144,000. Nibaija kulema ensi bali hamu na Yesu.—Soma Okusuku’rwa 14:1.
4. Kiki ekyabaireho Yesu obu y’atandikire kulema?
Obukama bwa Ruhanga obu bwatandikire omu 1914, * Yesu eki y’abandiizeho kukora kikaba kunaga Setani n’abadaimoni be omu nsi kuruga omu iguru. Habw’ekiniga kiingi, Setani akatandika kuleeta emihito omu nsi. (Okusuku’rwa 12:7-10, 12) Kuruga obu emihito eyeyongire omu bantu. Obulemu, ekihe, endwaire, n’emisisa byoona biri kicweka kye manyikirizo ekirukwoleka ngu Obukama bwa Ruhanga buli haihi kutandika kulema omu nsi.—Soma Luka 21:7, 10, 11, 31.
5. Haroho ebirungi ebirugire omu Bukama bwa Ruhanga?
Habw’okutebeza okurukugenda omu maiso omu nsi yoona, Obukama bunu busoboire kuteraniza hamu abantu baingi kuruga omu mahanga goona. Abantu baingi abaculezi nibaikiriza kulemwa Yesu. Ruhanga obwaraba n’ahwerekereza entekaniza y’ebintu enu embi, abali hansi y’Obukama bwe nibaija kujunwa. Nahabwekyo, boona abarukugonza kugasirwa omu Bukama bunu baina kwega kworobera Yesu.—Soma Okusuku’rwa 7:9, 14, 16, 17.
Omu bwire bw’emyaka 1,000, Obukama bunu nibwija kuhikiriza ekigendererwa kya Ruhanga ekya kara. Ensi obw’erafooka orugonjo orurungi, Yesu naija kugarurra Ise Obukama bwe. (1 Abakolinso 15:24-26) Haroho ou w’akugondeze kugambira ebirukukwata ha Bukama bwa Ruhanga?—Soma Zabuli 37:10, 11, 29.
^ rup. 6 Kumanya ebirukukiraho ha mulingo obunabbi bwarangire omwaka 1914, rora empapura 216-219 ez’akatabu Baibuli Etwegesa Ki?
