ISOMO 6
Tuligaruka Kurora Abafiire?
1. Makuru ki amarungi agarukukwata h’abafiire?
Nambere Yesu y’ahikiire Besaniya eyali haihi na Yerusalemi, munyani we Lazaro akaba amazire ira ebiro bina afiire. Yesu akagenda ha kituuro kye ali hamu na Maliza na Malyamu bannyanya ba Lazaro. Abantu baingi bakesorroza. Maliza na Malyamu bakahura omuhimbo gw’amaani Yesu obu y’ahumbwire Lazaro.—Soma Yohana 11:21-24, 38-44.
Maliza akasangwa amanyire amakuru amarungi agarukukwata h’abafiire. Akaba asomere kuruga omu Kigambo kya Ruhanga ngu abafu nibaija kuhumburwa bagaruke kwikara omu nsi.—Soma Yobu 14:14, 15.
2. Abafiire baina omulingo gwoona ogu barukwehu’ramu?
Ruhanga akagambira Adamu: “Oli cucu, kandi omu cucu numwo oligaruka.”—OKUBANZA 3:19..
Tukakorwa omu cucu. (Okubanza 2:7; 3:19) Obutufa busaho kicweka kyoona ekisigara kyomiire, obwongo bwaitu bufa n’ebitekerezo bihwaho. Lazaro taine ou y’agambire omulingo y’ayehuliremu afiire habwokuba abafiire tibaina eki bamanyire.—Soma Zabuli 146:4; Omugambizi 9:5, 10.
Ruhanga abonabonesa abantu omu murro hanyuma y’okufa? Kusigikirra nkoku tumazire kwega kuruga omu Baibuli ngu abafu tibaina eki bamanyire, enyegesa y’okwokya abantu omu murro tehikire, kandi kuba kubaza ebisuba hali Ruhanga. N’ekitekerezo ky’okwokya abantu omu murro kyonyiini kinugwa hali we.—Soma Yeremiya 7:31.
Rora vidiyo Abafu Bali Munyikara ya Mulingo Ki?
3. Nikisoboka kubaza n’abafu?
Abafu tibarukusobora kubaza rundi kuhu’ra. (Zabuli 115:17) Baitu bamaraika abamu ababi babaza n’abantu nibagonza batekereze ngu nubo abantu abafiire. (2 Petero 2:4) Ruhanga n’atutangira kimu kulengaho kubaza n’abafiire.—Soma Ekyebiragiro 18:10, 11.
4. Nibaha abarahumburwa?
Baingi hali abo abali omu bituuro nibaija kuhumburwa bagaruke kwikara omu nsi. N’abo abakoraga ebintu bibi habwokuba bakaba batamanyire Ruhanga nibaija kuhumburwa.—Soma Luka 23:43; Engeso 24:15.
Abaraaba bahumbwirwe nibaija kutunga omugisa gw’okwegesebwa amananu agarukukwata hali Ruhanga, kibasobozese kwikiririza omu Yesu nibamworobera. (Okusuku’rwa 20:11-13) Boona abarahumburwa bakakora ebintu ebirungi nibaija kwegondeza omu nsi ebiro byoona.—Soma Yohana 5:28, 29.
5. Okuhumbuka nikutwegesa ki hali Yahwe?
Ruhanga obu y’ahaireyo Omwana we, akaletera abantu kunihira kw’okugaruka kurora abafiire. Nahabwekyo okuhumbuka kutwegesa hali engonzi n’embabazi za Ruhanga. Nooha ou wakugondeze kurora muno obu abafu barahumbuka?—Soma Yohana 3:16; Abarumi 6:23.
