ISOMO 10
Ensorrokano ez’Abakaiso ba Yahwe Nizisobora Kukugasira Zita?
Wakaraalizibwaga kugenda omu rusorrokano orw’Abakaiso ba Yahwe? Obworaaba otakagendaga omu nsorrokano zaabo, n’osobora kutiina kuzigendamu ha murundi gwawe ogw’okubanza. N’osobora kwekaguza: ‘Biki ebikorwa omu nsorrokano ezi? Habwaki z’omugaso? Habwaki nsemeriire kuzigendamu?’ Omu isomo linu noija kwega omulingo kusorrokana hamu n’abandi kisobora kukwiriza haihi na Ruhanga kandi n’okukukonyera iwe nk’omuntu.
1. Nsonga ki ey’erukukira obukuru ey’etuleetera kusorrokana hamu?
Wetegereze omulingo omuhandiiki wa Baibuli yasoboroire ensonga enkuru habwaki tusorrokana n’abandi: “Omu bitebe nuho ndakugizaga [Yahwe].” (Zabuli 26:12) Omu mulingo nugwo gumu, Abakaiso ba Yahwe batunga okusemererwa kwingi omu kusorrokana hamu. Omu nsi yoona basorrokana hamu buli wiiki kukugiza Ruhanga, kuzina, n’okusaba. Kandi emirundi nke buli mwaka bagenda n’omu nsorrokano enkooto.
2. Biki eby’orayega omu nsorrokano zaitu?
Omu nsorrokano, tuteeka omutima ha Kigambo kya Ruhanga, tukisoborra kurungi kandi twoleka amakuru agarumu. (Soma Nehemiya 8:8.) Obw’oraija omu nsorrokano, noija kwega hali Yahwe hamu n’emiringo ye enungi. Obw’orayeyongera kwegaho okugonza okw’akwiniire, noija kweyongera kumwirra haihi. Noija n’okwega omulingo asobora kukukonyera kuba n’obwomeezi obwine ekigendererwa.—Isaya 48:17, 18.
3. Noija kugasirwa ota obw’orasorrokana hamu n’abandi?
Yahwe n’aturagira ati “tutekerezege okwekambisangana okugonzangana, nokukora engeso ezisemiire; okutaleka okwesorozaga hamu.” (Abaheburaniya 10:24, 25) Omu nsorrokano zaitu, noija kutangatangana abantu abarukufaahongana, kandi kusisanaho naiwe, abarukugonza kweyongera kwega hali Ruhanga. Noija kuhurra nibabazaaho ebintu ebirukugarramu amaani kuruga omu Baibuli. (Soma Abarumi 1:11, 12.) Noija n’okumanya abantu abandi abaine okusemererwa n’obukiraaba ngu baine ebizibu. Zinu nizo zimu ha nsonga habwaki Yahwe n’agonza tusorrokanege hamu butoosa!
YEGA EBIRUKUKIRAHO
Manya ebiba omu nsorrokano ez’Abakaiso ba Yahwe kandi n’omulingo oragasirwa obw’orayekamba kuzigendamu.
4. Ensorrokano ez’Abakaiso ba Yahwe
Omu kyasa ky’okubanza, Abakristaayo basorrokanaga hamu butoosa kuramya Yahwe. (Abarumi 16:3-5) Musome Abakolosai 3:16, hanyuma mubazeeho ekikaguzo kinu:
-
Abakristaayo aba kara baramyaga bata Yahwe?
Omu kasumi kanu, Abakaiso ba Yahwe basorrokana hamu butoosa. Kurora ebiba omu nsorrokano, mutekeho VIDIYO. Hanyuma, murole ekisisani eky’abantu abali omu rusorrokano kandi mubazeeho ebikaguzo ebirukuhonderaho.
-
Bintu ki eby’oyetegeriize ebikorwa omu Kingdom Hall ebirukusisana n’ebyo eby’osomere omu Abakolosai 3:16?
-
Omu vidiyo rundi omu kisisani, haroho ekintu ekindi eky’oyetegeriize ha nsorrokano ekikusemiize?
Musome 2 Abakolinso 9:7, hanyuma mubazeeho ekikaguzo kinu:
-
Habwaki Abakaiso ba Yahwe batasasuza sente habw’ensorrokano zaabo?
Iwe n’omwegesa wawe, murole ebintu ebirabazibwaho omu rumu ha nsorrokano eza wiiki enu.
-
Kicweka ki eky’ensorrokano eky’orukutekereza ngu nikiija kukusemeza rundi kukugasira?
Obaire okimanyire?
Ha jw.org, n’osobora kumanya ebiikaro hamu n’obwire bw’ensorrokano omu nsi yoona.
-
Ensorrokano zaitu zirumu embazo, ebyokurorraho, hamu na vidiyo. Ensorrokano zitandika kandi zimalirra n’ekizina hamu n’okusaba
-
Omu bicweka ebimu eby’orusorrokano, abantu baraalizibwa kugarukamu
-
Buli omu natangirirwa—ab’omu maka boona, abatali omu buswere, abakuzire omu myaka, hamu n’abaana
-
Ensorrokano zaitu tiziri z’okusasurra. Abakaiso ba Yahwe tibasasuza abantu kutaahamu kandi tibarabyamu akaibo
5. Nikyetaagisa kutamu amaani kusobora kugenda omu nsorrokano
Tekerezaaho ekyokurorraho ekya eka Yesu yazaalirwemu. Kusobora kugenda omu rusorrokano orwabahoga buli mwaka, barubataga mairo 60 kuraba omu kicweka eky’ensozi kuruga Nazalesi kugenda Yerusalemu. Musome Luka 2:39-42, hanyuma mubazeeho ebikaguzo binu:
-
Notekereza ngu orugendo runu orw’okugenda Yerusalemu rwayetaagisaaga kuteekamu amaani?
-
Bintu ki ebimu ebisobora kukulemesa kugenda omu nsorrokano, kandi kiki eky’osobora kukora kubisingura?
-
Notekereza nikiija kukugasira kugenda omu nsorrokano n’obukiraaba kitanguhire? Habwaki?
Baibuli n’egamba ngu kikuru muno kusorrokana hamu kuramya. Musome Abaheburaniya 10:24, 25, hanyuma mubazeeho ekikaguzo kinu:
-
Habwaki tusemeriire kugenda omu nsorrokano butoosa?
ABANTU ABAMU BAGAMBA: “Tikirukukwetaagisa kusorrokana n’abandi. Nikimara kwesomera Baibuli omu ka yaawe.”
-
Kyahandiikirwe ki, rundi kyokurorraho ki omu Baibuli ekirukwoleka Yahwe ekyarukugonza?
OYEGERE KI?
Kugenda omu nsorrokano nikiija kukukonyera kwega bingi hali Yahwe, kugumya obunywani bwawe na uwe, kandi n’okumuramya oli n’abandi.
Kweijukyamu
-
Habwaki Yahwe n’atwekambisa kusorrokana hamu?
-
Biki eby’orayega omu nsorrokano ez’Abakaiso ba Yahwe?
-
Notekereza haroho omulingo ogundi ensorrokano zisobora kukukonyeramu?
SERULIIRIZA
Baitu kakuba oba n’otiina kugenda omu nsorrokano? Rora omulingo omusaija ayayehurraga ati yatandikire kugonza ensorrokano.
Rora omulingo omusigazi yayegondiize omu nsorrokano kandi n’ekiyakozere kwikara nazigendamu.
Manya omulingo abandi barukwehurra habw’okugenda omu nsorrokano.
“Habwaki Osemeriire Kugenda omu Nsorrokano ha Kyombeko ky’Obukama?” (Ekicweka kinu kiri ha mukura)
Manya omulingo omusaija ow’ekiniga kingi kandi ow’akaba ali omu kikoosi eky’abacwi b’ebiragiro yasoboire kuhindura obwomeezi bwe hanyuma y’okugenda omu rusorrokano orw’Abakaiso ba Yahwe.
“Tinagendaga Hantu Hoona Ntaine Emundu Yange” (Watchtower, eya Julaayi 1, 2014)
