“BAASI egende, baitu omusaija Omucaina atagenda!” Binu nibyo ebigambo Alexandra yahuliire obwakaba ali mubaasi alinzire kucwanganiza ensaro y’emu ha mahanga agali omu South America. Alexandra akaruga omu baasi kurora ekirukugenda omu maiso, akasanga ngu omusaija Omucaina ali omu kubaza orulimi Oruspanishi orugwire kusoborra omusirikale arukulinda ensaro. Alexandra akaba amanyire Orucaina habwokuba akaba ali omu kitebe eky’Abakaiso ba Yahwe eky’orulimi Orucaina. Akacwamu kukonyera omusaija Omucaina kumuhindurra ebigambo by’omusurukale kubigarra omu rulimi rwe.

Omusaija Omucaina akagamba ngu akaba ali mwikazi omu ihanga eryo baitu bakaba baibire ebipapura bye ebirukumukwataho hamu na sente ze. Omusirikale akabanza kwanga ebigambo by’omusaija Omucaina kandi akatekereza ngu Alexandra n’asobora kuba muntu arukusubura abantu kubakozesa obwiru. Hanyuma, omusirikale akaikiriza ebigambo by’omusaija Omucaina, baitu akamugamba ngu asasule sente habw’okurubata ataine ebihandiiko ebirukumubazaaho. Nk’oku akaba ataine sente, Alexandra akamwohoza doola 20. Omusaija akasiima muno kandi yaraganiza Alexandra kumugarurra sente ze hamu n’okumuha amagoba. Baitu Alexandra akamugambira ngu we akaba akikozere habw’okugonza baitu hatali kutungamu amagoba. Kandi akamugambira ngu nikimusemeza habwokuba nikyo ekintu ekihikire eky’akaba asemeriire kukora. Alexandra akaha omusaija Omucaina ebitabu eby’okusoma kandi yamugamba kwega Baibuli n’Abakaiso ba Yahwe.

Kanikisemeza muno kuhurra abantu abarukukunira abantu n’obubarukuba batabamanyire. Ebikorwa nka binu ebirungi bikorwa abantu ab’omu madiini goona hamu n’abantu abataine madiini. Naiwe wakubaire n’omutima omurungi nka gunu? Kinu ekikaguzo kikuru habwokuba Yesu akagamba ngu: “Okugaba kwomugisa okukira okuhebwa.” (Engeso Ezabakwenda 20:35) Kandi n’abasayansi bakizoire ngu kugaba kirungi habwokuba kikonyera obwomeezi bwawe. Katurole omu miringo ki.

Ebyokurorraho biingi nibyoleka ngu kugaba hamu n’okusemererwa biine akakwate. Omukwenda Paulo akahandiika yagamba ngu “Ruhanga nagonza omwenda [omugabi].” Omukwenda Paulo akaba n’abazaaho Abakristaayo abakuniire Abakristaayo bagenzi babo abakaba bali omu bwetaago. (2 Abakolinso 8:4; 9:7) Omukwenda Paulo akaba atarukamanyisa ngu bakagaba habwokuba bakaba basemeriirwe. Baitu bakatunga okusemererwa habw’okugaba.

Okuseruliiriza nikwoleka ngu kugaba “kusisimura ebicweka eby’obwongo ebituletera kusemererwa, kukoragana kurungi, hamu n’okwesiga abandi.” Okuseruliriza okundi kukazoora ngu “kugabira omuntu ondi sente nikurugamu okusemererwa kwingi kukira iwe kuzeriira.”

Habw’enyikara ey’orumu wakehurraga ngu tosobora kugaba? Amananu gali ngu buli omu  wena n’asobora kutunga okusemererwa okuruga omu kugaba. Akantu n’obukarukuba kali kataito baitu okagabire n’omutima omurungi, eki nikyo ekintu ekikuru. Omu h’Abakaiso ba Yahwe akasagika yahayo sente kandi yahandiikira abakozere magaziini enu ati: “Emyaka enu yoona mbaire ntarukusobora kuhayo sente nyingi baitu nimpayo sente nke muno ha Kingdom Hall.” Akongera yagamba ngu: “Yahwe Ruhanga angaruliireho biingi kukira ebindukumuha. . . . mwebale kunsobozesa kuhayo kusagika omulimo gwa Yahwe.”

Kugaba tikirukumanyisa kugaba sente zoonka baitu haroho ebintu biingi ebi tusobora kugaba.

Baibuli egamba ngu: “Omusaija wokuganyira [ow’embabazi] akora kurungi obwomeezibwe wenka: baitu anyaku’ruma atuntuza omubirigwe.” (Enfumo 11:17) Abantu abaine embabazi behayo kukonyera abantu abandi kandi bakozesa​—obwire bwabo, amaani gaabo kwoleka okufaayo h’abantu abandi. Kwetwaza omu mulingo gunu kibagasira omu miringo nyingi, kandi gumu ha mugaso nugwo kuba n’obwomeezi oburungi.

Okuseruliiriza nikwoleka ngu abo abehayo kukonyera abantu abandi tibatalibanizibwa muno obusaasi hamu n’oburwaire bw’ebiteekerezo. Kinu nikimanyisa ngu, obwomeezi bwabo burungi. Kugaba kukonyera n’abo abarwaire oburwaire obw’amaani nka siliimu hamu n’oburwaire obw’ebinywa. Kandi kizoirwe ngu abarukugonza kuleka obutamiizi, obu bakonyera abantu abandi kibakonyera kutateekereza muno kandi n’okwanguha kubuleka.

Ensonga habwaki kinu kiri kiti, eri ngu ‘omuntu aine embabazi rundi asaliirirwa abandi tarahuka kukwatwa ebiteekerezo ebibi.’ Kugaba nikusobora n’okukeehyaho okwetuntura hamu n’okweraliikirra. Kandi abantu abaferiirwe abagonzebwa baabo barahuka kuruga omu kuganya obu bakonyera abantu abandi.

Busaho kugurukyagurukya kwona, kugaba kirungi habw’obwomeezi bwawe.

Yesu akatererra abegeswa be ati: “Mugabege nainywe muligabirwa; endengo enungi, igatirwe, ecikinyizibwe, erukuseseka, niyo balibaha omu kifuba. Baitu endengo eyi mulengeramu, nainywe muligirengerwamu.” (Luka 6:38) Obwogaba, kiretera abantu kukusiima habw’omutima ogu omurungi kandi nabo kibaletera omutima ogw’okugonza kugaba. Kugaba kugumya enkoragana hamu n’obunywani.

Abarukuseruliiriza habirukukwata ha nyikara y’abantu nibagamba ngu “abantu abaikara nibehayo kukonyera abandi baletera abandi kwegera ha kyokurorraho kyabo.” Kandi, “n’okusoma kwonka ha byokurorraho byabo abayolekere embabazi biretera abandi omutima gw’okugonza kugaba.” Okuseruliiriza okundi nikwoleka ngu, “omuntu omu n’asobora kuletera abantu baingi muno, n’abatakaroraga kuba n’omutima ogu omurungi.”  Ekikorwa kimu kyonka eky’okugaba nikisobora kurugirramu abantu omu kiikaro kyona kufooka bagabi. Tiwakugondeze kwikara omu kiikaro kya mulingo ogu? Mali, kyakurugiremu ebirungi biingi kakuba abantu boona baba bagabi.

Ekyokurorraho kimu ekirukwoleka kurungi ensonga enu kikabaho omu Florida, America. Bamu ha Bakaiso ba Yahwe bakehayo kukonyera abantu abaali batiirwe ekiyaga eky’amaani. Obu baali ha nju eya mugenzi wabo, ei basemeriire kukukoraho bakarora n’orugo rw’omutahi rusiisikaire kandi bacwamu nauwe kumukonyera. Omutahi onu akahandiikira ekitebe ekikuru eky’Abakaiso ba Yahwe nagamba ati: “Nimbasiima muno ntaine ahokugarukira, tinkararoraga abantu abarungi nka inywe.” Habw’okugonza kwoleka okusiima kwe, akasindiika sente kusagika omulimo gwaitu ogw’okutebeza.

Okuseruliiriza kuruga omu abasayansi nikwoleka ngu “haroho ekintu ekiretera abantu kugonza kukonyera abandi.” Okuseruliiriza kunu kwongera kwoleka ngu abaana nabo, “bagaba batakatandikire kubaza.” Habwaki? Baibuli egarukamu ekikaguzo kinu obw’eyoleka ngu abantu bakahangwa “omu kusisana kwa Ruhanga,” kandi kinu nikimanyisa ngu abantu n’abo baine emiringo emirungi nk’eya Ruhanga.​—Okubanza 1:27.

Gumu ha miringo emirungi Yahwe Ruhanga ey’aine nukwo okugaba. Atuhaire obwomeezi hamu n’ebintu byona ebirukutuletera okusemererwa. (Engeso Ezabakwenda 14:17; 17:26-28) Nitusobora kwega hali Isiitwe Yahwe hamu n’ebigendererwa bye kakuba tusoma ekigambo kye Baibuli. Kandi etwoleka ngu Ruhanga atutekaniriize obwomeezi oburungi omu busumi obw’omu maiso. * (1 Yohana 4:9, 10) Yahwe Ruhanga nk’oku yatuhangire omu kisisani kye kandi nuwe ndugirro y’okugaba, obutumwegeraho tukagaba, kitugasira kandi nauwe atusiima.​—Abaheburaniya 13:16.

Noijuka Alexandra, ha kutandika kw’ekicweka kinu? Nomanya biki ebyayongiireho? N’obukiraaba ngu omu h’abantu abakaba bali na Alexandra omu baasi akamugambira ngu sente ze akaba azinagire, omusaija Omucaina obu yahikire omu rubuga akagenda hali banywani be bamuha sente kandi yasasura ibanja linu. Kandi, omusaija onu akatandika n’okwega Baibuli n’Abakaiso ba Yahwe nk’oku Alexandra akaba amugambiire. Hanyuma y’emyezi esatu Alexandra akasemererwa muno habw’okutangana omusaija onu ha ruso’rokano orukooto orw’Abakaiso ba Yahwe orukaba ruli omu ihanga lya Peru. Habw’okugonza kusiima Alexandra byona eby’akaba amukoliire, omusaija onu akamuraaliza hamu n’abanywani be kwija ha hoteeri ye.

Kugaba hamu n’okukonyera abandi kirugamu okusemererwa kwingi muno. Kandi kikuru muno n’okubakonyera kumanya Yahwe Ruhanga endugirro y’ebisembo byona ebirungi. (Yakobo 1:17) Naiwe n’otuunga emigisa eruga omu kugaba?