Blessing * akatwarwa Bulaaya kukora omulimo ogw’okukora isoke. Baitu obu yahikireyo bakatandika kumuteera kumara ebiro ikumi, hamu n’okumutinisiriza ngu nibaija kukora kubi ab’owabo. Kandi bakamuhambiriza n’okukora nka malaaya.

Mukama we akamucwera kusasura sente ezirukwingana doola 40,000 ekirukumanyisa ngu akaba aine kusasura doola 200 rundi 300 buli kiro kusobora kumara ibanja linu. Blessing nagamba ngu: “Nkaba ntaine eky’okukora habwokuba obu natekerezaaga kutoroka natiinaga ngu nibasobora kukora kubi ab’owaitu.” Ekyahikire hali Blessing nikisisana n’ebirukuhika h’abantu obukaikuru bbuna omu nsi yoona abarukuhambirizibwa kukora obw’amalaaya.

Emyaka nka 4,000 erabireho, omusigazi omu arukwetwa Yusufu bakamutunda omu ihanga lya Misiri. Bakamalirra bamutwaire kuheereza nk’omwiru omu ka y’omu ha bakuru omu Misiri. Yusufu uwe batabanze kumubonabonesa nka Blessing, baitu obuyayangire kubyama na mukazi wa mukama we, omukazi onu akamuhangirra ngu akaba alengereho kumuhamba. Hanyuma, Yusufu bakamuteeka omu nkomo kandi bamubohesa ebyoma.​—Okubanza 39:1-20; Zabuli 105:17, 18.

Yusufu akaba ali mwiru omu busumi bwa kara baitu Blessing uwe akaba ali mwiru omu kasumi kaitu kanu. Baitu kandi boona bakahikwaho ekikorwa ekibi eky’okubatunda nk’omulingo batuunda ebintu.

Obu habahoga obulemu kyarahukiraga amahanga kutunga abantu ab’okukora obwiru. Nikigambwa ngu Thutmose III ayali mukama wa Misiri akakwata abantu abarukwingana 90,000 kuruga omu bulemu obw’abaireho omu Kanaani. Abamisiri bakakozesa abantu banu nk’abairu kuhaiga ebintu eby’omwitaka, kwombeka yekaru hamu n’okulima emikura.

 Omu bulemi bwa Baroma, obulemu bwabasobozesaaga kutunga abairu omu bwingi, kandi haroho obu barwanaga nukwo basobole kutunga abairu. Nikiteberezebwa ngu omu kyasa ky’okubanza, abairu baali nibahika kimu kyakabiri eky’abantu omu Roma. Abairu abakaba bali Misiri hamu na Roma babonabonesebwaga muno. Nk’ekyokurorraho, abairu abakoraga omu binombe bya Baroma bahangaraaga emyaka nka 30 yonka.

Obwiru bukeyongera mukiikaro ky’okukeeha. Kuruga omu kyasa kya 16 kuhika omu kyasa kya 19, okusubura okw’abairu kubaiha omu Africa kubatwara omu mahanga ga America kwali nikugoba muno kukira omulimo gundi gwona ogw’obusubuzi. Alipoota kuruga omu UNESCO n’eyoleka ngu ‘Nikiteberezebwa ngu abantu abarukuhika obukaikuru 25 rundi 30 otwaliiremu abasaija, abakazi hamu n’abaana nubo bakwasirwe kandi batundwa nk’abairu.’ Okuseruliiriza nikwoleka ngu abantu baingi bakafa obu baali nibabambukya enyanja ya Atlantic. Omu h’abantu abakizireho arukwetwa Olaudah Equiano akagamba ngu: “Kyali nikitinisa muno kandi nkaba ntarukusobora n’okukiikiriza obu nahurraga amaraka g’abakazi abarukukunga hamu n’abantu abarukufa.”

Ekirukusaaliza kiri ngu, obwiru butagarukire omu busumi obwaira honka. Kusigikirra ha kuseruliiriza okwakozerwe International Labour Organization nikwoleka ngu, nahati abantu abarukuhika obukaikuru 21 nubo bali omu bwiru otwaliiremu abasaija, abakazi, hamu n’abaana. Kandi tibaine bugabe, basasurwa sente ntaito muno rundi n’obutasasurwa. Abairu omu kasumi kanu nibakora omu binombe, omu makorro g’engoye, nibakora obwamalaaya, hamu n’omu maka g’abantu. Obwiru nibweyongera buli kiro, n’obukiraaba tiburukwikirizibwa omu biragiro.

Okubonabonesa muno abairu kibarugirramu kurwanirra obugabe bwabo. Omu kyasa ky’okubanza B.C.E., omusaija omurwani arukumanywa nka Spartacus hamu n’abairu 100,000 bakalengaho kurwanisa Abaroma. Omu kyasa kya 18, abairu abakaba bali ha kizinga kya Hispaniola bakajemera bakama baabo. Omulingo omubi abairu batwazibwamuga gukabaletera kurwana obulemu obw’amazire emyaka 13 kandi kinu kikarugamu abairu kutunga ihanga erya Haiti omu 1804.

Okuruga kw’Abaisareri omu Misiri, nukwo kucungurwa kw’abairu oku kyakizireyo omu byafaayo by’ensi yoona. Abaisareri abarukuhika obukaikuru busatu, boona bakacungurwa kuruga omu bwiru.  Kandi baali basemeriire kucungurwa habw’okuba Baibuli egamba ngu Abamisiri ‘bakasaliza obwomezi bwabo okutalibana okwobuiru.’ (Okuruga 1:11-14) Omu ha Bafaraaho akaita abaana ba Baisareri nukwo akehyeho omuhendo gwabo.​—Okuruga 1:8-22.

Okuruga kw’Abaisareri omu Misiri kyali kikorwa eky’embaganiza habwokuba Ruhanga akabajuna. Ruhanga akagambira Musa ati: “Manyire obujune bwabu.” Kandi Ruhanga akongerraho nagamba ngu: “Nsirimukire okubakiza.” (Okuruga 3:7, 8) N’omu kasumi kanu, Abayudaaya bajaguza okuhingurwaho buli mwaka kwijuka okucungurwa kunu.​—Okuruga 12:14.

Baibuli etugumya ngu, “tiharoho okutahiki’ra hali Mukama Ruhanga waitu,” kandi takahindukaga. (2 Ekyebyomubusinge 19:7; Maraki 3:6) Ruhanga “akantuma [Yesu] okutebeza okulekerwa hali abanyankomo . . . , okulekera abasasanguirwe.” (Luka 4:18) Ebigambo binu bikamanyisa ngu abairu boona bakutungire obugabe? Nangwa. Yesu akatumwa kujuna abantu kuruga omu kibi hamu n’okufa. Akongera yagamba ngu: “Namananu galibafora bobugabe.” (Yohana 8:32) N’omu kasumi kanu, amananu Yesu yayegeseze nigakonyera abantu kuba b’obugabe omu miringo nyingi.​—Rora akasanduuko “ Kucungurwa Kuruga omu Bwiru obw’Embaganiza.”

Amananu gali ngu, Ruhanga akakonyera Yusufu hamu na Blessing kuruga omu bwiru omu miringo erukwahukana. N’osobora kusoma ebirukukwata ha Yusufu omu kitabu ky’Okubanza esuura 39 kugarukira ha suura 41. N’omulingo Blessing y’atungiremu obugabe niguhuniiriza muno.

Blessing akagenda omw’ihanga lya Spain hanyuma y’okubingwa omu ihanga nambere akaba ali. Omu Spain nuho yatangaine Abakaiso ba Yahwe kandi yatandika kwega Baibuli. Blessing akacwamu kuhindura obwomeezi bwe, yatunga omulimo ogundi kandi y’ayesengereza mukama we ow’okubanza kumukehezaaho omuhendo gwa sente ezi yasasuraga buli kwezi. Kiro kimu, mukama we akamuterra esiimu, namusaba ekiganyiro n’okumugambira ngu akaba atakyamubanja. Kiki ekyaletiire mukama we kuhinduka? Ensonga eri ngu mukama we nauwe akaba atandikire kwega Baibuli n’Abakaiso ba Yahwe! Blessing nagamba ngu: “Amananu gafoora omuntu w’obugabe omu miringi erukuhuniriza.”

Yahwe Ruhanga akasalirwa muno habw’omulingo Abaisareri batwazibwamuga obu bakaba bali omu Misiri. N’omu kasumi kanu Ruhanga asalirwa muno habw’ebikorwa ebitali by’obwinganiza ebirukubaho hati. Mali, nikyetagisa empinduka ey’amaani omu bantu kusobora kumaraho obwiru bwona. Kandi eki nikyo kyonyini Ruhanga arukuraganiza kukora. “Itwe ntutegereza iguru erihyaka nensi empyaka, nambere haikara okuhiki’ra.”​—2 Petero 3:13.