• Yakukomerwe Ruhanga. “Nyowe ntaireho omukama wange . . . Ndikuha amahanga okuba obugwetwa bwawe, [n’ensonda] zona ezensi okuba obutaka bwawe.”​—Zabuli 2:6, 8.

• Yakubaire omugwetwa w’Omukama Daudi. “Omwana atuzaliirwe, omwana atuhairwe . . . Okweyongera okulema kwe nobusinge tiribirireka okweyongera, ha kitebe kya Daudi, na ha bukamabwe, okubugumya.”​—Isaya 9:6, 7.

• Yakuzaliirwe omu Beterehemu. “Iwe, Beterehemu . . . , omuliiwe haliruga omu namberendi, aliba omulemi omu Isareri . . . Aliba mukuru okuhikya empero zensi.”​—Mika 5:2, 4.

• Abantu bakumwangire kandi bamwite. “Akagaywa kandi akangwa abantu . . . Baitu akahutara habwebyokusisa byaitu, akasasangurwa habwebyokutahikirra byaitu.”​—Isaya 53:3, 5.

• Yakuhumbwirwe omu bafu kandi aheebwe ekitiinisa. “Tolisiga obwomezi bwange okuzimu; Nobukwakuba okuleka owawe arukwera okubona okujunda. . . . Omu mukono gwawe ogwobulyo numwo harumu ebinyakusemeza ebiro nebiro.”​—Zabuli 16:10, 11.

Omubyafaayo by’abantu, omuntu omu wenka nuwe yahikiriize ebintu ebibazibweho, kandi omuntu ogu nuwe Yesu Kristo. Malaika akagambira Malyamu nyina Yesu ati: “Ruhanga alimuha ekitebe kya Daudi isenkuruwe, . . . kandi obukamabwe tibulihwaho.”​—Luka 1:31-33.

Yesu atafooke mulemi omu nsi. Baitu naija kulema abantu nk’Omukama w’Obukama bwa Ruhanga nasigikirra omu iguru. Kiki ekirukumufoora Omukama arukukirrayo kimu oburungi? Tekerezaaho ebintu Yesu yakozere obwakaba ali omu nsi.

•   Yesu yafaahoga abantu. Yesu akakonyera abasaija, abakazi, abato n’abakuru atarukubasoroora habw’enyikara yabo rundi ekitiinisa kyabo. (Matayo 9:36; Marako 10:16) Omugenge obuyamwesengeriize ati: “Obworaaba nogonza nosobora okunsemeza,” Yesu akamukwatirwa embabazi kandi yamukiza.​—Marako 1:40-42.

• Yesu akatwegesa omulingo tusobora kusemeza Ruhanga. Akagamba ati: “Timurukusobora kukorra Ruhanga [n’itungo].” Akongera yagamba ngu tusemeriire kutwaza abandi nk’oku naitwe twakugondeze abandi batutwaze. Akongera yayoleka ngu Ruhanga tafaaho ebiturukukora byonka, baitu afaayo na ha ntekereza n’enyehurra yaitu. Nahabweki, kusobora kusemeza Ruhanga, tusemeriire kwentantara kuba n’enyehurra embi omu mutima gwaitu. (Matayo 5:28; 6:24; 7:12) Yesu akooleka ngu kusobora kutunga okusemerwa konyini, tusemeriire kumanya ebintu Ruhanga ebyarukugonza tukole, kandi tubikole.​—Luka 11:28.

• Yesu akegesaaho omulingo tusobora kwoleka bataahi baitu okugonza okw’amananu. Ebigambo n’ebikorwa bya Yesu bikekambisa abaamuhulirizaaga kuteka omunkora ebiyabegesaaga. “Ebitebe byahurra muno okwegesa kwe; baitu akabegesa nkanyakuina obusobozi.” (Matayo 7:28, 29) Akabegesa ati: “Mugonzege abanyanzigwa banyu.” Akasabira naabo abamwisire nagamba ati: “Ise nyowe obaganyire; baitu tibamanyire ekibarukukora.”​—Matayo 5:44; Luka 23:34.

Yesu nuwe ahikiire kimu kuba mulemi w’ensi omurungi muno, owarakonyera abantu kandi akaboleka embabazi. Baitu alitandika di kulema?