Obaire Okimanyire?
Isorrokaniro ely’Ekyasa ky’Okubanza: Ekisisani kinu nikyoleka ebimu ha bintu ebyabaire ha isorrokanira ely’omu kyasa eky’okubanza erikaba nirisangwa omu Gamla eyali mairo nka 6 eruguru y’Enyanja ya Galiraya. Nikitukonyera kutungaho ekisisani nk’oku isorrokaniro lyasisanaga
Amasorrokaniro gakatandika gata?
EKIGAMBO ky’Oruyonaani nambere ekigambo “isorrokaniro” kirukwihwa nikimanyisa “kusorrokana” rundi “kwesorooza hamu.” Amakuru ganu nigaikirraniza n’amabara g’ebiikaro binu habwokuba kuruga kara, amasorrokaniro gakaba biikaro by’Abayudaaya kwesorolezamu nukwo begesebwe kandi baramye. N’obukiraaba ngu Ebyahandiikirwe bya Baibuli eby’Oruheburaniya tibikira kubazaaho amasorrokaniro, Ebyahandiikirwe bya Baibuli eby’Oruyonaani nibyolekera kimu ngu ebiikaro ebi byali biroho ekyasa ky’okubanza C.E. kitakahikire.
Abakugu omu kuseruliiriza ha bya Baibuli abarukukira obwingi bagamba ngu Abayudaaya bakatandikaho amasorrokanira obubakaba bali omu bunyagwa omu Baburoni. Ekitabu ekirukumanywa nka Encyclopaedia Judaica nikigamba kiti: “Habw’Abaisareri kuhambirizibwa kulekaho Yekaro yabo, kuba omu ihanga erindi, n’okwetaaga kuhumuzibwa habw’obujune, bakacwamu kwikara nibasorrokana ha Sabiiti nukwo basome Ebyahandiikirwe.” Obubalekiirwe kuruga omu bunyagwa, nikisisana ngu bakeyongera kusorrokana hamu nukwo basabe kandi basome Ebyahandiikirwe kandi kinu kyabaletera kuta amasorrokaniro omu biikaro byona ebibagenzere kwikaramu.
Nambere ekyasa ky’okubanza C.E. kyahikiire, amasorrokaniro gakaba gamazire kufooka ebiikaro bikuru nambere Abayudaaya abakaba bali omu biikaro nka Mediterranean, kuhikira kimu Middle East, hamu n’omu Isareri honyini basorrokaniraga. Omukugu omu byafaayo eby’Abayudaaya arukwetwa Lee Levine owa The Hebrew University of Jerusalem akagamba ati: “[Amasorrokaniro] gakozesebwaga nk’ebiikaro by’okusomeramu, baaliramuga ebihuro ebirukwera ha Sabiiti na ha biro eby’emikoro, nuho emisango yacwerwaga, nuho batwaraga sente ez’okukonyera abantu, kandi batungiramuga ensorrokano ezirukukwata ha bulemi n’ezindi.” Akongera yagamba ati: “Ensonga enkuru ey’amasorrokaniro ganu ekaba kukorramu emikoro y’ediini.” Kinu nikyoleka ensonga habwaki Yesu yakiraga kugenda ha mikoro eyabaga omu masorrokaniro. (Mar. 1:21; 6:2; Luk. 4:16) Obuyagendayoga, yayegesaga, kandi yagarramuga amaani abantu abasangwamuga. Ekitebe Ekikristaayo obukyatandikireho, omukwenda Paulo nauwe akagenda muno omu masorrokaniro kutebezaayo. Abantu abagonzaaga ebintu eby’omwoyo bagendaga omu masorrokaniro, nahabweki Paulo obuyatahaga orubuga, yabanzaga kugenda kutebeza omu isorrokaniro.—Eng. 17:1, 2; 18:4.
