Emyaka eyabandize omu bwomeezi bwange, nyowe n’ab’omuka y’owaitu twaikaraga haihi na Leipzig, omu Bugirimaani eya burugaizooba, haihi n’omutaano gw’ihanga lya Czech na Poland. Obunkaba nyine emyaka mukaaga, isiitwe akagenda kukorra aheru kandi twagenda nauwe, ha kubanza omu Brazil na hanyuma omu Ecuador.

Obunahikize emyaka 14, bazaire bange bakantwara omu isomero lya bodingi omu Germany. Habwokuba bakaba bali hara omu Amerika ey’amasirimuka, nkaba nyine kwefaaho. Nkatandika kweyesiga. Tinatekerezaahoga omulingo ebikorwa byange byakwatahoga abantu abandi.

Obunahikize emyaka 17, abazaire bange bakagaruka omu Germany. Hakubanza, naikaraga nabo, baitu habwemyhembo yange n’okutagonza kuhaburwa kikangumira kwikara n’ab’omuka omu businge. Nahabweki obunahikize emyaka 18, nkaruga omuka.

Naikaraga ntatekaine ninseruliiriza ekigendererwa ky’obwomeezi. Hanyuma y’okwekebiija obwomeezi bw’abantu abarukwahukana hamu n’ebitongole, nkakyetegereza ngu ekintu ekyali nikikirayo oburungi omu bwomeezi nukwo kuseruliiriza ebirukukwataho ensi abantu batakagisiisire.

Nkaruga omu Germany, nagura pikipiki kandi nagenda omu Africa. Baitu hanyuma y’obwire butaito, nkaba nyine kugaruka Bulaaya kukanikisa pikipiki yange. Hanyuma y’okugikanikisa, nkagenda ha bbici omu Portugal. Baitu nkacwamu kusigayo pikipiki nukwo ngendere ha lyato.

Nketeranizaaho guruupu y’ensigaanto abaali nibagonza kucwanganiza Enyanja enkooto eya Atlantic nibakozesa eryato. Omuli bo hali harumu omwisiki arukwetwa Laurie ayahikire yafooka mukazi wange. Hakubanza, tukagenda omu bizinga bya Caribbean. Kandi hanyuma y’okwikaraho kataito omu Puerto Rico, tukagaruka Bulaaya. Twali nitunihira kutunga eryato lyokugenderamu, nukwo tulifoole ery’okwegondezaamu. Baitu hanyuma y’okumara ameezi asatu nituserra, tukabirugaho. Bakanyeta kugenda omu mahe ga Bugirimaani.

Omu mahe nkamarayo emyezi 15. Omu kasumi ako, nyowe na Laurie tukataaha obuswere kandi twayetekaniza kugumizaamu n’obwomeezi bwaitu obw’okugenda omu biikaro. Obunkaba ntakagenzere omu mahe, twali tuguzire eryato. Kandi obunkaba ndi omu mahe, mpora mpora tukalihindura twalifoora ly’okugenderamu. Twali nitugonza tuliikalemuga obu nitubungira ebiikaro ebiri omu nsi yaitu enugi. Omu kasumi ako konyini tutakamaliirize kurungi eryato lyaitu, nubwo twamanyire Abakaiso ba Yahwe kandi twatandika kwega nabo Baibuli.

Hakubanza, ntakirole ngu nikinyetaagisa kuhinduramu obwomeezi bwange. Nkaba nswire omu butongole omukazi ounaikaraga nauwe, kandi nkaba ndekere etaaba. (Abefeso 5:5) Obukyahikire ha ntekaniza zaitu ez’okubungira ensi yoona, natekerezaaga ngu kukozesa obwomeezi bwaitu kugenda omu biikaro ebirukwahukana kurora ebintu ebirungi Ruhanga ebiyahangire, bwomeezi mali oburungi kandi obwine ekigendererwa.

Baitu amananu gali ngu nkaba nsemeriire kukora empindahinduka—kukira muno omulingo nayetwazaamuga. Nkaba nyine emyehembo nyingi, nayeyesigaga, nayefaahoga nyenka kandi nayeroraga nk’ow’amaani habw’ebintu ebinkaba nkozere. Mali nkaba ninyefaaho nyenka.

Kiro kimu, nkasoma Okwegesa kwa Yesu okwa ha Rusozi. (Matayo, esuura 5-7) Hakubanza, ntetegereze okusemererwa Yesu okuyali n’abazaaho. Ekyokurorraho, akagamba ngu abarumwa enjara n’abakwatwa iroho nubo baine okusemererwa. (Matayo 5:6) Baitu nkekaguza, omuntu n’asobora ata kuba n’okusemererwa kandi kunu ali mu bwetaago? Obunayeyongiire kwega Baibuli, nkakyetegereza ngu itwena nk’abantu twine ekyetaago eky’eby’omwoyo, kandi ngu twine kubanza kukimanya nukwo tusobole kukihikiriza. Kiri nka Yesu okugambire ngu: “Banyina omugisa abasege omu mwoyo.”—Matayo 5:3.

Obutwatandikire kwega Baibuli twali tuli omu Bugirimaani, baitu tukamara twafuruka twangenda Bufaransa, kandi hanyuma, omu Italy. Hoona nambere twagendaga, twasangayoga Abakaiso ba Yahwe. Nkakwatwaho muno habw’obumu obuli hagati yabo, n’okugonza okubainiirengana. Nkakirora ngu Abakaiso ba Yahwe ruli ruganda orw’ensi yoona. (Yohana 13:34, 35) Hanyuma y’akasumi, nyowe na Laurie tukabatizibwa.

Hanyuma y’okubatizibwa, nkagumizaamu ninkora empindahinduka omu nyetwaza yange. Tukaba tucwiremu kugendera ha maizi omu lyato nituraba ha mwaro gwa Africa kandi tucwanganize Enyanja enkooto eya Atlantic nukwo tugende omu United States. Obutwali tuli ha nyanja itwenka babiri omu lyato lyaitu eritaito twetoroirwe amaizi maingi muno, nkakirora ngu mali ndi wa hansi muno kakuba ondengesaniza na Ruhanga waitu ow’amaani. Habwokuba nkaba nyine obwire bwingi muno (obwoba omu lyato ha nyanja noba otaine bingi eby’okukora), nkacwamu kuteeka omutima ha kusoma Baibuli. Kukira muno, nkakwatwaho ebinasomere habwomeezi bwa Yesu obwakaba ali omu nsi. Akaba ali muntu ahikiriire kandi aine obusobozi oburukukira obw’abantu, baitu atekuliirize. Akaba atarukwefaaho wenka, baitu yagonzaaga kusemeza Ise.

Obunayecumiitirizeeho ekyokurorraho kya Yesu, nkakirora ngu nkaba nsemeriire kuteeka Obukama bwa Ruhanga omu kiikaro eky’okubanza, hatali kubanza kwefaaho nukwo nkabutekerezaaho hanyuma. (Matayo 6:33) Obutwahikire omu United States, tukacwamu kwikarayo nukwo omutima tuguteeke ha bintu eby’omwoyo.

Omu bwomeezi bwange obwa kara obw’okwefaaho, nabaga ntamanyire kiki ekirayongeraho. Baitu hati, nyine nambere nsobora kutunga amagezi agarankonyera omu bwomeezi. (Isaya 48:17, 18) Ekindi, ntugire obwomeezi oburumu ekigendererwa kandi obunkaba ntakatungaga. Nimpeereza Ruhanga kandi nkoyera n’abantu abandi kumwegaho.

Habwokuteeka mu nkora emisingi ya Baibuli, nyowe na Laurie tusoboire kugumya obuswere bwaitu. Tukatunga n’omugisa ogundi, muhara waitu omurungi outukonyiire kumanya n’okugonza Yahwe.

Tutungire ebizibu omu bwomeezi bwaitu, baitu habw’obukonyezi bwa Yahwe, tucweriiremu kimu kugumizaamu nitumuheereza n’okwikara nitumwesiga.—Enfumo 3:5, 6.