Yayi, ni nthena yayi. Ŵakaboni ŵa Yehova Mbakhristu ndipo ŵakugomezga ivyo vili mu Baibolo. Ŵakugomezga yayi kuti kuwunganyika kwa Ŵayuda ku Palestine kukukolerana na uchimi wa mu Baibolo. Ŵakaboni ŵa Yehova ŵakugomezga yayi kuti charu cha Palestina chili kusankhika mwapadera na Chiuta. Nakuti Malemba ghakuyowoya yayi kuti charu chinyake ntchakuzirwa chomene kuluska chinyake panji mtundu unyake ngwapachanya chomene kuluska unyake. Magazini gha Gongwe la Mulinda, iyo ŵakulemba Mbakaboni ŵa Yehova, yikayowoya mwambura kubisa kuti: “Malemba ghakukhozgera yayi gulu landyali la Ziyoni.”

 Buku linyake likuyowoya kuti gulu la Ŵayuda la Ziyoni nda ndyali ndipo likukhumba kuti charu cha Palestine chiŵe charu cha Ŵayuda pera. (Encyclopædia Britannica) Gulu ili likuchita vya chisopa na ndyali. Kweni Ŵakaboni ŵa Yehova ŵakugomezga yayi kuti Ziyoni ntchisambizgo cha chisopa, iwo ŵakunjilirapo yayi pa ndyali za Ziyoni.

 Gulu la Ŵakaboni ŵa Yehova nda chisopa ndipo likunjilirapo yayi pa ndyali, ntheura lingaŵa yayi gulu la Ziyoni. Ŵakaboni ŵa Yehova ŵakumanyikwa kuti ŵakunjilirapo yayi pa ndyali ndipo mu vyaru vinyake ŵasuzgika chifukwa cha kuleka kunjilirapo pa ndyali. Tikugomezga kuti Ufumu wa Chiuta pera ndiwo wiziskenge mtende wenecho pa charu chose chapasi, boma la ŵanthu panji gulu la ndyali yayi.

 Ŵakaboni ŵa Yehova wose ŵakulondezga fundo yakuti ŵakwenera kupulikira malango gha mu charu chawo. Iwo ŵakuwukira boma panji kurwa nkhondo yayi.