Pa nyengo ya masuzgo, Ŵakaboni ŵa Yehova ŵakovwira Ŵakhristu ŵanyawo kweniso ŵanthu ŵanyake. Ŵakuchita nthena chifukwa cha chitemwa, icho ntchimanyikwiro cha Ŵakhristu ŵaunenesko.—Yohane 13:35.

Wonani wovwiri wakuthupi uchoko waka uwo Ŵakaboni ŵa Yehova ŵakapeleka mu myezi 12 kwambira mu 2011 m’paka 2012. Makomiti Ghakovwira pa Nyengo ya Suzgo ndigho ghakadangiliranga pa kovwira ŵanthu. Makomiti agha ghakusankhika na ofesi. Mipingo ya vyaru ivyo kukachitika masoka nayo yikawovwirangapo.

Japan: Pa March 11, 2011, ku mpoto kwa Japan kukachitika chindindindi chikuru icho chikakhwaska ŵanthu masauzandi ghanandi. Ŵakaboni ŵa Yehova pa charu chose chapasi ŵakawovwirapo na ndalama, maluso ghawo, na vinthu vinyake.

Brazil: Ŵanthu ŵanandi ŵakafwa chifukwa cha kututuka kwa maji, kulindimuka kwa charu na vimathipa. Ŵakaboni ŵa Yehova ŵakawovwirapo pa nyengo iyi. Ŵakapeleka chakurya chambura kunangika luŵiro chakukwana matani 42, mabotolo gha maji 20,000, matani 10 gha vyakuvwara, matani 5 gha vinthu vyakovwira pakutozga, munkhwala na vinyake.

Congo (Brazzaville): Nyumba za Ŵakaboni ŵa Yehova ŵakukwana 4 zikawa chifukwa cha kuphulika kwa bomba ndipo za ŵanyake ŵakukwana 28 zikanangika waka. Ŵanthu wose awo ŵakakhwaskika na soka ili ŵakapika chakurya na vyakuvwara. Ndipo Ŵakaboni ŵa Yehova ŵakatolera ku nyumba zawo awo ŵakakhwaskika na suzgo ili.

Congo (Kinshasa): Ŵakaboni ŵa Yehova ŵakapeleka munkhwala ku ŵanthu awo ŵakalwara matenda gha kolera. Ŵakapelekaso vyakuvwara ku ŵanthu awo ŵakakhwaskika na suzgo la kututuka kwa maji chifukwa cha chivula chikuru. Kweniso ŵakapeleka munkhwala, mbuto, na matani gha vyakuvwara ku ŵanthu awo ŵakaŵa ku msasa.

Venezuela: Chivula chikuru chikapangiska kuti maji ghatutuke kweniso kukaŵa vimathipa vinandi. Makomiti ghakovwira pa nyengo ya masuzgo ghakawovwira Ŵakaboni ŵa Yehova ŵakukwana 288 awo ŵakakhwaskika na suzgo ili. Ŵakazenga nyumba za kujumpha 50 za awo ŵakakhwaskika. Kweniso makomiti agha ghakovwira awo nyumba zawo zili kufupi na Nyanja ya Valencia.

Philippines: Chimphepo chakofya (typhoons) chikapangiska maji kututuka. Ofesi ya Ŵakaboni ŵa Yehova yikapeleka vyakurya na vyakuvwara ku ŵanthu awo ŵakakhwaskika na suzgo ili. Kweniso Ŵakaboni ŵa Yehova ŵa ku malo agha ŵakawovwira kunozga vinthu ivyo vikanangika.

Canada: Moto ukati wasakaza nkhorongo yikuru ku Alberta, Ŵakaboni ŵa Yehova ku chigaŵa ichi ŵakapeleka ndalama ku mpingo wa Slave Lake kuti ziwovwire pakunozga ivyo vikanangika. Ŵati ŵamara kunozga ivyo vikanangika ndalama zinandi zikakhalako, ndipo ŵakazipeleka kuti ziwovwire awo ŵakusuzgika na masoka mu vyaru vinyake.

Côte d’Ivoire: Pambere nkhondo yindachitike, apo yikaŵa mukati, kweniso yati yamara Ŵakaboni ŵa Yehova ŵakapeleka vinthu vyakupambanapambana, kusazgapo malo ghakugona na munkhwala.

Fiji: Chivula chikuru chikachitiska maji kututuka, ndipo mabanja ghanandi pa mabanja 192 gha Ŵakaboni ŵa Yehova ghakakhwaskika. Minda yawo yikanangika ndipo ivi vikapangiska kuti chiŵe chakusuzga kusanga chakurya na ndalama. Mabanja agha ghakapika chakurya pa nyengo ya suzgo iyi.

Ghana: Ŵanthu awo ŵakakhwaskika na suzgo la kututuka kwa maji ku chigaŵa cha ku mafumiro gha dazi mu charu ichi ŵakapika chakurya, mbuto, na nyumba ziphya.

United States: Mu vigaŵa vitatu vya charu ichi, mukachitika chimphepo chikuru (tornadoes) icho chikananga nyumba 66 za Ŵakaboni ŵa Yehova, na kusakazirathu zinyake 12. Nangauli nyumba izi zikaŵa na inshuwalansi, kweni Ŵakaboni ŵa Yehova ŵakapeleka ndalama ku ŵeneko kuti zovwire pakunozga nyumba izi.

Argentina: Mipingo ya Ŵakaboni ŵa Yehova yikawovwira awo nyumba zawo zikanangika na vibala vyakotcha ivyo vikaphulika kufuma pasi (volcano) kumwera kwa charu ichi.

Mozambique: Ŵakaboni ŵa Yehova ŵakapeleka chakurya ku ŵanthu ŵakujumpha 1,000 awo ŵakasuzgika na njara mu charu ichi chifukwa cha chilangalanga.

Nigeria: Ŵakaboni ŵa Yehova ŵakapeleka ndalama ku ŵanyawo awo ŵakapwetekeka pa ngozi ya basi. Ŵakawovwiraso ŵanthu ŵanyake ku mpoto kwa charu ichi awo ŵakasoŵa pakukhala chifukwa cha ŵanthu awo ŵakatimbananga chifukwa chakupambana visopa.

Benin: Ŵakaboni ŵa Yehova ŵakapeleka munkhwala, vyakuvwara, maneti, maji, kweniso malo ghakugona ku ŵanthu awo ŵakasuzgika chifukwa cha kututuka kwa maji.

Dominican Republic: Mipingo ya Ŵakaboni ŵa Yehova mu charu ichi yikawovwira kunozga nyumba, na kupeleka vinthu vinyake ku awo ŵakakhwaskika na chimphepo chikuru cha Hurricane Irene.

Ethiopia: Ŵakaboni ŵa Yehova ŵakapeleka ndalama ku vigaŵa viŵiri uko kukaŵa njara chifukwa cha chilangalanga kweniso ku chigaŵa chinyake icho chikasakazika na maji ghakututuka.

Kenya: Ŵakaboni ŵa Yehova ŵakapeleka ndalama ku ŵanthu awo ŵakasuzgika na njara chifukwa cha chilangalanga.

Malawi: Ŵakaboni ŵa Yehova ŵakawovwira ŵanthu ŵakuchimbira kwawo awo ŵali ku msasa wa Dzaleka.

Nepal: Nyumba ya Kaboni wa Yehova munyake yikawa chifukwa cha kudilimuka kwa charu. Mpingo wa Ŵakaboni wa Yehova uwo mwanakazi uyu wakupempheramo ukamuzengera nyumba yakukolerapo na kumupa wovwiri unyake.

Papua New Guinea: Vigeŵenga vikawotcha nyumba 8 za Ŵakaboni ŵa Yehova. Ŵakaboni ŵa Yehova ŵakawovwira kuzengaso nyumba izi.

Romania: Maji ghakututuka ghakawiska nyumba zinyake za Ŵakaboni ŵa Yehova ndipo wovwiri ukapelekeka kuti nyumba izi zizengekeso.

Mali: Ŵakaboni ŵa Yehova ŵa ku Senegal, wakapeleka ndalama kuti ziwovwire ŵanthu mu charu ichi awo ŵakasoŵa chakurya chifukwa cha chilangalanga.

Sierra Leone: Ŵakaboni ŵa Yehova ŵa ku France awo ni madokotala ŵakiza mu charu ichi kuti ŵawovwire ŵalwari awo Mbakaboni ŵa Yehova mu vigaŵa ivyo mukachitikanga nkhondo.

Thailand: Maji ghakututuka ghakasakaza vinthu mu vigaŵa vinandi mu charu ichi. Ŵakaboni ŵa Yehova awo ŵakovwira pa nyengo ya suzgo ŵakajipeleka kunozga nyumba 100 kweniso Nyumba za Ufumu 6 izo zikanangika.

Czech Republic: Maji ghakututuka ghati ghasakaza nyumba zinandi ku Czech Republic, Ŵakaboni ŵa Yehova ŵa ku Slovakia ŵakawovwira awo ŵakakhwaskika na suzgo ili.

Sri Lanka: Ntchito yakovwira awo ŵakakhwaskika na tsunami mu charu ichi yili kumara.

Sudan: Ŵakaboni ŵa Yehova ŵakapeleka chakurya, vyakuvwara, skapato, na malata gha pulasitiki ku ŵanyawo awo ŵakachimbira kwawo chifukwa cha nkhondo.

Tanzania: Katundu wa mabanja 14 wakasakazika na maji ghakututuka. Mipingo ya Ŵakaboni ŵa Yehova mu charu ichi, yikapeleka vyakuvwara na katundu wa mu nyumba ku awo ŵakakhwaskika na suzgo ili. Ŵakazengaso nyumba yimoza.

Zimbabwe: Mu chigaŵa chinyake mu charu ichi mukaŵa njara chifukwa cha chilangalanga. Ŵakaboni ŵa Yehova ŵakapeleka chakurya na ndalama ku ŵanthu awo ŵakakhwaskika na suzgo ili.

Burundi: Ŵakaboni ŵa Yehova ŵakovwira ŵanthu awo ŵachimbira kwawo, ndipo ŵakupelekaso munkhwala.