Kasi Ŵanefili Ŵakaŵa Anjani?
Ivyo Baibolo likuyowoya
Ŵanefili vikaŵa vinkhara panji kuti viŵana vyankhongono chomene ivyo vikababika ŵangelo ŵaheni ŵati ŵagona na ŵana ŵanakazi ŵa ŵanthu mu nyengo ya Nowa. a
Baibolo likuti “ŵana ŵa Chiuta waunenesko ŵakawona ŵana ŵanakazi ŵa ŵanthu kuti mbakutowa.” (Genizesi 6:2) “Ŵana ŵa Chiuta” aŵa ŵakaŵa ŵangelo “awo ŵakatondeka kusunga malo ghawo” kuchanya na kuzgora mathupi ghawo kuti ghayane na gha ŵanthu. Paumaliro, “ŵakamba kutora ŵanakazi wose awo iwo ŵakhumba, kuŵa ŵawoli ŵawo.”—Yuda 6; Genizesi 6:2.
Viŵana ivyo vikababika mu ŵanakazi aŵa vikapambananga chomene na ŵana ŵanyake wose. (Genizesi 6:4) Ŵanefili ŵakaŵa vinkhara kweniso ŵankhaza, ndipo ŵakapangiska kuti charu chapasi chizure na nkhaza. (Genizesi 6:13) Baibolo likuti “ŵana aŵa ŵakaŵa vinkhara, viŵanthu vyakumanyikwa.” (Genizesi 6:4) Vikaŵa vyakutchuka chifukwa vikaŵa vyankhaza kweniso vyakofya.—Genizesi 6:5; Maŵazgo 13:33. b
Utesi pa nkhani ya Ŵanefili
Utesi: Ŵanefili ŵachalipo mazuŵa ghano.
Unenesko: Yehova wakaparanya Ŵanefili kweniso ŵanthu wose ŵaheni pa nyengo ya chigumula. Kweni wakaponoska Nowa na banja lake pera.—Genizesi 6:9; 7:12, 13, 23; 2 Petrosi 2:5.
Utesi: Ŵadada ŵa Ŵanefili ŵakaŵa ŵanthu.
Unenesko: Ŵadada ŵa Ŵanefili ŵakuchemeka kuti “ŵana ŵa Chiuta waunenesko.” (Genizesi 6:2) Mazgu agha ndigho Baibolo likugwiliskiraso ntchito pakulongosora za ŵangelo. (Yobu 1:6; 2:1; 38:7) Kale ŵangelo ŵakaŵa na nkhongono zakuzgora mathupi ghawo kuti ghayane na gha ŵanthu. (Genizesi 19:1-5; Joshuwa 5:13-15) Mpositole Petrosi wakayowoyapo za “mizimu iyo yili mu jele, iyo yikaŵa yambura kupulikira apo Chiuta wakalindilira mwakuzikira mu mazuŵa gha Nowa.” (1 Petrosi 3:19, 20) Pakuyowoya za mizimu iyi panji kuti ŵangelo, Yuda wakati “ŵakatondeka kusunga malo ghawo kweni ŵakaleka malo ghawo ghakwenelera kukhalako.”—Yuda 6.
Utesi: Ŵanefili ŵakaŵa ŵangelo ŵakugaluka.
Unenesko: Lemba la Genizesi 6:4 likulongora kuti Ŵanefili ŵakaŵa ŵangelo yayi, kweni ŵakaŵa ŵana awo ŵangelo ŵakugaluka ŵakababirana na ŵana ŵanakazi ŵa ŵanthu pa charu chapasi. Ŵangelo aŵa “ŵakamba kutora ŵanakazi wose awo iwo ŵakhumba, kuŵa ŵawoli ŵawo.” Ntheura Yehova wakati pamanyuma pa vyaka 120, waparanyenge charu chambura kusopa Chiuta. (Genizesi 6:1-3) Nkhani iyi yikuti “mu mazuŵa ghara,” ŵangelo awo ŵakajizgora ŵanthu “ŵakagonanga na ŵana ŵanakazi ŵa ŵanthu, ndipo ŵakababamo . . . vinkhara, viŵanthu vyakumanyikwa,” panji kuti Ŵanefili.—Genizesi 6:4.
a Mu Chihebere, mazgu agho ghali kung’anamulika kuti “Ŵanefili,” ghakung’anamura “Awo Ŵakuwiska Ŵanji.” Buku linyake likuti mazgu agha ghakung’anamura ŵanthu awo “ŵakuchitira ŵanyawo nkhaza na kuŵaphanga katundu wawo kweniso kuŵawiskira pasi.”—Wilson’s Old Testament Word Studies.
b Lemba la Maŵazgo 13:33 likuyowoya ivyo mphachi za Israyeli zikayowoya. Mphachi izi zikati zawona ŵanthu ŵa mu Charu cha Layizgo, zikwenera kuti zikakumbuka Ŵanefili awo pa nyengo iyi pakaŵa kuti pajumpha vyaka vinandi kufuma apo ŵakafwira.—Genizesi 7:21-23.
Panji Mungatemwa Kuŵerengaso Nkhani Izi
MAFUMBO AGHO BAIBOLO LIKUZGORA
Kasi Viŵanda Viliko Nadi?
Kasi viŵanda ni vichi? Kasi vili kufuma nkhu?
GONGWE LA MULINDA
Nowa ‘Wakendanga na Ciuta Waunenesko’
Kasi tingasambirako vici kwa Nowa na muwoli kweniso mbumba yawo?
MANYANI VYA ISE
Pemphani Kuti Musambirenge Baibolo
Dumbiskanani fumbo la mu Baibolo, panji manyani vinandi vyakukhwaskana na Ŵakaboni ŵa Yehova.