Ŵakhristu ŵakugomezga kuti Yesu wakafwa chifukwa cha zakwananga za ŵanthu. (1 Petrosi 3:18) Kweni kugomezga waka Yesu kuti ni Mponoski nkhwakukwana yayi kuti munthu wazakaponoskeke. Viŵanda navyo vikugomezga kuti Yesu ni “mwana wa Chiuta” kweni vizamuparanyika.—Luka 4:41; Yuda 6.

•  Kasi nichitechi kuti niponoskeke?

•  Wuli pakuyowoya vya nkhani ya “Lurombo lwa Wakwananga?”

•  Kasi ni njani wakambiska “Lurombo lwa Wakwananga?”

•   Mukwenera kugomezga kuti Yesu wakapeleka umoyo wake chifukwa cha zakwananga zithu. (Milimo 16:30, 31; 1 Yohane 2:2) Mukweneraso kugomezga kuti Yesu wakaŵako nadi, kweniso kuti vyose ivyo Baibolo likuyowoya vya iyo ni vyaunenesko.

•   Sambirani ivyo Baibolo likusambizga. (2 Timote 3:15) Baibolo likuyowoya kuti mpositole Paulosi na Sila ŵakaphalira mulinda wa jele kuti: “Gomezga Fumu Yesu ndipo uponoskekenge.” Kufuma apo, ŵakamba kusambizga “mazgu gha Yehova” a kwa mulinda wa jele. (Milimo 16:31, 32) Ichi chikulongora kuti mulinda wa jele wakeneranga kupulikiska dankha Mazgu gha Chiuta kuti wagomezge Yesu. Wakeneranga kumanya makora unenesko wakufuma mu Malemba.—1 Timote 2:3, 4.

•   Ng’anamukani mtima. (Milimo 3:19) Mukweneraso kung’anamuka mtima, na kujilengera chitima chifukwa cha ivyo mukaghanaghananga na kuchita kumanyuma. Ŵanthu wose ŵazamumanya kuti mwang’anamuka mtima para mwaleka kuchita vinthu ivyo vikukwiyiska Chiuta, na kwamba kuchita ‘milimo yakulongora kuti mwang’anamuka mtima.’—Milimo 26:20.

•   Mukwenera kubatizika. (Mateyu 28:19) Yesu wakati munthu wakwenera kubatizika kuti waŵe msambiri wake. Mulinda wa jele uyo tamuzunura kukwambilira wakabatizika. (Milimo 16:33) Mwakuyana waka, mpositole Petrosi wati wasambizga gulu la ŵanthu unenesko wakuyowoya za Yesu, “awo ŵakapokera mazgu ghake na mtima wose ŵakabatizika.”—Milimo 2:40, 41.

•   Pulikirani ulongozgi wa Yesu. (Ŵahebere 5:9) Ŵanthu awo ‘ŵakusungilira vinthu vyose’ ivyo Yesu wakayowoya, ŵakulongora mu ivyo ŵakuchita pa umoyo wawo wa zuŵa na zuŵa kuti mbalondezgi ŵake. (Mateyu 28:20) Iwo ‘ŵakuchita ivyo mazgu ghakuyowoya, ŵakupulika waka yayi.’—Yakobe 1:22.

•   Zizipizgani m’paka kuumaliro. (Mariko 13:13) Ŵasambiri ŵa Yesu ‘ŵakukhumbikwira kuzizipizga’ kuti ŵazakaponoskeke. (Ŵahebere 10:36) Mwachiyelezgero, mpositole Paulosi wakaŵikapo mtima kupulikira ivyo Yesu wakasambizganga na kulutilira kuŵa wakugomezgeka kwa Chiuta. Iyo wakazizipizga vinthu vinandi kufuma waka apo wakazgokera Mkhristu m’paka apo wakafwira.—1 Ŵakorinte 9:27.

 Mu visopa vinyake, ŵanthu ŵakulomba malurombo nga ghakuti “Lurombo lwa Wakwananga” na “Lurombo lwa Chiponosko.” Awo ŵakulomba ŵakuzomera kuti mbakwananga, ndipo ŵakuzomerezga kuti Yesu wakafwa chifukwa cha zakwananga zawo. Kweniso ŵakupempha Yesu kuti wanjire mu mitima yawo panji mu umoyo wawo. Kweni Baibolo likuyowoyapo yayi nesi kuzomerezga malurombo gha kusunga waka pa mtima nga “Lurombo lwa Wakwananga”

 Ŵanyake wakughanaghana kuti para ŵangayowoya “Lurombo lwa Wakwananga” mbwe mbakwenelera kuponoskeka. Kweni munthu wangaponoskeka chifukwa cha kulomba pera yayi. Pakuti ndise ŵambura kufikapo, nyengo zinyake tikwananga. (1 Yohane 1:8) Lekani Yesu wakasambizga ŵalondezgi wake kuti nyengo zose ŵalombenge kuti zakwananga zawo zigowokereke. (Luka 11:2, 4) Lekani Ŵakhristu ŵanyake awo ŵakeneleranga umoyo wamuyirayira ŵazamuwusanga yayi chifukwa ŵakaleka kuteŵetera Chiuta.—Ŵahebere 6:4-6; 2 Petrosi 2:20, 21.[11a]

 Ŵakusanda mbiri ŵakususkana pa nkhani ya umo “Lurombo lwa Wakwananga” lukambira. Ŵanyake ŵakusachizga kuti lurombo ulu lukamba pa nyengo iyo Chiprotesitanti chikambiranga. Ŵanyake wakugomezga kuti ŵanthu ŵakamba kuyowoya “Lurombo lwa Wakwananga” apo ŵakambanga visopa viphya mu vyaka vya m’ma 1700 na 1800. Mulimose umo vingaŵira, Malemba ghakukhozgera yayi lurombo ulu, ndipo lukususkana na ivyo Baibolo likusambizga.