Enya. Chifukwa Chiuta wakukhumba kuti ŵanthu ŵawunganenge pamoza kuti ŵamusope. Baibolo likuti: “Ndipo tiyeni tighanaghaniranenge na kuchiskana kuti titemwanenge na kuchita milimo yiwemi. Tingalekanga yayi kuwungana pamoza.”—Ŵahebere 10:24, 25.

 Ivyo Yesu wakayowoya vikalongora kuti wakakhumbanga kuti ŵalondezgi ŵake ŵasopenge pamoza nga ni gulu. Wakati: “Usange mukutemwana, wose ŵamanyenge kuti ndimwe ŵasambiri ŵane.” (Yohane 13:35) Nthowa yimoza iyo ŵasambiri Ŵakhristu ŵakalongolera chitemwa ichi, nkhuwungana pamoza na Ŵakhristu ŵanyawo. Ŵakawungananga mu mipingo nyengo zose kuti ŵasope Chiuta. (1 Ŵakorinte 16:19) Ntheura mipingo iyi ndiyo yikeneranga kupanga gulu la pa charu chose.—1 Petrosi 2:17.

Kuŵa waka mu chisopa nkhwakukwana yayi

 Baibolo likuti ŵanthu ŵakwenera kuwungana pamoza kuti ŵasope Chiuta, kweni likuyowoyapo yayi kuti munthu wangakondweska Chiuta para wali waka mu chisopa. Kuti Chiuta wakondwe nase, tikwenera kuchita ivyo tikusambira zuŵa lililose. Mwachiyelezgero, Baibolo likuti: “Kusopa kwakutowa na kwambura kufipiskika panthazi pa Chiuta, Dada withu ni uku: kupwelelera ŵalanda na vyokoro mu suzgo yawo, ndiposo kujisungilira wambura kabanga kakufuma ku charu.”—Yakobe 1:27.