Yayi. Baibolo likuti tikwenera kulomba kwa Chiuta pera, kwizira mu zina la Yesu. Pa nkhani ya kulomba, Yesu wakaphalira ŵasambiri ŵake kuti: ‘Ntheura imwe pa kulomba mutenge, Ŵadada ŵithu mwa ŵakuchanya, litumbikike zina linu.’ (Mateyu 6:9) Iyo wakaŵaphalirapo yayi kuti ŵalombenge ku ŵatuŵa, ŵangelo, panji kwa munthu waliyose, kweni kwa Chiuta pera.

 Yesu wakaphaliraso ŵasambiri ŵake kuti: “Ine ndine nthowa, na unenesko, na umoyo. Palije munthu wakwiza kwa Ŵadada kweni mwa ine pera.” (Yohane 14:6) Chiuta wali kupeleka udindo kwa Yesu wakuŵeyelera m’malo mwa ise.—Ŵahebere 7:25.

Kasi pali suzgo usange ningalomba kwa Chiuta kweniso ku ŵatuŵa?

 Limoza mwa Malango Khumi likuti: ‘Ine Yehova Chiuta wako nili Chiuta wa Sanji.’ (Ekisodo 20:5) Kasi mazgu ghakuti Chiuta ngwa “sanji” ghakung’anamurachi? Lemba la Ekisodo 20:5 mu Baibolo la Mang’anamuliro gha Charu Chiphya likuti: “Ine Yehova Chiuta wako, ndine Chiuta uyo wakukhumba kuti ŵanthu ŵasopenge iyo pera.” Chiuta wakukhumba kuti tisopenge iyo pera. Mwakuyana waka, wakukhumbaso kuti tilombenge kwa iyo pera.—Yesaya 48:11.

 Tikumukwiyiska Chiuta para tikulomba ku ŵatuŵa, ŵangelo panji waliyose. Nyengo yinyake mpositole Yohane wakakhumbanga kusopa mungelo. Kweni mungelo wakakana ndipo wakamuphalira kuti: ‘Leka kuchita nthena. Ndine muzga munyako na iwe na ŵabali ŵako aŵo ŵali na chipanikizgo cha Yesu, lambira Chiuta.’—Chivumbuzi 19:10.