Kasi Baibolo Likuti Wuli pa Nkhani Yakuti Mwanalume na Mwanakazi Ŵakharenge Lumoza Uku Ŵandatorane?
Ivyo Baibolo likuyowoya
Baibolo likuti Chiuta wakukhumba kuti ŵanthu ‘ŵakanenge kuchita uzaghali.’ (1 Ŵatesalonika 4:3) Mu Baibolo mazgu ghakuti “uzaghali” ghakusazgapo uleŵi, kugonana kwa ŵanalume panji ŵanakazi ŵekhaŵekha, kweniso kugonana kwa mwanalume na mwanakazi awo ŵandatorane.
Chifukwa wuli Chiuta wakukhumba kuti mwanalume na mwanakazi ŵakwenera kutorana dankha pambere ŵandambe kugonana?
Chiuta ndiyo wakambiska nthengwa. Chiuta ndiyo wakambiska nthengwa apo wakakwatiska mwanalume na mwanakazi wakwamba. (Genizesi 2:22-24) Chiuta wakukhumba yayi kuti mwanalume na mwanakazi ŵakhalirenge lumoza pambere ŵandatorane.
Chiuta wakumanya icho ntchiwemi ku ŵanthu. Wakambiska nthengwa kuti yiŵenge ya umoyo wose pakati pa mwanalume na mwanakazi ndipo ivi vikovwira banja lose kuti liŵe lakuvikilirika. Ghanaghanirani chiyelezgero ichi: Ulongozgi uwo ukwiza lumoza na chinthu icho mwagura kwa awo ŵakapanga ukumovwirani umo mukwenera kulumikizira chinthu icho mwagura, mwakuyana waka ulongozgi wa Chiuta ukutovwira umo tingakhozgera mabanja ghithu. Awo ŵakulondezga malango gha Chiuta nyengo zose vinthu vikuŵayendera makora.—Yesaya 48:17, 18.
Ulongozgi uwo ukwiza lumoza na chinthu icho mwagura kwa awo ŵakapanga ukumovwirani umo mukwenera kulumikizira chinthu icho mwagura. Mwakuyana waka ulongozgi wa Chiuta ukovwira kuti nthengwa yiŵe yakukhora
Kugonana na munthu pambere mundatorane nkhwakofya. Mwachiyelezgero, munthu wangatora nthumbo kwambura kunozgekera, matenda ghakupasirana pakugonana, kweniso wangasuzgika maghanoghano. a
Chiuta wakalenga mwanalume na mwanakazi kuti ŵagonanenge kuti ŵababe ŵana. Chiuta wakuwona umoyo kuti ngwakuzirwa, ndipo kubaba ŵana ntchawanangwa chakuzirwa chomene. Chiuta wakukhumba kuti nase tiwonenge kuti chawanangwa ichi ntchakuzirwa ndipo tingachita nthena para tingalondezga ndondomeko yakwenelera ya nthengwa iyo mwenecho wakambiska.—Ŵahebere 13:4.
Kasi ŵanalume na ŵanakazi ŵakwenera kukhalira dankha lumoza kuti ŵamanye usange mbakwenelera kunjira mu nthengwa?
Kuti banja liŵe la chimwemwe vikuthemba pakuti “ŵanthu ŵakhalire dankha lumoza kwa kanyengo” pambere ŵandatorane yayi. Kweni vikuthemba pa mwanalume na mwanakazi usange mbakugomezgeka kweniso ŵakuchita vinthu mwakukolerana pakumazga masuzgo. b Ŵikanipo mtima kuti mukhozge nthengwa yinu.—Mateyu 19:6.
Kasi ŵakutorana ŵangakhozga wuli nthengwa yawo?
Palije banja ilo likuleka kusangana na masuzgo. Ndipouli, para ŵakutorana ŵakulondezga ulongozgi wa mu Baibolo nthengwa yawo yingenda makora. Wonani viyelezgero ivi:
Mungajighanaghaniranga mwekha yayi kweni muŵikenge vyakukhumba vya munyinu pakwamba.—1 Ŵakorinte 7:3-5; Ŵafilipi 2:3, 4.
Mutemwanenge na kuchindikana chomene.—Ŵaefeso 5:25, 33.
Muyowoyeskanenge makora.—Zintharika 12:18.
Muzikirenge kweniso mugowokeranenge luŵiro.—Ŵakolose 3:13, 14.
a Wonani nkhani ya mutu wakuti “Ivyo Ŵachinyamata Ŵakufumba . . . Kasi Ningachita Wuli Para Chibwezi Chane Chikuti Tigonane?”
b Wonani nkhani ya mutu wakuti “Ivyo Vingawovwira Banja Kuti Liŵe Lakukondwa—Ŵikanipo Mtima.”
Panji Mungatemwa Kuŵerengaso Nkhani Izi
MAFUMBO AGHO BAIBOLO LIKUZGORA
Kasi Baibolo Likuti Wuli pa Nkhani ya Nthengwa?
Fundo za mu Baibolo izo zingawovwira ŵakutorana kuti ŵagege panji ŵamazge masuzgo.
MAFUMBO AGHO BAIBOLO LIKUZGORA
Kasi Baibolo Lingatovwira Kuŵa Ŵakukondwa mu Nthengwa?
Baibolo lili na ulongozgi uwo wawovwira mabanja ghanandi kuŵa ghakukondwa.
MANYANI VYA ISE
Pemphani Kuti Musambirenge Baibolo
Dumbiskanani fumbo la mu Baibolo, panji manyani vinandi vyakukhwaskana na Ŵakaboni ŵa Yehova.